རྒྱལ་ཁབ་གསུམ་བར་བྱང་ཀོ་རི་ཡའི་གནད་དོན་ཐད་བཀའ་བསྡུར།

༄༅༎ཟླ་བ་སྔོན་མའི་ཚེས་༢༣ཉིན་ཧོ་ཀོ་རི་ཡའི་བདག་དབང་འོག་ཡོད་པའི་མཚོ་གླིང་ཞིག་གི་ཐོག་བྱང་ཀོ་རི་ཡས་དྲག་རྒོལ་བྱས་པའི་ཛ་དྲག་གི་གནད་དོན་སྐོར་བཀའ་བསྡུར་གནང་ཆེད། བདུན་ཕྲག་རྗེས་མ་ཨ་རིའི་རྒྱལ་ས་ལྦ་ཤིང་ཀྲོན་དུ། ཨ་རི་དང༌། ཉི་ཧོང༌། ལྷོ་ཀོ་རི་ཡ་བཅས་པའི་ཕྱི་སྲིད་བློན་ཆེན་རྣམ་པའི་ལྷན་འཛོམས་ཤིག་གནང་རྒྱུ་ཡིན་འདུག

དེ་ཡང་གནས་ཚུལ་ནང་འགྲེལ་བརྗོད་བྱས་པར་གཞིགས་ན། ལྷོ་བྱང་ཀོ་རི་ཡ་གཉིས་ཀྱི་དབར་ད་ལམ་གྱི་འཁོན་འཁྲུག་དེ་བྱུང་བའི་རྗེས། རྒྱལ་སྤྱིའི་ཡུལ་གྲུ་ཕལ་མོ་ཆེ་བས་བྱང་ཀོ་རི་ཡའི་བྱ་སྤྱོད་ལ་ངོ་རྒོལ་སྐྱོན་བརྗོད་ཤུགས་ཆེ་བྱས་ཡོད་ཀྱང༌། རྒྱ་ནག་ཕྱོགས་ནས། བྱང་ཀོ་རི་ཡ་ལ་ཐད་ཀར་སྐྱོན་བརྗོད་མ་བྱས་པ་མ་ཟད། ད་ལམ་གྱི་འཁོན་འཁྲུག་དེ་དང༌། དེ་བཞིན་བྱང་ཀོ་རི་ཡས་ཉེ་ལམ་རྡུལ་ཕྲན་ནུས་ཤུགས་མཁོ་འདོན་གྱི་ལས་གཞི་རྒྱ་བསྐྱེད་གཏོང་གི་ཡོད་པའི་གསལ་བསྒྲགས་བྱས་པའི་དཀའ་རྙོག་སེལ་ཐབས་སུ། ལྷོ་བྱང་ཀོ་རི་ཡ་གཉིས་དང༌། ཨ་རི། ཉི་ཧོང༌། ར་ཤེ་ཡ་བཅས་པའི་སྐུ་ཚབ་རྣམ་པ་བསྐྱར་དུ་ལྷན་འཛོམས་ཀྱིས་གྲོས་མོལ་གནང་དགོས་པའི་བསམ་ཚུལ་སྟོན་པ་དེར། ཨ་རི་དང༌། ཉི་ཧོང༌། ལྷོ་ཀོ་རི་གཞུང་གིས་ཁས་ལེན་མ་བྱས་པར། རྒྱལ་ཁབ་དེ་དག་གསུམ་གྱི་ཕྱི་སྲིད་བློན་ཆེན་རྣམ་པ་བདུན་ཕྲག་རྗེས་མར་ཟུར་མཇལ་གྱིས། ཉེ་ལམ་ལྷོ་ཀོ་རི་ཡའི་མཚོ་གླིང་ཐོག་བྱང་ཀོ་རི་ཡས་དྲག་རྒོལ་བྱས་པའི་གནད་དོན་དེ་དང་། དེ་བཞིན་བྱང་ཀོ་རི་ཡས་རྡུལ་ཕྲན་ལས་གཞི་ཞི་རྒྱ་ཆེ་རུ་གཏོང་གི་ཡོད་པའི་གསལ་བསྒྲགས་བྱས་པ་དེར་གདོང་ལེན་བྱེད་ཕྱོགས་སོགས་ཀྱི་སྐོར་གོ་བསྡུར་གནང་འཆར་ཡོད་པའི་གནས་ཚུལ་ཐོན་འདུག།