བོད་རྒྱལ་ཡོངས་རྐང་རྩེད་སྤོ་ལོའི་རུ་ཁག་རྒྱལ་སྤྱིའི་རྩེད་འགྲན་ནང་ཞུགས་རྒྱུ་རེད།

བོད་ཀྱི་རྐང་རྩེད་སྤོ་ལོའི་རུ་ཁག་༢༠༡༨་ལོའི་ཁོ་ནི་ཧྥ་ (CONIFA)་འཛམ་གླིང་རྐང་རྩེད་སྤོ་ལོའི་རྩེད་འགྲན་ནང་མཉམ་ཞུགས་གནང་རྒྱུ་ཡིན་འདུག
དེ་ཡང་ཕྱི་ཟླ་ ༩ ་ཚེས་ ༡ ་ཉིན་དབུས་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་བར་ལྟར་ན། རང་དབང་ཅན་གྱི་རྐང་རྩེད་སྤོ་ལོའི་མཐུན་ཚོགས་(CONIFA)་ཡིས་གོ་སྒྲིག་གནང་བའི་ ༢༠༡༨ ་ལོའི་འཛམ་གླིང་རྐང་རྩེད་སྤོ་ལོའི་འགྲན་བསྡུར་(CONIFA World Football Cup 2018)་ཞེས་པ་དེ་དབྱིན་ཡུལ་གྱི་རྒྱལ་ས་ལོན་ཊོན་ནང་ཚོགས་གཏན་འཁེལ་ཡོད་པ་དང་། རྩེད་འགྲན་གོ་སྒྲིག་ཚོགས་ཆུང་ནས་དམིགས་བསལ་མགྲོན་འབོད་གནང་བ་ལྟར་བོད་རྒྱལ་ཡོངས་རྐང་རྩེད་སྤོ་ལོའི་རུ་ཁག་རྩེད་འགྲན་དེའི་ནང་མཉམ་ཞུགས་བྱ་རྒྱུ་ཡིན་འདུག
ཕྱི་ལོ་ ༢༠༡༨ ་ལོའི་ཕྱི་ཟླ་ ༥ ་ཚེས་ ༣༡ ་ནས་ཕྱི་ཟླ་ ༦ ་ཚེས་ ༩ ་བར་དབྱིན་ཡུལ་གྱི་རྒྱལ་ས་ལོན་ཊོན་ནང་ཚོགས་རྒྱུའི་ ༢༠༡༨ ་ལོའི་ (CONIFA)་འཛམ་གླིང་རྐང་རྩེད་སྤོ་ལོའི་རྩེད་འགྲན་དེའི་ནང་བོད་རྒྱལ་ཡོངས་རྐང་རྩེད་སྤོ་ལོའི་རུ་ཁག་དང་། གཞན་ཞི་བདེ་རྒྱ་མཚོའི་གླིང་ཕྲན་ཁུལ་གྱི་རྒྱལ་ཁབ་Oceania་ནས་རུ་ཁག་གཅིག་དང་། བྱང་ཨ་རི་ནས་རུ་ཁག་གཅིག ཨ་ཧྥི་རི་ཀ་དང་ཨེ་ཤི་ཡ་ནས་རུ་ཁག་གཉིས་རེ། ཡུ་རོབ་ནས་རུ་ཁག་ལྔ་སོགས་གླིང་ཆེན་བཞི་ནས་ཁྱོན་རྐང་རྩེད་སྤོ་ལོའི་རུ་ཁག་ ༡༦ ་ཙམ་མཉམ་ཞུགས་གནང་རྒྱུ་ཡིན་འདུག
གོང་ཞུས་ CONIFA་ཞེས་པའི་རང་དབང་ཅན་གྱི་རྐང་རྩེད་སྤོ་ལོའི་མཐུན་ཚོགས་དེ་བཞིན་འཛམ་གླིང་རྐང་རྩེད་སྤོ་ལོའི་སྒྲིག་འཛུགས་ FIFA་ནང་དེབ་སྐྱེལ་བྱས་པ་དང་། དེ་ནི་ FIFA་ཕུད་པའི་རྐང་སྤོལ་རྩེད་འགྲན་རྒྱ་ཆེ་ཤོས་ཤིག་ཡིན་པ་རེད།
གཞན་འདི་ལོའི་ཕྱི་ཟླ་ ༧ ་པའི་ནང་ཨ་རི་བ་བུད་མེད་ཁེ་སི་ཡིས་སྣེ་ཁྲིད་པའི་བཙན་བྱོལ་བོད་མིའི་བུད་མེད་ཀྱི་རྐང་རྩེད་སྤོ་ལོའི་རུ་ཁག་ཞིག་ཁེ་ཎ་ཊིའི་གྲོང་ཁྱེར་Vancouver་ནང་ཚོགས་པའི་རྒྱལ་སྤྱིའི་རྐང་རྩེད་སྤོ་ལོའི་དུས་སྟོན་འགྲན་བསྡུར་ཐོག་མཉམ་ཞུགས་གནང་ཡོད་པ་རེད།

གསར་འགོད་པ་བསོད་ནམས་ལྷ་མོ།