རྒྱ་གར་གྲངས་ཉུང་མི་རིགས་ཀྱི་ལྷན་ཚོགས་ཐོག་བཀའ་སློབ།

༄༅༎སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་རྒྱ་གར་རྒྱལ་སྤྱིའི་ལྟེ་གནས་སུ་ཕྱི་ཚེས་༡༠འི་སྔ་དྲོ་རྒྱ་གར་རྒྱལ་ཡོངས་གྲངས་ཉུང་མི་རིགས་ཀྱི་ལྷན་ཚོགས་ཐོག་བཀའ་སློབ་གསུང་བཤད་སྩལ་ཡོད་འདུག

༧གོང་ས་༧སྐྱབས་མགོན་ཆེན་པོ་མཆོག་ནས་སྩལ་བའི་བཀའ་སློབ་ནང་རྒྱ་གར་ནང་སྲོལ་རྒྱུན་གྱི་རིགས་གཞུང་ཞི་བདེ་དང་ཆོས་ལུགས་ཀྱི་རྨང་གཞི་གཏན་པོ་ཡོད་པར་བརྟེན་ནས་རྒྱ་གར་དེ་བཞིན་འཛམ་གླིང་ནང་ནས་དམངས་གཙོའི་ལམ་ལུགས་ཤུགས་ཆེ་ཤོས་ཀྱི་རྒྱལ་ཁབ་ཅིག་ཡིན་པ་མ་ཟད་ ཁྱིམ་མཚེས་ཡུལ་གྲུ་ཁག་དང་བསྡུར་ན་ རྒྱ་གར་ནང་དམངས་གཙོའི་ལམ་ལུགས་འོག་ཞི་བདེ་བརྟན་ལྷིང་གི་རྣམ་པ་ཞིག་མངོན་ཐུབ་ཀྱི་ཡོད་པ་བཀའ་སྩལ་ཡོད་ཅིང་ དེ་བཞིན་༧གོང་ས་༧སྐྱབས་མགོན་ཆེན་པོ་མཆོག་ནས་ཡོངས་ཁྱབ་རང་བཞིན་གྱིས་ནང་སེམས་ཀྱི་ཀུན་སྤྱོད་འཁྱེར་སྟངས་ཐོག་དམིགས་གསལ་ནན་བརྗོད་གནང་བར་ མི་ཁག་ཅིག་གིས་བཟང་སྤྱོད་ཀྱི་གཞི་རྩ་ནི་ཆོས་ལུགས་ཀྱི་རིན་ཐང་ལ་གཞི་བཅོལ་བ་ཞིག་ཡིན་པར་ངོས་འཛིན་བྱེད་ཀྱི་ཡོད་པ་ནི་ནོར་འཁྲུལ་ཡིན་ཞིང་ འཇིག་རྟེན་ཁྱིམ་པའི་བཟང་སྤྱོད་སྤེལ་རྒྱུ་དེ་་ང་ཚོ་འགྲོ་བ་མིའི་རིགས་ཚང་མས་རང་སོ་སའི་ཉམས་མྱོང་དང་རྣམ་པ་ཀུན་དུ་ནས་རང་དང་གཞན་ལ་འགྱུར་བ་གཏོང་ཐབས་བྱ་རྒྱུ་དེ་ཡིན་ཞིང་ བཟང་སྤྱོད་ཀྱི་ཀུན་སློང་མེད་ཚེ་རྒྱ་ནག་དང་རྒྱ་གར་གྱི་སྤྱི་ཚོགས་ནང་ལྐོག་ཟ་རུལ་སུངས་ཀྱི་གནས་ཚུལ་ཚབས་ཆེ་ཡོད་པ་ལྟར་ཁྱབ་མདལ་འགྲོ་རྒྱུ་ཡིན་པ་དང་   འཛམ་གླིང་ནང་རྙོག་དྲ་མང་པོ་ཞིག་ནི་མི་ཁག་ཅིག་གིས་་ཀུན་སློན་ངན་པ་བཟུང་ཏེ་བྱ་སྤྱོད་སྤེལ་གྱི་ཡོད་པར་བརྟེན་ནས་དཀའ་ངལ་མང་པོ་ཞིག་ཡོང་གི་ཡོད་པ་དང་ དེ་དག་སེལ་རྒྱུར་བློ་སྦྱོད་བྱས་ཏེ་ཀུན་སློང་བཟང་པོ་བསྐྲུན་ཐབས་བྱ་རྒྱུ་དེ་གལ་ཆེ་སོགས་བཀའ་སྩལ་གནང་མཛད་འདུག