སྤྱི་ཟུར་འཇིགས་མེད་འབྱུང་གནས་ལགས་ལྡི་ལི་བོད་ཀྱི་སྐུ་ཚབ་དོན་གཅོད་དུ་བསྐོ་གཞག་གནང་འདུག

དབུས་བོད་མིའི་སྒྲིག་འཛུགས་ཀྱི་བཀའ་དྲུང་ཡིག་ཚང་གིས་ཕྱི་ཚེས་༢༥ཉིན་གསལ་བསྒྲགས་ཤིག་སྤེལ་བའི་ནང་། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་བཅུ་དགུ་པའི་ནང་གསེས་༡པོའི་དགོངས་དོན། ཕྱི་རྒྱལ་སྐུ་ཚབ་དོན་གཅོད་རྣམས་སྲིད་སྐྱོང་མཆོག་དང་། བཀའ་བློན་ཚང་འཛོམས་ཞིབ་གྲོས་དྲག་འདེམས་ཀྱིས་བཀའ་ཤག་ནས་བསྐོ་འཛུགས་གནང་བར་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་བསྩལ་རྒྱུ། ཞེས་གསལ་བ་ལྟར་སྤྱི་ཟུར་འཇིགས་མེད་འབྱུང་གནས་ལགས་ལྡི་ལི་སྐུ་ཚབ་དོན་གཅོད་དུ་བསྐོ་བཞག་གནང་བ་དང་། ཡིག་ཆ་སྒྲུབ་མཚམས་ལས་ཁུར་འགོ་འཛུགས་གནང་རྒྱུ་རེད་ཅེས་འཁོད་འདུག
ཨེ་ཤེ་ཡ་རང་དབང་རླུང་འཕྲིན་ཁང་གིས་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་། ལྡི་ལི་སྐུ་ཚབ་དོན་གཅོད་ཁང་ལ་འབྲེལ་བ་ཞུས་པར། ལན་འདེབས་གང་ཡང་གནང་མ་བྱུང་། སྤྱི་ཟུར་འཇིགས་མེད་འབྱུང་གནས་ལགས་ད་ལྟའི་ཆར་ཨ་མི་རི་ཀའི་ནང་དུ་གནས་བཞུགས་གནང་བཞིན་ཡོད་ཅིང་། མི་ཚེ་ཧྲིལ་པོ་བོད་མིའི་སྒྲིག་འདུགས་ཀྱི་སྲི་ཞུ་བའི་ལས་བྱེད་གནང་མཐར། ནང་སྲིད་དྲུང་ཆེའི་ཐུགས་འགན་བཞེས་ཞིང་། དབུས་གཙང་སྤྱི་འཐུས་ཀྱི་ལས་འཁུར་ཡང་གནང་མྱོང་ཡོད་པ་རེད།
སྤྱི་ཟུར་འཇིགས་མེད་འབྱུང་གནས་ལགས་ནི། ཕྱི་ལོ་༡༩༦༢ལོར་བོད་ནས་བྲོས་བྱོལ་གྱིས་ལ་དྭགས་སུ་འབྱོར་རྗེས། མ་སུ་རི་དང་པན་ཇི་མ་རི་སློབ་གྲྭར་ཕེབས་ཡོད་པ་དང་། ༡༩༧༡ལོར་སྦེལ་ཀོབ་བདེ་སླར་གཞིས་ཆགས་སུ་འབྱོར་ནས་གཞིས་གྲོང་གི་སྤྱི་མི། རང་བདེན་ཚོགས་ཆུང་དང་། མཉམ་འཐུས། ས་གནས་གཞོན་ནུའི་ཚོགས་གཙོ་བགྲེས་གཞོན། ཉིན་སློབ་ཀྱི་དགེ་རྒན། དགེ་ལུགས་མ་དགོན་གྱི་ལས་དྲུང། མཉམ་འབྲེལ་འཕྲུལ་རྨོས་འགན་འཛིན་བཅས་ཀྱི་ལས་འཁུར་ཞུས་ཤིང། ༡༩༨༣ལོ་ནས་ཐོག་མར་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་ཀྱི་མཉམ་འབྲེལ་དྲུང་ཆེ་དང་། རིམ་པས་ཧོན་སུར་རབ་རྒྱས་གླིང་གཞིས་ཆགས་ཀྱི་ས་གནས་འགོ་འཛིན། སྦེང་ལོར་ལྷོ་ཕྱོགས་གཞིས་སྤྱི། ༡༩༩༥ནས་༢༠༠༨ཟླ་༨ཚེས་༣༡བར་ནང་སྲིད་ལས་ཁུངས་ཀྱི་དྲུང་ཆེ་ཆུང་དང་རྩིས་ཞིབ་དྲུང་ཆེ་བཅས་ཀྱི་ལས་འཁུར་ཞུས་མྱོང་ཡོད་འདུག

གསར་འགོད་པ། ཀེ་ཐོ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།