ཤེ་རེན་སི་ཀྲོན་ལ་ཧྲང་ཧད་གློག་བརྙན་དུས་སྟོན་ལ་མགྲོན་འབོད་བྱས་མི་འདུག

༄༅༎ཨ་མི་རི་ཀའི་གློག་བརྙན་འཁྲབ་སྟོན་གྲགས་ཅན་ལྕམ་ཤེ་རོན་སི་ཀྲོན་ཡིས་རྒྱ་ནག་ནང་ས་ཡོམ་རྒྱབ་པ་དེ་ནི་རྒྱ་ནག་གཞུང་གིས་བོད་མིའི་བཙན་དབང་བྱས་པས་ལས་འབྲས་འཁོར་བའི་སྐོར་གསུངས་པའི་རྐྱེན་གྱིས་ ཁོང་འདི་ལོའི་ཧྲང་ཧ་ཡེ་རྒྱལ་སྤྱིའི་གློག་བརྙན་དུས་ཆེན་ནང་མགྲོན་འབོད་གནང་འཆར་མི་འདུག་

རྒྱ་ནག་གི་གྲོང་ཁྱེར་ཧྲང་ཧ་ཡེ་ནང་ཚོགས་རྒྱུའི་རྒྱལ་སྤྱིའི་གློག་བརྙན་དུས་ཆེན་གོ་སྒྲིག་ཞུ་མཁན་ཚོགས་པའི་མགྲིན་ཚབ་པ་ཐང་པིང་ནས་སྔ་ལོ་ཧྲང་ཧ་ཡེ་ནང་རྒྱལ་སྤྱིའི་གློག་བརྙན་དུས་ཆེན་ཚོགས་སྐབས་ཤེ་རོན་སི་ཀྲོན་གདན་ཞུ་ཞུས་ཀྱང་ འདི་ལོའི་ཡང་བསྐྱར་མགྲོན་འབོད་ཞུ་རྒྱུ་མིན་ལུགས་དང་ གློག་བརྙན་དུས་ཆེན་གོ་སྒྲིག་ཞུ་མཁན་ཚོགས་པས་ཤེ་རོན་སི་ཀྲོན་ལ་ཡི་གེ་ཞིག་བཏང་བའི་ནང་ ཁོང་ནས་གོང་ཞུས་གཏམ་བཤད་གནང་བར་ངོ་རྒོལ་ཡོད་པ་དང་དགོངས་སེལ་ཞུ་དགོས་པའི་དགོས་འདུན་བཏོན་ཡོད་ལུགས་བརྗོད་འདུག དེའི་གོང་ལ་ཤེ་རོན་སི་ཀྲོན་ནས་ཁོང་གིས་གོང་ཞུས་གཏམ་བཤད་གནང་བ་དེས་རྒྱ་ནག་མི་མང་ལ་ཕོག་ཐུག་བཏང་བར་སྙིང་ཐག་པ་ནས་དགོངས་དག་ཞུས་པ་མ་ཟད་ ས་ཡོམ་གྱི་ངལ་སེལ་ལས་དོན་ནང་ཁོང་ལྷན་བཞུགས་གནང་རྒྱུའི་དང་བླང་ཡང་འདོན་གནང་ཡོད་པའི་གནས་ཚུལ་འདུག༎