ཟས་བཅད་ཀྱི་དགོས་འདུན་དྲུང་ཆེེར་སྙན་སེང་ཞུ་རྒྱུའི་ཁས་ལེན་།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་མཐོ་རིམ་དཔོན་རིགས་ཤིག་གིས། བོད་ཀྱི་གཞོན་ནུ་ལྷན་ཚོགས་ཀྱིས་འགོ་ཁྲིད་པའི་ཟས་བཅད་ངོ་རྒོལ་གྱི་ལས་འགུལ་སྤེལ་ཏེ་འཛམ་གླིང་མཉམ་འབྲེལ་རྒྱལ་ཚོགས་ལ་བོད་དོན་དོན་ཚན་ཁག་ཅིག་བཏོན་པ་དེའི་ཐད་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་མཆོག་དང་འགྲོ་བ་མིའི་ཐོབ་ཐང་ལྷན་ཁང་གཉིས་ལ་སྙན་གསེང་ཞུ་རྒྱུ་ཁས་ལེན་གནང་ཡོད་པ་རེད།
དེ་ཡང་ཨ་རིའི་གྲོང་ཁྱེར་ནེའུ་ཡོག་གི་འཛམ་གླིང་མཉམ་འབྲེལ་རྒྱལ་ཚོགས་མདུན་དུ་བོད་ཀྱི་གཞོན་ནུ་ལྷན་ཚོགས་ཀྱིས་འགོཁྲིད་པའི་ཟས་བཅད་ངོ་རྒོལ་གྱི་ལས་འགུལ་འགོ་བཙུགས་ཏེ་ཉིན་གྲངས་༢༠ ཕྱིན་པའི་ཉིན་ཏེ་ཕྱི་ཟླ་གསུམ་པའི་ཚེས་༡༢ རེས་གཟའ་ཟླ་བའི་ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཕྱག་རོགས་སྐུ་ཞབས་ཨའེ་ལྦན་སི་མོ་ནོ་ལྦིཆ་མཆོག་ཟས་བཅད་ངོ་རྒོལ་ལས་འགུལ་ནང་མཉམ་ཞུགས་གནང་མཁན་བོད་མི་གསུམ་ཐུག་འཕྲད་དུ་ཕེབས་ཏེ། ཟས་བཅད་ངོ་རྒོལ་གནང་མཁན་བོད་མི་གསུམ་པོའི་སྐུ་གཟུགས་ཀྱི་གནས་སྟངས་ལ་ཧ་ཅང་གི་ཐུགས་འཚབ་ཆེན་པོ་ཡོད་པའི་བཀའ་མོལ་གསུང་པ་མ་ཟད། ཁོང་རང་ཉིད་ནས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་སྦན་ཀི་མུན་མཆོག་དང་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་སྐུ་ཞབས་ན་ལྦ་ནེ་ཐེམ་པི་ལའེ་གཉིས་དང་ཐད་ཀར་འབྲེལ་གཏུགས་ཞུས་ཏེ་ཁྱེད་རྣམ་པའི་དགོས་འདུན་ཁག་སྙན་གསེང་ཞུ་རྒྱུའི་ཁས་ལེན་གནང་ཡོད་པ་རེད། ད་དུང་སྐུ་ཞབས་ཨའེ་ལྦེན་མཆོག་གིས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཁོང་གི་ལས་ཁུངས་སུ་གདན་ཞུ་གནང་སྟེ། བོད་ནང་གི་གནས་སྟངས་དང༌། ཟས་བཅད་ངོ་རྒོལ་གྱི་ལས་འགུལ་སྐོར་ལ་བཀའ་བསྡུར་གནང་ཡོད་ཅིང༌། སྐབས་དེར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས། རྒྱ་ནག་གཞུང་ཕྱོགས་ནས་བོད་ནང་དམག་ཁྲིམས་བསྡམས་པ་ལྟ་བུའི་དྲག་གནོན་གྱི་བྱ་ཕྱོགས་ལག་བསྟར་བྱས་ཏེ་བོད་ནང་གི་གནས་སྟངས་ཧ་ཅང་གི་ཇེ་སྡུག་དང་ཛ་དྲག་ཏུ་འགྲོ་གི་ཡོད་པ་དང༌། བོད་ནང་གི་བོད་མི་ཚོའི་ཚེ་སྲོག་འཕྲོ་བརླག་ཏུ་མི་འགྲོ་བར་འཛམ་གླིང་མཉམ་འབྲེལ་རྒྱལ་ཚོགས་ནས་འཕྲལ་དུ་བར་འདུམ་གྱི་འགན་འཁུར་བཞེས་དགོས་པའི་བསྐྱར་དུ་འབོད་སྐུལ་ནན་པོ་ཞུས་ཡོད་པ་རེད།