ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་དང་། རྒྱ་སྐད། ལཱའོ་སྐད་ཀྱིས་རླུང་འཕྲིན་རླབས་ཐུང་བརྒྱུད་གནས་ཚུལ་སྤེལ་མཚམས་འཇོག་དགོས་བྱུང་ཡོད།

RFA/Charlie Dharapak

ཨེ་ཤེ་ཡ་རང་དབང་རླུང་འཕྲིན་ཁང་གི་རླུང་འཕྲིན་བརྒྱུད་གཏོང་བྱེད་ས་ཉུང་དུ་ཕྱིན་པའི་རྐྱེན་གྱིས་རླུང་འཕྲིན་རླབས་ཐུང་བརྒྱུད་ལམ་ (Shortwave Radio) གྱི་དུས་ཚོད་ཉུང་དུ་བཏང་ཡོད། དེས་ན། བོད་སྐད་དང་། རྒྱ་སྐད། (Mandarin) ལཱའོ་སྐད་ (Lao) བཅས་ཀྱི་རླུང་འཕྲིན་རླབས་ཐུང་བརྒྱུད་ལམ་མཚམས་འཇོག་བྱས་པར་དགོངས་སེལ་ཞུ་རྒྱུ་ཡིན། འབར་མ་ (Burmese) དང་། ཁེ་མར། (Khmer) ཀོ་རི་ཡ། (Korean) ཡུ་གུར་ (Uyghur) བཅས་ལ་རླུང་འཕྲིན་བརྒྱུད་ལམ་ཉུང་ངུ་ལས་མེད། འོན་ཀྱང་ང་ཚོས་དྲ་རྒྱ་དང་སྤྱི་ཚོགས་དྲ་ལམ་ཐོག་གནས་ཚུལ་ཚད་བཀག་མུ་མཐུད་འགྲེམས་སྤེལ་བྱེད་བཞིན་ཡོད།

བོད་སྐད་རླུང་འཕྲིན་གསན་མཁན་རྣམས་ལ་ཞུ་རྒྱུར། རླུང་འཕྲིན་རླབས་ཐུང་མཚམས་འཇོག་བྱས་ཀྱང་། ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་དྲ་ཚིགས་དང་། ཡུ་ཀྲུབ་ (YouTube) ། དེ་བཞིན་པོཊ་ཀཱས་(Podcast)བརྒྱུད་ལམ་གཞན་ཐོག་ཉིན་ལྟར་དགོང་དྲོ་ཆུ་ཚོད་ ༦:༣༠ (IST) དམ། ཡང་ན་ལྷ་སའི་དགོང་དྲོ་ཆུ་ཚོད་ ༩ ཐོག་གལ་གནད་ཆེ་བའི་གནས་ཚུལ་གྱི་སྒྲ་འཇུག་ལས་རིམ་མུ་མཐུད་བརྒྱུད་སྤེལ་ཞུ་རྒྱུ་ཡིན། ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ཡང་ལས་བྱེད་ཉུང་འཕྲིས་ལས་དོན་བྱེད་བཞིན་ཡོད་པས། དྲ་ཚིགས་དང་སྤྱི་ཚོགས་དྲ་ལམ་བརྒྱུད་གལ་གནད་ཆེ་བའི་གནས་ཚུལ་ཁག་གཙོ་འདོན་གྱིས་ཡི་གེ་དང་། སྒྲ་འཇུག བརྙན་པར་ལམ་ནས་འགྲེམས་སྤེལ་ཞུ་བཞིན་ཡོད།

རྣམ་པ་ཚོས་ཨེ་ཤེ་ཡ་རང་དབང་རླུང་འཕྲིན་ཁང་ལ་མུ་མཐུད་ནས་རྒྱབ་སྐྱོར་དང་། ཡིད་ཆེས་གནང་བར་ཐུགས་རྗེ་ཆེ་ཞུ་རྒྱུ་ཡིན།