ཨ་མདོ་རྔ་པ་ཁུལ་ལོ་གསར་མ་བཏང་བར་ཞི་རྒོལ་སྤེལ་བ།

༄༅༎མདོ་སྨད་ཨ་མདོ་རྔ་པའི་ནང་ཁ་ས་བོད་ཀྱི་ལོ་གསར་ཚེས་གཅིག་གི་ཉིན་བོད་མི་ཚོས་ལོ་གསར་མ་བཏང་བར་འཚེ་མེད་ཞི་བའི་ངོ་རྒོལ་གྱི་ ལས་འགུལ་རྣམ་པར་མངོན་པ་ཞིག་སྤེལ་ཏེ་རྒྱ་ནག་གཞུང་གི་བོད་ནང་དྲག་པོའི་བཙན་གནོན་གྱི་སྲིད་བྱུས་ལ་ངོ་རྒོལ་ཤུགས་ཆེ་ཞིག་གནང་ཡོད་འདུག

དེ་ཡང་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་དོན་ལ་གཞིགས་ན་ ལོ་གསར་ཚེས་གཅིག་གི་ཉིན་དགེ་འདུན་པ་དང་མང་ཚོགས་བཅས་མི་མང་༤༠༠་ལྷག་པས་རྔ་པའི་ཁྲོམ་གཞུང་དུ་འདུ་འཛོམས་ཀྱིས་ཞལ་འདོན་དབུ་བཙུགས་དང་སྦྲགས་ ལོ་གསར་གྱི་ཞལ་གཏོགས་ཀྱི་ཚབ་རྩམ་པ་སྐམ་པོ་བསྒམ་སྟེ་སྔ་ལོ་༢༠༠༨དང་༢༠༠༩བཅས་སུ་རྒྱ་ནག་གཞུང་གི་དྲག་གནོན་འོག་འདས་གྲོངས་སུ་གྱུར་བའི་བོད་རིགས་རྒྱལ་གཅེས་དཔའ་བོ་དཔའ་མོ་རྣམས་ལ་དྲན་གསོའི་མྱ་ངན་ཞུས་ཡོད་འདུག

ངོ་རྒོལ་ནང་བཞུགས་མཁན་གྱི་དགེ་འདུན་པ་རྣམས་ནི་རྔ་པ་ཀིརྟི་དགོན་པ་དང་བསེ་ཉིད་དགོན་པ་ནས་ཡིན་པ་དང་ ཀི་རྟི་དགོན་པའི་ཆོས་ལུགས་དོ་དམ་ཁང་གི་འགན་འཛིན་བདུད་འདུལ་སྤྲུལ་སྐུ་བཅས་ཀྱིས་དགེ་འདུན་པ་རྣམས་ལ་ངོ་རྒོལ་གྱི་ལས་འགུལ་མཚམས་འཇོག་གིས་གྲྭ་ཚང་ལ་ཕྱིར་ལོག་ཡོང་བའི་རེ་འདུན་བཏོན་ཀྱང་དགེ་འདུན་པ་རྣམས་ཀྱིས་གསན་འཇོག་གནང་མེད་པ་དང་ རྗེས་སུ་དགེ་འདུན་པ་རྣམས་གང་ལྟར་ཅི་ནས་དགོན་པར་ཕྱིར་ལོག་དགོས་པའི་བཙན་བཀའ་བྱུང་མཚམས་སེར་སྐྱ་མང་ཚོགས་མང་པོ་ཞིག་གིས་མུ་མཐུད་ཞི་བའི་ངོ་རྒོལ་ནང་མཉམ་བཞུགས་ཀྱིས་ངོ་རྒོལ་གནང་ཡོད་འདུག གནས་ཚུལ་ཐོན་ཁོངས་ལ་གཞིགས་ན་རྒྱ་ནག་གཞུང་གི་ཉེན་རྟོག་པ་སྟོང་ཕྲག་ལྷག་གིས་བོད་མི་ཚོ་མཐའ་བསྐོར་གྱིས་མང་ཚོགས་ཀྱི་ངོ་རྒོལ་གྱི་ལས་འགུལ་དེ་གཞི་རྒྱ་ཆེ་རུ་མ་འགྲོ་བའི་ཆེད་དམ་བསྒྲགས་དང་དེ་བཞིན་ངོ་རྒོལ་གྱི་གནས་ཚུལ་དང་འདྲ་དཔར་བཅས་པ་ཕྱི་བསྒྲགས་མི་ཡོང་བའི་ཆེད་རྒྱ་ནག་གཞུང་གི་ཉེན་རྟོག་པ་ཚོས་བོད་མི་ཚོའི་ལག་དཔར་འཁྱེར་བྱེད་ཁ་དཔར་སོགས་བཙན་ཁྲོག་བྱས་ཡོད་འདུག