སྲིད་སྐྱོང་མཆོག་ལ་དྭགས་སུ་མགྲོན་འབོད་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་རྒྱ་གར་ལ་དྭགས་དང་ལྡི་ལི་བཅས་སུ་ཕྱོགས་ཕེབས་གནང་འཆར་འདུག
དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ལ་དྭགས་སུ་ཕྱོགས་ཕེབས་ཀྱིས་ཁུལ་དེའི་བོད་མི་ཚོས་སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་ཉིན་བརྟན་བཞུགས་སྟར་འབུལ་གྱི་མཛད་སྒོའི་ཐོག་ཞུགས་རྒྱུ་ཡིན་པ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་སྤེལ་འདུག
སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་ཟླ་བ་འདིའི་ཚེས ༢༨ ཉིན་ནས་ལ་དྭགས་སུ་ཆིབས་ཞལ་བསྒྱུར་ནས་ཁུལ་དེ་གར་ཟླ་ངོ་གཅིག་ཙམ་གྱི་རིང་མཛད་རིམ་འདྲ་མིན་སྐྱོང་བཞིན་ཡོད་པ་ལྟར། སྤྱི་ཟླ ༧ ཚེས ༦ ཉིན་༧གོང་ས་མཆོག་ཕྱི་ལུགས་ལྟར་དགོང་གྲངས ༨༢ ལ་ཕེབས་པའི་དགའ་སྟོན་རྟེན་འབྲེལ་གྱི་མཛད་སྒོ་དང་བསྟུན་ལ་དྭགས་ཞི་བའི་ཚལ་རུ་ལ་དྭགས་བོད་རིགས་ཚོགས་པས་བཀོད་སྒྲིག་འོག་སྤྱི་ནོར༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུའི་མཛད་སྒོར་སྲིད་སྐྱོང་བློ་བཟང་སེང་གེ་མཆོག་མགྲོན་འབོད་གནང་བ་ལྟར། ཟླ་༧་ཚེས་༢་ཉིན་རྡ་ས་ནས་ཕེབས་ཐོན་གྱིས་རྒྱ་གར་གྱི་རྒྱལ་ས་ལྡི་ལིར་ཕེབས་འབྱོར་གནང་རྗེས། སྤྱི་ཚེས་ ༣ ཉིན། ལྡི་ལི་ནས་ལ་དྭགས་ཁུལ་དུ་ཕེབས་ཐོན་གནང་རྒྱུ་ཡིན་འདུག
དེ་རྗེས་སྲིད་སྐྱོང་མཆོག་ཉིན་གཉིས་རིང་ལ་དྭགས་ཁུལ་དུ་གཞུང་འབྲེལ་ལས་དོན་ཁག་ཅིག་གྲུབ་རྗེས། སྤྱི་ཟླ་ ༧ ཚེས་ ༩ ཉིན་ལ་དྭགས་ནས་ལྡི་ལིར་ཕེབས་འབྱོར་གྱིས་ཚེས་ ༩ ནས་ ༡༡ བར་ལྡི་ལིར་གནད་ཡོད་མི་སྣ་ཁག་དང་མཇལ་འཕྲད་གནང་འཆར་འདུག

གསར་འགོད་པ་བསོད་ནམས་ལྷ་མོ།