༸གོང་ས་མཆོག་ར་ཇ་སི་ཐན་དུ་ཆིབས་བསྒྱུར་གནང་རྒྱུ།

༄༅༎བོད་ཀྱི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རྒྱ་གར་གྱི་ནུབ་ཕྱོགས་ར་ཇ་སི་ཐན་མངའ་སྡེའི་ནང་ཆིབས་བསྒྱུར་གྱི་མཛད་འཆར་དང་བསྟུན་ནས་བཙན་བྱོལ་བོད་གཞུང་གི་ཕྱི་དྲིལ་ལས་ཁང་གི་འགྲེམས་སྟོན་ཚན་པས་རྒྱ་གར་ཡུལ་མི་ཚོར་བོད་དོན་གོ་རྟོགས་སྤེལ་ཐབས་ཆེད་དུ་བོད་ཀྱི་པར་རིས་སོགས་འགྲེམས་སྟོན་གོ་སྒྲིག་ཞུ་རྒྱུ་ཡིན་པ་རེད།

དེ་ཡང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོན་འདོད་རྒུ་གླིང་བོད་མིའི་གཞིས་ཆགས་ནང་གི་མཛད་འཆར་ཁག་གྲུབ་པའི་རྗེས། ཟླ་བ་འདིའི་ཕྱི་ཚེས་༨ ནས་༡༢ བར་རྒྱ་གར་གྱི་ར་ཇ་སི་ཐན་མངའ་སྡེའི་ནང་ཆིབས་བསྒྱུར་སྐབས། བོད་ཀྱི་འགྲེམས་སྟོན་ཁང་གིས་ཕྱི་ཚེས་༧ ནས་༡༠ བར་གྲོང་ཁྱེར་ཇོརྡ་པུར་ནང་བོད་ཀྱི་འགྲེམས་སྟོན་གོ་སྒྲིག་ཞུ་རྒྱུ་ཡིན་ཞིང༌། འགྲེམས་སྟོན་ནི། བཙན་བྱོལ་ནང་མི་ལོ་ལྔ་བཅུའི་རིང་བོད་ཀྱི་ཐོུང་མ་ཡིན་པའི་ཆོས་དང༌། རིག་གཞུང༌། སྐད་ཡིག མི་རིགས་ཀྱི་ངོ་བོ་རྣམས་མི་ཉམས་རྒྱུན་འཛིན་ཇི་ལྟར་བྱས་ཡོད་པའི་སྐོར་པར་གྱི་འགྲེམས་སྟོན་བྱ་རྒྱུ་མ་ཟད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཚེའི་ལོ་རྒྱུས་ཀྱི་དངོས་བྱུང་གློག་བརྙན་སོགས་གོ་སྒྲིག་ཞུ་རྒྱུ་ཡིན་པ་རེད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མངའ་སྡེ་དེའི་ནང་བཞུགས་རྒྱུན་རིང་གྲོང་ཁྱེར་ཇོརྡ་པུར་ནང་དུ་ཕྱི་ཚེས་༩ དང་༡༠ ཉིན་གཉིས་རིང་དེ་སྔའི་རྒྱ་གར་གྱི་དཔལ་ནྰ་ལེནྡྲའི་ནང་ཆོས་བསླབ་པ་རྒྱུན་འཛིན་སྐོར་དང༌། དེ་བཞིན་ཤེས་ཡོན། འཛམ་གླིང་ཞི་བདེའི་བརྗོད་གཞིའི་ཐོག་བཀའ་སློབ་གནང་རྒྱུ་དང༌། ཕྱི་ཚེས་དགུའི་ཕྱི་དྲོ་རཇ་མ་ཏ་ཀི་རིཤ་ན་ཀུ་མ་རི་ ཞེས་པའི་བོུའི་སློབ་གྲྭའི་ནང་ཆིབས་བསྒྱུར་གྱིས་བཀའ་སློབ་བསྩལ་རྒྱུ་ཡིན་ཞིང༌།  དེ་ནས་ཕྱི་ཚེས་༡༠ ཉིན་བཞུགས་གནས་ཊའཇ་མ་ཧེལ་ མགྲོན་ཁང་གི་ཚོགས་ཁང་ནང་དུ་ས་གནས་དེར་ཡོད་པའི་བོད་མི་སུད་ཀྲར་ཚོང་མཁན་དང༌། རྒྱ་གར་ཡུལ་མི་ཚོར་ལམ་སྟོན་བཀའ་སློབ་བསྩལ་རྒྱུ་དང༌། སྐབས་དེར་མངའ་སྡེའི་སྤྱི་ཁྱབ་བློན་ཆེན་ཨ་ཤོཀ་གེཀ་ལེཏ་དང༌། རྒྱལ་པོ་གའཇ་སིང་ དེ་བཞིན་ཇོརྡ་པུར་ཡི་གྲོང་སྡེའི་སྤྱི་ཁྱབ་པ་། གྲོས་ཚོགས་ཀྱི་འཐུས་མི་སོགས་མཉམ་ཞུགས་གནང་གི་ཡོད་པ་རེད། དེ་རྗེས་ཕྱི་ཚེས་༡༢ ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ར་ཇ་སི་ཐན་མངའ་སྡེའི་རྒྱལ་ས་ཇའེ་པུར་དུ་སྦེར་ཕུཏ་མཐོ་རིམ་སློབ་གྲའི་ནང་ཆིབས་བསྒྱུར་གྱིས་བཀའ་སློབ་གནང་རྒྱུའི་མཛད་འཆར་ཡོད་པ་རེད།།