ར་ཤི་ཡའི་ཁུལ་སྨྱུངས་གནས་གསོལ་འདེབས་ལས་འགུལ་སྤེལ་བ།

༄༅༎བཙན་བྱོལ་བོད་གཞུང་མང་ཛ་དྲག་ལས་འགུལ་ཚོགས་ཆུང་གི་རེ་བསྐུལ་ལྟར་ན་ འཛམ་གླིང་གི་ཡུལ་གྲུ་གང་སའི་ནང་ ཕྱི་ཟླ་བརྒྱད་པའི་ཚེས་ ༣༠ ཉིན་ བོད་དོན་བདེན་མཐའ་གསལ་ཆེད་དང་ འཛམ་གླིང་ཁྱོན་ཡོངས་ཀྱི་ནང་ཞི་བདེ་འབྱུང་ཐབས་སོགས་ཀྱི་ཆེད་ཚོུད་ ༡༢ རིང་གི་སྨྱུང་གནས་གསོལ་འདེབས་ཀྱི་ལས་རིམ་གཞི་རྒྱ་ཆེ་བ་ཞིག་སྤེལ་ཡོད་པ་ལྟར་ ར་ཤི་ཡའི་ས་ཁུལ་འདྲ་མིན་གྱི་ནང་ལ་ཡང་སྨྱུང་གནས་གསོལ་འདེབས་ཀྱི་ལས་འགུལ་དེ་སྤེལ་ཡོད་འདུག

བཙན་བྱོལ་བོད་གཞུང་ར་ཤི་ཡའི་སྐུ་ཚབ་དོན་གཅོད་ཁང་ནས་ཕྱི་ཟླ་དགུ་པའི་ཚེས་ ༢ ཉིན་གནས་ཚུལ་སྤེལ་བར་གཞིགས་ན་ ར་ཤི་ཡའི་རྒྱལ་ས་ མོ་སི་ཀོའི་ནང་ཡོད་པའི་བླ་མ་ཙོང་ཁ་པའི་ཆོས་ཚོགས་ཀྱི་ནང་མི་གྲངས་ལྔ་བཅུ་སྐོར་མཉམ་འདུས་ཀྱིས་སྔ་དྲོའི་ཚོུད་༡༠པ་ནས་ མཚན་མོའི་ཚོུད་བཅུ་པ་བར་ ༸གོང་ས་༸སྐྱབས་མགོན་ཆེན་པོ་མཆོག་གི་ཞབས་བརྟན་གསོལ་འདེབས་དང་ སློབ་དཔོན་པད་མ་འབྱུང་གནས་ཀྱི་ཐུགས་དམ་གནད་བསྐུལ་བཛྲ་གུ་རུ་དང་ མ་ཎི་ཡིག་དྲུག་ལ་སོགས་པའི་ཞལ་འདོན་གྲངས་གསོག་གནང་འདུག

དེ་ཉིན་འབྲས་སྤུངས་སྒོ་མང་གྲ་ཚང་གི་དགེ་འདུན་པ་ཁག་གཅིག་ནས་ མོ་སི་ཀོའི་རོའེ་རིཁ་འགྲེམས་སྟོན་ཁང་དུ་རྡུལ་མཚོན་གྱི་དཀྱིལ་འཁོར་ཞིག་ཀྱང་བཞེངས་སྒྲུབ་གནང་ཡོད་པ་རེད་

ཡང་ར་ཤི་ཡི་མངས་ཁོངས་ནང་པའི་ཡུལ་གྲུ་ ཁལ་མུཀ་ཀི་ཡའི་རྒྱལ་ས་ ཨེ་ལི་སའི་ནང་ཡོད་པའི་དགའ་ལྡན་བཤད་སྒྲུབ་གླིང་དགོན་པའི་ནང་ མི་གྲངས་ལྔ་བརྒྱ་སྐོར་ནས་སྨྱུང་གནས་གསོལ་འདེབས་གནང་བ་མ་ཟད་ དགོང་དྲོ་མར་མེའི་ཁྲོམ་སྐོར་ཞིག་ཀྱང་གོ་བསྒྲིགས་གནང་འདུག་ཅིང་ ས་གནས་ཀྱི་གསར་འགྱུར་བརྒྱུད་ལམ་མང་པོའི་ནང་གནས་ཚུལ་འདི་བཀོད་སྤེལ་བྱས་ཡོད་འདུག

དེ་བཞིན་སྦུ་རི་ཡཏ་གྱི་རྒྱལ་ས་ཨུ་ལན་ཨུ་རྡའི་ནང་ཡོད་པའི་བླ་མ་ཡེ་ཤེས་བློ་གྲོས་རིན་པོ་ཆེའི་ཆོས་ཚོགས་དང་ དགེ་བཤེས་བྱམས་པ་འཕྲིན་ལས་ལགས་ཀྱི་སྒྲོལ་ལྗང་ཆོས་ཚོགས་སོགས་ནས་ཀྱང་སྨྱུང་གནས་གསོལ་འདེབས་ཀྱི་ལས་འགུལ་དེའི་ནང་མཉམ་ཞུགས་གནང་འདུག་ལ་ ར་ཤི་ཡའི་ཁྱབ་ཁོངས་ཡུལ་གྲུ་ ཏུ་ལྦའི་ནང་ལ་ཡང་དེ་མཚུངས་ལས་འགུལ་དེ་སྤེལ་འདུག།