གཞོན་ནུ་ལྷན་ཚོགས་ནས་བོད་མི་གོམ་བགྲོད་བར་སྐྱོན་བརྗོད།

༄༅༎རྒྱ་གར་ནས་བོད་བར་གོམ་བགྲོད་བྱེད་མཁན་བོད་མི་གསུམ་གྱིས་རྒྱ་དམར་གྱི་དར་ཆ་ཁྱེར་ནས་ལས་འགུལ་སྤེལ་བ་དེར། རྒྱ་གར་ནང་ཡོད་པའི་བཙན་བྱོལ་བོད་མིའི་གཞུང་འབྲེལ་མ་ཡིན་པའི་སྒྲིག་འཛུགས་ཆེ་ཤོས་བོད་ཀྱི་གཞོན་ནུ་ལྷན་ཚོགས་ཀྱིས་ངོ་རྒོལ་གནང་ཡོད་པ་རེད།           དེ་ཡང་བཙན་བྱོལ་བོད་མིའི་སྒྲིག་འཛུགས་བོད་ཀྱི་གཞོན་ནུ་ལྷན་ཚོགས་ཀྱིས་བཞུགས་སྒར་དུ་རེས་གཟའ་པ་སངས་ཉིན་གསར་འགོད་ལྷན་ཚོགས་ཤིག་བསྐོངས་ཚོགས་གནང་བའི་ནང་གོང་ཞུས་བོད་མི་གསུམ་གྱིས་ལས་འགུལ་སྤེལ་ཕྱོགས་ཐོག་སྐྱོན་བརྗོད་ཀྱིས། རྒྱ་བོད་གཉིས་ཀྱི་དཀའ་རྙོག་སྟེ་འགྲོ་བ་མའི་ཐོབ་ཐང་གི་གནས་དོན་ཙམ་མིན་པར་རྒྱ་ནག་གི་བོད་བཙན་བཟུང་བྱས་པའི་གནད་དོན་ཞིག་ཆགས་ཀྱི་ཡོད་པ་རེད་ཅེས་དང་།  དེ་འདྲ་ཡིན་དུས་ཕྱི་ལོ་ ༡༩༤༩ ལོ་ནས་ད་བར་གྱི་བོད་མིའི་གནད་དོན་དེ་རང་བཙན་གྱི་ཐབས་རྩོད་ཅིག་དང་དེ་མུ་མཐུད་མཇུག་སྐྱོང་གནང་དགོས་པའི་གནད་དོན་ཞིག་ཡིན་པ་རེད་ཅེས་གསུངས་འདུག           
ཡང་བོད་ཀྱི་གཞོན་ནུ་ལྷན་ཚོགས་ཀྱིས་བོད་ནང་རྒྱ་དམར་གྱི་དར་ཆའི་འོག་བོད་མི་ས་ཡ་གཅིག་ལྷག་གི་ཚེ་སྲོག་ཤོར་ཡོད་པ་མ་ཟད་དུས་ད་ལྟའང་བོད་མི་རྣམས་རྒྱ་དམར་གྱི་དར་ཆ་བཙན་དབང་ཐོག་འགྲེངས་འཛུགས་བྱེད་དགོས་པའི་བཙན་བཀར་ངོ་རྒོལ་གྱིས་ཚེ་སྲོག་ཤོར་དང་ཤོར་བཞིན་ཡོད་པ་དང་རང་དབང་ནང་ཡོད་པའི་བོད་མིས་དེ་ལས་ལྡོག་སྟེ་རྒྱ་དམར་གྱི་དར་ཆ་’’འཕྱར་རྒྱུ་དེ་རང་གི་འོས་འགན་དང་བོད་ཀྱི་ཐབས་རྩོད་དང་རྒྱལ་རབས་ལོ་རྒྱུས་ཐོག་འགལ་ཟླའི་བྱ་བཞག་ཅིག་ཡིན་པ་རེད་ཅེས་བོད་ཀྱི་གཞོན་ནུ་ལྷན་ཚོགས་ཀྱིས་གསུངས་ཡོད་པ་རེད། ཐོག་མའི་འཆར་གཞོན་ནུ་ལྷན་ཚོགས་ངོས་ནས་རྒྱ་གར་ནས་བོད་བར་གོམ་བགྲོད་གནང་མཁན་ཚེ་བརྟན་རྡོ་རྗེ་མ་བུ་གསུམ་གྱི་ལས་འགུལ་དེའི་དགོས་འདུན་དང་ཆོད་སེམས་སོགས་ལ་བརྟེན་ནས་རྒྱབ་སྐྱོར་གནང་ཡང་རྫེས་སུ་ཁོང་ཚོ་གསུམ་གྱིས་ལས་འགུལ་ཐོག་རྒྱ་དམར་གྱི་དར་ཆ་ཁྱེར་རྒྱུ་འགོ་འཛུགས་བྱས་པ་ཤེས་རྟོག་བྱུང་རྗེས་གཞོན་ནུ་ལྷན་ཚོགས་ཀྱིས་དེར་ངོ་རྒོལ་གནང་བ་ཞིག་ཡིན་པ་རེད༎