བསྟན་འཛིན་ཕུན་ཚོགས་ལགས་འདས་གྲོངས་གྱུར་བ།

༄༅༎བོད་ཆབ་མདོ་ཀརྨ་ཤང་དུ་སྐུ་ལུས་མེར་བསྲེག་བཏང་ནས་རྒྱ་ནག་གཞུང་ལ་ངོ་རྒོལ་གནང་མཁན་བསྟན་འཛིན་ཕུན་ཚོགས་ལགས་རང་ལུས་མེར་བསྲེག་བཏང་རྗེས་དྲག་སྐྱེད་མ་བྱུང་བར་འདས་གྲོངས་སུ་གྱུར་ཡོད་པའི་སྐོར་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་འཁོད་འདུག 
ཕྱི་ལོ་ཉིས་སྟོང་བཅུ་གཅིག་ལོའི་ཕྱི་ཟླ་བཅུ་གཉིས་པའི་ཚེས་༡ཉིན་ཆབ་མདོ་ཀརྨ་ཤང་དུ་རང་ལུས་མེར་བསྲེག་བཏང་ནས་རྒྱ་ནག་གཞུང་ལ་ངོརྒོལ་གནང་མཁན་རོང་ཚ་བསྟན་འཛིན་ཕུན་ཚོགས་ལགས་ ཕྱི་ལོ་༢༠༡༡ཟླ་བ་༡༢པའི་ཚེས་༦ཉིན་ཆབ་མདོ་སྨན་ཁང་དུ་འདས་གྲོངས་སུ་གྱུར་ཡོད་ཡོད་པ་དང་ ས་གནས་འབྲེལ་ཡོད་ཀྱིས་ཁོང་གྲོངས་ཏེ་དེ་རིང་ཉིན་བཞི་འགྲོ་བཞིན་ཡོད་ཚུལ་བརྗོད་ནས་ དགོན་སྡེ་ཁག་ལ་བསྔོ་རྟེན་འབུལ་བཞིན་ཡོད་འདུག ཕྱི་ཚེས་༨ཉིན་བོད་མི་ཁག་ཅིག་སྨན་ཁང་དུ་ཕྱིན་ནས་ཁོང་གྲོངས་ཡོད་པའི་གནས་ཚུལ་འདུག་པ་ལྟར་ཕུང་པོ་རྩིས་སྤྲོད་དགོས་གནས་ཤོད་སྐབས་ འབྲེལ་ཡོད་སྨན་ཁང་གི་ལས་བྱེད་ནས་ཕུང་པོ་ནང་མི་ལ་སྤྲད་ཚར་ཟིན་སྐོར་བཤད་ཡོད་འདུག་ཀྱང་  དོན་དངོས་ཕུང་པོ་ད་དུང་རྩིས་སྤྲོད་བྱས་མིན་འདུག  
བསྟན་འཛིན་ཕུན་ཚོགས་ལགས་ཀྱིས་ལུས་པོ་མེར་བསྲེག་གཏོང་སྐབས་ ༧རྒྱལ་བ་བསྟན་འཛིན་རྒྱ་མཚོ་མཁྱེན་ཞེས་པའི་འབོད་ཚིག་སྒྲོག་བཞིན་ཡོད་པ་ཉེ་འཁོར་གྱི་བོད་མི་རཙམ་མ་ཟད་ ལྷ་ས་ནས་ཁ་པར་གཏོང་མཁན་ཞིག་གིས་ཁ་པར་ནང་ནས་ཀྱང་གོ་ཐུབ་ཡོད་འདུག ད་དུང་གནས་ཚུལ་ཡོང་ཁུངས་ཁག་ཅིག་ལྟར་ན་ ཁོང་གི་བཟའ་ཟླ་ཡང་འཛིན་བཟུང་གིས་བཀག་ཉར་བྱས་ཡོད་པ་དང་ ནང་མི་གཞན་རྣམས་ལ་ཡང་དམིགས་བསལ་དམ་བསྒྲགས་བྱེད་བཞིན་ཡོད་པའི་སྐོར་འཁོད་འདུག