རྒྱ་གར་རྒྱལ་ས་ལྡི་ལིའི་ནང་བོད་པའི་དངོས་ཟོག་གི་འགྲེམས་སྟོན།

༄༅༎རྒྱ་གར་གྱི་ཉིན་རེའི་གསར་ཤོག་རྡ་ཧིན་རྡུ་The Hinduཞེས་པས་ཟླ་བ་འདིའི་ཚེས་༡ཉིན་ལྡི་ལི་ནས་སྤེལ་བའི་གནས་ཚུལ་ལྟར་ན་ བཙན་བྱོལ་བོད་མིའི་ཚོང་ལས་མཐུན་ཚོགས་ཀྱིས་ཉེ་ཆར་རྒྱ་གར་གྱི་རྒྱལ་སའི་ཉེ་འཁྲིད་ས་ཀེཏ་ནང་གི་DLF Placeཟེར་བའི་འགྲེམས་སྟོན་ཁང་གི་ནང་བོད་ཆུང་ཆུང་Little Tibetཞེས་མིང་བཏགས་པའི་བོད་ཀྱི་ཐུན་མོང་མ་ཡིན་པའི་རིག་གཞུང་གི་ཁྱད་ཆོས་མཚོན་པའི་སྒྱུ་རྩལ་གྱི་དངོས་ཟོག་སྣ་ཚོགས་ཀྱི་འགྲེམས་སྟོན་ཞིག་གོ་སྒྲིག་ཞུས་ཡོད་པ་རེད་

འགྲེམས་སྟོན་དེའི་དམིགས་ཡུལ་ནི་བོད་མིའི་སྒྱུ་རྩལ་གྱི་རྣམ་དཔྱོད་ལས་སྐྲུན་པའི་དངོས་པོ་དེ་དག་འཚོང་འགྲེམས་བརྒྱུད་དར་སྤེལ་གཏོང་ཐབས་ཡིན་པ་རེད་ འགྲེམས་སྟོན་དེའི་ནང་ལག་ཤེས་དང་སྐུ་ཐང་སོགས་རི་མོའི་སྒྱུ་རྩལ་གྱི་ཐོན་སྐྱེད་དང་ བོད་ཀྱི་གསོ་བ་རིག་པའི་གཞུང་ལུགས་གཞིར་བཟུང་གི་ སྨན་རྩའི་རིགས་ལས་བཟོས་པའི་གསོལ་སྨན་དང་ བསང་དང་ སྤོས་ རུམ་གདན་ རྫས་སྦྱོར་བྱས་པ་ལས་བཟོས་པ་མ་ཡིན་པར་རང་བཞིན་གྱི་ཟས་རིགས་ དེ་བཞིན་མགྲོན་ཁང་དང་ཡུལ་བསྐོར་སྤྲོ་འཆམ་ཁེ་ལས་ཞབས་ཞུ་སོགས་ཀྱི་ལས་རིགས་ཁག་ཀྱང་འགྲེམས་སྟོན་བྱས་ཡོད་པ་རེད་

དམིགས་བསལ་ཅན་གྱི་ལག་ཤེས་ཐོན་སྐྱེད་འགྲེམས་སྟོན་གནང་མཁན་གཅིག་ནི་Tara Tibet Beadsཟེར་བས་Muranoཞེས་པའི་ཤེལ་གྱི་རིགས་ལས་བཟོས་པའི་ཕྲེང་བ་འདྲ་མིན་སྣ་ཚོགས་དང་ བཞུགས་སྒར་རྡ་རམ་ས་ལིའི་ཉེ་འཁྲིས་ནོར་བུ་གླིང་གའི་བཟོ་བཀོད་དང་ Potala Publications ཞེས་པས་བོད་དང་བོད་མིའི་རིག་གཞུང་སྐོར་དཔེ་དེབ་སྣ་ཚོགས་ཡང་རྒྱ་གར་བ་དང་ཕྱི་རྒྱལ་གྱི་མི་རིགས་ཚོར་འགྲེམས་སྟོན་གནང་ཡོད་པ་རེད།