༸གོང་ས་མཆོག་ཡོ་རོབ་ཀྱི་ཡུལ་གྲུ་ཁག་ཅིག་ལ་ཆིབས་བསྒྱུར།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྦེལ་ཇེམ་སྲིད་བློན་ཨི་ལྦེསི་ལེར་མེ་མཆོག་མཇལ་འཕྲད་གནང་ཡོད་པ་རེད།

ད་ལམ་༸གོང་ས་མཆོག་ཡོ་རོབ་ཀྱི་ཡུལ་གྲུ་ཁག་ཅིག་ལ་ཆིབས་བསྒྱུར་དང་རྒྱལ་ཁབ་ཁག་ཅིག་གི་དབུ་ཁྲིད་རྣམས་དང་མཇལ་འཕྲད་གནང་བར་བརྟེན་རྒྱ་ནག་གཞུང་ཁོང་ཁྲོ་རབ་ཏུ་འབར་ཏེ་སྔོན་གཏན་འཁེལ་བའི་ཡོ་རོབ་མཉམ་སྦྲེལ་སྒྲིག་འཛུགས་དང་རྒྱ་ནག་གི་འགོ་ཁྲིད་དབར་ལྷན་ཚོགས་གནང་རྒྱུ་ཕྱི་བཤོལ་གནང་ཡོད་པ་རེད། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཚན་སྙན་འཛམ་གླིང་ཁྱོན་ཡོངས་སུ་དར་ཁྱབ་འགྲོ་བཞིན་པ་དང་ཆབས་ཅིག་ས་ཕྱོགས་གང་དུ་ཕེབས་ཀྱང་གང་གི་མཛད་པར་བསྔགས་བརྗོད་དང་རྗེས་སུ་ཡི་རང་ཞུ་བཞིན་པ་མ་ཟད་དབུ་ཁྲིད་དང་གྲགས་ཅན་མི་སྣ་ཁག་གིས་མཇལ་འཕྲད་ཞུ་གི་ཡོད་པ་རེད། འོན་ཀྱང་རྒྱ་ནག་གཞུང་གིས་༸གོང་ས་མཆོག་དང་མཇལ་འཕྲད་ཞུས་ན་རྒྱ་ནག་མཉམ་དུ་ཕྱི་འབྲེལ་ལ་གནོད་སྐྱོན་ཡོང་གཞི་ཆགས་ཀྱི་ཡོད་པའི་ཉེན་བརྡ་གཏོང་གི་ཡོད་པ་རེད། ༸གོང་ས་མཆོག་གིས་ཅེཀ་སྤྱི་མཐུན་རྒྱལ་ཁབ་ཏུ་ཞབས་སོར་འཁོད་སྐབས་སྲིད་འཛིན་ཟུར་པ་དང་ནོ་བེལ་གཟེངས་རྟགས་བཞེས་མི་གྲགས་ཅན་ལྦཁ་ལེལྦན་ཧ་ལྦེལ་དང་སྲིད་བློན་མིའི་རེཀ་ཀྲོ་པོ་ལ་ནེཀ་སོ་སོར་མཇལ་འཕྲད་གནང་ཡོད་པ་རེད། ༸གོང་ས་མཆོག་གིས་བོད་ཆོལ་ཁ་གསུམ་ལ་མིང་དོན་མཚུངས་པའི་རང་སྐྱོང་གི་གནས་བབ་ཅིག་འབྱུང་ཐབས་གནང་བཞིན་པ་དང་དེ་ཡང་དབུ་མའི་ལམ་གྱི་སྲིད་བྱུས་བཟུང་ནས་རྒྱ་བོད་གཉིས་ཕན་གྱི་ཐབས་ལམ་ཞིག་འཚོལ་ཐབས་གནང་བཞིན་པ་རེད།