བོད་མིའི་ཐོག་གདུག་རྩུབ་ཀྱི་བྱ་སྤྱོད་ཇི་ལྟར་སྤེལ་བཞིན་པ་ངོ་སྤྲོད།

༄༅༎བཙན་བྱོལ་བོད་མི་རྣམས་ཀྱིས་བོད་ནང་རྒྱ་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་པ་དེ་རྒྱལ་སྤྱིའི་སྤྱི་ཚོགས་ཐོག་ངོ་སྤྲོད་གནང་ཡོད་པ་རེད། བཙན་བྱོལ་བོད་མིའི་སྒྲིག་འཛུགས་ཀྱི་མགྲིན་ཚབ་པས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་འཐུས་མི་ཁག་ཅིག་རྒྱ་གར་གྱི་རྒྱལ་ས་ལྡི་ལིའི་ནང་ཡོད་པའི་ཕྱི་རྒྱལ་གྱི་གཞུང་ཚབ་ཁག་ལ་བོད་ནང་རྒྱ་གཞུང་གིས་བོད་མིའི་ཐོག་གདུག་རྩུབ་ཀྱི་བྱ་སྤྱོད་ཇི་ལྟར་སྤེལ་བཞིན་པ་ཁག་ངོ་སྤྲོད་གནང་བར་ཕེབས་ཡོད་པ་རེད་ཅེས་གསུང་འདུག བཙན་བྱོལ་བོད་མིའི་སྒྲིག་འཛུགས་ཀྱི་མགྲིན་ཚབ་པས་ད་ཐེངས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་འཐུས་མི་རྣམས་ཀྱི་རྒྱ་གར་གྱི་རྒྱལ་ས་ལྡི་ལིའི་ནང་གི་ལས་དོན་དེར་ཕྱི་རྒྱལ་གྱི་གཞུང་ཚབ་ཁག་ཅིག་གི་དཔོན་རིགས་རྣམས་དང་མཇལ་མོལ་གནང་བ་དེའི་ཁོངས་ཨ་རི་དང་དབྱིན་ཇི་ ཕེ་རན་སི། ཌེན་མཀ། ནོར་ལྦེ། དང་ ཕིན་ལེནདྲ་བཅས་པའི་རྒྱལ་ཁབ་ཁག་གི་གཞུང་ཚབ་པའི་དཔོན་རིགས་རྣམས་དང་མཇལ་མོལ་གནང་སྐོར་གསུང་འདུག   ཡང་བཙན་བྱོལ་བོད་མིའི་སྒྲིག་འཛུགས་ཀྱི་མགྲིན་ཚབ་པས་གོང་ཞུས་བོད་མི་མང་སྤྱི་འཐུས་ཀྱི་སྐུ་ཚབ་འཐུས་མི་དེ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུ་འཁྲིད་ཡོད་སྐོར་དང་ཁོང་རྣམས་པས་ཡོ་རོབ་སྤྱི་མཐུན་གྱི་དཔོན་རིགས་རྣམས་དང་མཇལ་མོལ་གནང་ཡོད་སྐོར་གསུང་འདུག བཙན་བྱོལ་བོད་མིའི་སྒྲིག་འཛུགས་ཀྱིས་ད་བར་བོད་ནང་བོད་མི་གྲངས་ ༩ ཡིས་རྒྱ་གཞུང་གི་བོད་ནང་གི་སྲིད་བྱུས་ལ་ངོ་རྒོལ་ཆེད་རང་ལུས་མེར་བསྲེག་བཏང་ཡོད་པ་དང་ཁོང་རྣམས་ཀྱིས་བོད་ནང་རང་དབང་དགོས་པ་དང་༸གོང་ས་ཏ་ལའི་བླ་མ་མཆོག་བོད་ནང་གདན་འདྲེན་ཞུ་དགོས་པའི་དགོས་འདུན་བཏོན་ཡོད་སྐོར་གསུང་འདུག གོང་ཞུས་བོད་མི་རང་ལུས་མེར་བསྲེག་བཏང་གནང་མཁན་གྲངས་དགུ་བྱུང་བ་ནས་ལྔ་རྐྱེན་ལམ་དུ་ཕྱིན་ཡོད་པ་རེད། ཁ་སྔོན་ཕྱི་ཚེས་ ༡༩ ཉིན་འཛམ་གླིང་གི་ས་ཕྱོགས་གང་སར་བོད་ནང་གི་བོད་མི་རྣམས་ཀྱི་དལྟ་མྱོང་བཞིན་པའི་དཀའ་སྡུག་ལ་གདུང་སེམས་མཉམ་སྐྱེས་མཚོན་ཆེད་ངོ་རྒོལ་སྐད་འབོད་སོགས་ཀྱི་ལས་འགུལ་དུ་མ་སྤེལ་དང་སྤེལ་བཞིན་ཡོད་པ་རེད༎