མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐོག་བོད་ནང་གི་འགྲོ་བ་མིའི་ཐོབ་ཐང་གླེང་འདུག

དེང་སྐབས་སུད་སུའི་གྲོང་ཁྱེར་ཇི་ནི་ཝར་ཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་ཐེངས་༤༩པའི་ཐོག ཕྱི་ཚེས་༢༢ཉིན་དབྱིན་ཡུལ་གྱི་སྐུ་ཚབ་ཀྱིས་རྒྱ་ནག་གཞུང་གིས་བོད་ནང་གི་སློབ་གྲྭ་ཁག་མི་ཉུང་བའི་ནང་བོད་མིའི་ངོ་བོ་དང་འབྲེལ་བའི་ཆོས་དང་། རིག་གཞུང་སྐད་ཡིག་དང་བཅས་པ་རྩ་མེད་བཟོ་རྒྱུའི་ལས་གཞི་སྤེལ་བཞིན་པ་གསུངས་ནས། བོད་ཀྱི་གནད་དོན་ཐོག་རྒྱལ་སྤྱིའི་ནང་མུ་མཐུད་དུ་དོ་ཁུར་བྱེད་དགོས་པའི་གནས་སྟངས་འོག་ཡོད་པ་གསུངས་འདུག་ལ། དེ་བཞིན་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་གྱིས། རྒྱ་ནག་གཞུང་གིས་བོད་ནང་གི་བོད་མིའི་ཆོས་དད་རང་དབང་དང་། སྨྲ་བརྗོད་རང་དབང་ཐོག་དམ་དྲག་ཤུགས་ཆེ་བྱེད་བཞིན་པའི་སྲིད་ཇུས་ལ་བློ་འཚབ་ཡོད་པའི་སྐྱོན་བརྗོད་དང་སྦྲགས་རྒྱ་ནག་གཞུང་གིས་ འཛིན་བཟུང་བཀག་ཉར་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་པ་དང་། གསར་འགོད་པ། ཁྲིམས་རྩོད་པ་རྣམས་གློད་བཀྲོལ་གཏོང་དགོས་པའི་རེ་སྐུལ་ཞུས་འདུག
དེའི་སྔོན་འགྲོ་བ་མིའི་ཐོབ་ཐང་ལྷན་ཁང་གི་སྤྱི་ཁྱབ་པ་ལྕམ་ (Michelle Bachelet)་ལགས་ཀྱིས། རིང་མིན་ཕྱི་ཟླ་༥པའི་ནང་ཁོང་རྒྱ་ནག་ཏུ་གཞུང་འབྲེལ་ཕྱོགས་ཕེབས་གནང་རྒྱུ་དང་། ཤིན་ཅིང་ངམ་ཤར་ཏུར་ཀི་སི་ཐན་ཁུལ་དུ་འགྲོ་བ་མིའི་ཐོབ་ཐང་གི་གནས་སྟངས་ལ་རྟོགས་ཞིབ་སྐོར་བསྐྱོད་གནང་རྒྱུ་ཡིན་པ་གསལ་བསྒྲགས་གནང་ཡོད་པ་རེད། འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཞུགས་རྒྱལ་ཁབ་ཁག་གི་སྐུ་ཚབ་རྣམས་ཀྱིས། སྤྱི་ཁྱབ་པ་མཆོག་ད་བར་རྒྱ་ནག་ནང་རྟོགས་ཞིབ་ཀྱི་སྐོར་བསྐྱོད་ནར་འགྱངས་བྱུང་བར་སྐྱོན་བརྗོད་དང་སྦྲགས། ད་རེས་དངོས་སུ་ཕྱོགས་བསྐྱོད་འདི་བཞིན་མིང་ཙམ་མ་ཡིན་པར་འགྲོ་བ་མིའི་ཐོབ་ཐང་གི་གནས་སྟངས་ཡག་པོ་མེད་པའི་ས་ཁུལ་ཁག་ནང་། རྒྱ་ནག་གཞུང་གི་བཀག་སྡོམ་སོགས་གང་ཡང་མེད་པར་རང་དབང་ལྡན་པའི་རྟོགས་ཞིབ་ཐུབ་པ་ཞིག་དགོས་གལ་ཤིན་ཏུ་ཆེ་བ་ཡིན་པ་ནན་བརྗོད་གནང་ཡོད་པ་རེད། འོན་ཀྱང་ལོ་རྒྱུས་ཐོག་བོད་དང་ཤིན་ཅིང་སོགས་ཀྱི་ས་ཁུལ་དུ་ཕྱི་ཕྱོགས་ཀྱི་སྐུ་ཚབ་མི་སྣ་སྐོར་བསྐྱོད་སྐབས། རྒྱ་ནག་གཞུང་ནས་དོ་དམ་སྟངས་འཛིན་ནན་མོ་བྱས་མྱོང་ཡོད་པ་རེད།
དེའི་ཐད་ཨ་རིའི་ནང་ཡོད་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་(Human Rights Watch)་ཡི་རྒྱ་ནག་ལས་དོན་གྱི་འགན་འཛིན་ལྕམ་(Sophie Richardson)་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་སྤྱི་ཁྱབ་མཆོག་རྒྱ་ནག་ཏུ་ཕེབས་སྐབས། ཁོང་གིས་དངོས་ཡོད་གནས་སྟངས་ལ་ལྟ་འདོད་དང་མཐོང་འདོད་ཡོད་ནའང་སྔོན་གྱི་ཉམས་མྱོང་ལས་རྒྱ་ནག་གཞུང་གི་བཀག་སྡོམ་སྟངས་འཛིན་འོག་མཐོང་དཀའ་ངེས་རེད་ཅེས་དང་། སེམས་ཁྲལ་བྱེད་དགོས་པ་ཞིག་ལ་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་ཐད་འགྲོ་བ་མིའི་ཐོབ་ཐང་ལྷན་ཁང་གི་སྤྱི་ཁྱབ་མཆོག་གིས་གླེང་སློང་དེ་ཙམ་མེད་པར་ཁུ་སིམ་ངང་བསྡད་ཡོད། འོན་ཀྱང་། ད་རེས་ཀྱི་གཟིགས་སྐོར་སྐབས་གལ་ཏེ། ཁོང་བོད་ནང་སྐོར་བསྐྱོད་ཐུབ་པའི་དབང་དུ་བཏང་ནའང་ཤིང་ཅིན་ནང་བཞིན་རྒྱ་ནག་གཞུང་གི་བཀག་སྡོམ་སྟངས་འཛིན་འོག་དངོས་ཡོད་གནས་སྟངས་མཐོང་དཀའ་ངེས་རེད་ལ། བོད་མི་ཚོའི་ངོས་ནས་ཀྱང་རྒྱ་ནག་གི་འཁོན་ལན་ལ་འཇིགས་སྣང་གིས་རང་དབང་གི་སྒོ་ནས་ཁོང་ལ་གནས་སྟངས་ངོ་མ་ཇི་ཡིན་སྐད་ཆ་བཤད་རྒྱུར་དོགས་ཟོན་མི་བྱེད་ཐབས་མེད་ཀྱི་གནས་སྟངས་ཆགས་ཡོད་པ་གསུངས་བྱུང་།
འགྲོ་བ་མིའི་ཐོབ་ཐང་ལྷན་ཚོགས་ཀྱི་སྤྱི་ཁྱབ་(Michelle Bachelet)་ལགས་ཀྱིས་ཁོང་རྒྱ་ནག་ཏུ་རྟོགས་ཞིབ་སྐོར་བསྐྱོད་རིང་ཤིང་ཅིང་དུ་རྟོགས་ཞིབ་ཕེབས་གཏན་མཁེལ་ཡོད་པ་གསུངས་ཡོད་ཀྱང་བོད་ནང་ཕྱོགས་ཕེབས་གནང་རྒྱུ་ཡིན་མིན་སྐོར་གང་ཡང་གསུངས་མེད་པ་རེད།
ལྷན་ཚོགས་ཐོག་གཞུང་འབྲེལ་མིན་པའི་ཚོགས་པ་ཁག་གི་གཏམ་བཤད་ཀྱི་ལས་རིམ་སྐབས། ཡོ་རོབ་ཁུལ་གྱི་རྒྱལ་སྤྱིའི་བོད་དོན་ལས་འགུལ་ཁང་གི་(Melanie Blondelle)་ལགས་ཀྱིས། རྒྱ་ནག་གཞུང་གིས་འཆར་གཞི་དང་ལྡན་པའི་ཐོག་ནས་གཅིག་རྗེས་གཉིས་མཐུད་དུ་བོད་ཀྱི་སྤྱི་ཚོགས་ཀྱི་ངོ་བོ་རིག་གཞུང་ཇི་ལྟར་རྩ་མེད་གཏོང་ཐབས་བྱེད་བཞིན་པའི་དཔང་རྟགས་གནས་ལུགས་སྙན་སེང་ཞུས་ནས། རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གིས་རྒྱ་གཞུང་ལ་བོད་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་བའི་བྱ་སྤྱོད་ཐད་འགན་ཁུར་ལེན་དགོས་པ་བཟོ་དགོས་པའི་རེ་སྐུལ་གནང་འདུག
གཞན་ཡང་རྒྱལ་ཚོགས་ཀྱི་ལྷན་ཚོགས་སར་སུད་སི་སྐུ་ཚབ་དོན་གཅོད་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་གྱི་སྙན་ཐོའི་ནང་དོན་སྙན་སེང་ཞུས་པའི་ཐོག ཁོང་གིས་ཉེ་ལམ་བོད་ཀྱི་རྒྱལ་ས་ལྷ་སར་རང་ལོ་༢༥སོན་པའི་བོད་པའི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱིས་རྒྱ་གཞུང་གི་དྲག་པོའི་སྲིད་བྱུས་ལ་ངོ་རྒོལ་ཆེད་རང་ལུས་མེར་བསྲེགས་བཏང་བ་གཙོས་སྔ་རྗེས་སུ་ཁྱོན་བོད་མི་༡༥༦གིས་རང་ལུས་མེར་བསྲེགས་བཏང་བའི་གནས་ལུགས་དང་། ལྷག་པར་དུ་རྒྱ་གཞུང་གིས་འཛིན་བཟུང་བཙོན་འཇུག་བྱས་པའི་བོད་མིའི་ཆབ་སྲིད་བཙོན་པ་སྒོ་ཤེས་རབ་རྒྱ་མཚོ་ལགས་དང་། ཨ་ཉག་སེང་སྒྲ་ལགས། དེ་བཞིན་རྡོ་རྗེ་བཀྲིས་ལགས་བཅས་ཀྱིས་གནད་དོན་ཐོག་ལྷན་ཚོགས་ནས་ཞིབ་འཇུག་ནན་པོ་གནང་དགོས་པ་དང་། དེ་ཐེངས་རྒྱལ་ཚོགས་ཀྱི་སྤྱི་ཁྱབ་མཆོག་བོད་ནང་ཕེབས་ནས་ཞིབ་འཇུག་སྐོར་བསྐྱོད་གནང་དགོས་པའི་འབོད་སྐུལ་གནང་ཡོད་འདུག
སུད་སིའི་གྲོང་ཁྱེར་ཇི་ནི་ཝར་ཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་༤༩པ་དེ་བཞིན་ཟླ་བ་སྔོན་མའི་ཚེས་༢༨ཉིན་འགོ་འཛུགས་ཀྱིས་ཕྱི་ཟླ་༤པའི་ཚེས་༡ཉིན་བར་ཚོགས་ཀྱི་ཡོད་པ་རེད།

གསར་འགོད་པ། དོན་གྲུབ་རྣམ་རྒྱལ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲ་ཐོག་སྤེལ་མཁན། ཀླུ་འབུམ།