རྒྱ་གར་དང་བལ་ཡུལ་ས་མཚམས་ཁུལ་དུ་ས་ཡོམ།

༄༅༎རྒྱ་གར་དང་བལ་ཡུལ་གཉིས་ཀྱི་ས་མཚམས་སུ་ཁ་ས་རེས་གཟའ་ཉི་མའི་ཉིན་ས་ཡོམ་བརྒྱབ་པའི་ནང་བོད་ཁུལ་མི་གྲངས་༧ལ་སྲོག་སྐྱོན་དང། ༢༢ལ་རྨས་སྐྱོན་ཕོག་ཡོད་སྐོར་ རྒྱ་ནག་གཞུང་འབྲེལ་ ཤིན་ཧྭ་གསར་ལས་ཁང་གིས་དེ་རིང་གནས་ཚུལ་སྤེལ་འདུག།
རྒྱ་ནག་རྒྱལ་ཡོངས་རླུང་འཕྲིན་ཐོག་གནས་ཚུལ་རྒྱང་བསྲིང་བྱས་པར་གཞིགས་ན། ཤུགས་ཚད་རིམ་པ་༦དང་ཚག་༩བྱས་པའི་ས་ཡོམས་དེའི་གཡོ་འགུལ་བོད་ནང་ཐེབས་ཡོད་ཅིང༌། གྲོ་མོ་ཁུལ་གྱི་ཐག་རིང་ཡ་དྲུང་ས་གནས་ནང་གི་ཁང་པ་མང་པོ་བརྡིབ་སྐྱོན་ཤོར་ཡོད་པ་དང༌། གློག་ཀྱང་ཆད་ཡོད་པ་རེད། ས་ཡོམ་དངོས་གཞི་དེ་ཁ་ས་བརྒྱབ་ཡོད་པ་དང༌། དེ་རིང་བསྐྱར་དུ་འགུལ་ལྷག་ཐེངས་བཞི་ཙམ་བྱུང་ཡོད་པ་དང༌། རྒྱ་ནག་གི་སྲོག་སྐྱོབ་ལས་དོན་རུ་ཁག་ཁུལ་དེར་འཕྲལ་མ་ཉིད་དུ་བཏང་ནས་གནོད་སྐྱོན་ཇི་ཙམ་ཕྱིན་ཡོད་མེད་རྟོག་ཞིབ་བྱེད་བཞིན་ཡོད་པའི་གནས་ཚུལ་རྒྱང་བསྲིང་བྱས་ཡོད་པ་རེད། ཁ་སའི་ས་ཡོམ་དེའི་ནང་རྒྱ་གར་ཁུལ་མི་གྲངས་༢༥ཙམ་འདས་གྲོངས་ཕྱིན་ཡོད་པ་མ་ཟད། བལ་ཡུལ་ནང་དུའང་མི་གྲངས་༥ཙམ་ལ་སྲོག་སྐྱོན་བྱུང་འདུག།
ཁ་སའི་ས་ཡོམ་དེ་བཞིན་འབྲས་ལྗོངས་དང་བལ་ཡུལ་གཉིས་ཀྱི་ས་མཚམས་འཁེལ་སར་རེས་གཟའ་ཉི་མའི་དགོང་འདྲོ་ཆུ་ཚོད་༦པ་ཡོལ་ནས་སྐར་མ་༡༠ཙམ་ལ་རྒྱབ་པའི་རྗེས་། ཁྱིམ་མཚེས་འབྲུག་ནང་དུའང་ས་འགུལ་ཐེབས་ཡོད་པའི་སྐོར་ཨ་རིའི་ས་གཞིས་བརྟག་དཔྱད་ཞིབ་འཇུག་ཁང་གིས་གསུངས་བཞག།