བོད་ཀྱི་གཞོན་ནུའི་ཚོཊ་གཙོ་གཙོས་མི་གྲངས་བརྒྱ་ལྷག་འཇུ་བཟུང་།

ལྡི་ལིར་གསུམ་བཅུའི་དུས་དྲན་གྱི་ལས་འགུལ་སྐབས། ༢༠༡༥།༣།༡༠

ལྡི་ལིར་གསུམ་བཅུའི་དུས་དྲན་གྱི་ལས་འགུལ་སྐབས། ༢༠༡༥།༣།༡༠

རྒྱ་གར་གྱི་རྒྱལ་ས་ལྡི་ལིར་གཞོན་ནུས་རྒྱ་ནག་གཞུང་ཚབ་ཁང་ལ་སྒོ་མཆོངས་ལས་འགུལ་སྤེལ་པ་དང་བལ་ཡུལ་ལ་ཉེན་རྟོག་པས་དམ་དྲག་བྱས་འདུག
དེ་ཡང་ལྡི་ལིར་བོད་མི་ཚོས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་༥༦སྲུང་བརྩི་ཞུས་ཡོད་པ་དང་། རྒྱལ་ས་ལྡི་ལིའི་ནང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཐེ་པས་ཚོགས་མི་སོགས་མི་གྲངས་༡༠༠ལྷག་གིས་ལྡི་ལིའི་རྒྱ་ནག་གཞུང་ཚབ་ཁང་ལ་སྒོ་མཆོངས་ལས་འགུལ་སྤེལ་སྐབས་ལག་ཆ་ཐོགས་པའི་ཉེན་རྟོག་པས་འཛིན་བཟུང་བྱས་ཡོད་པ་རེད། གཟའ་མིག་དམར་ཉིན་རྒྱལ་ས་ལྡི་ལིའི་ནང་ངོ་རྒོལ་བྱེད་མཁན་བོད་མི་ཁག་ཅིག་གི་ངོ་གདོང་དང་ལུས་ཐོག་ལ་བོད་ཀྱི་རྒྱལ་དར་བྲིས་ཡོད་པ་དང། ཡང་ཁག་ཅིག་གིས་ལུས་སྟོད་དུ་གང་ཡང་མ་གྱོན་པ་དང་ཁ་རས་ནག་པོ་རྒྱབ་ཡོད་ཅིང། ཁོང་ཚོས་བོད་ལ་རང་བཙན་དགོས་པའི་སྐད་འབོད་བྱས་པ་མ་ཟད། རྒྱ་ནག་གཞུང་ལ་ངོ་རྒོལ་གྱི་བརྗོད་ཚིག་འཁོད་པའི་རས་དར་འཕྱར་བ་སོགས་བྱས་པའི་རྗེས་ཉེན་རྟོག་པས་ཁོང་ཚོ་དྲུད་འཐེན་བྱས་ཏེ་འཇུ་བཟུང་བྱས་ཡོད་པ་རེད། ངོ་རྒོལ་གནང་མཁན་གྲས་ནས་ལོ་༢༠ཡིན་པའི་ཀུན་དགའ་རྒྱལ་མཚན་ལགས་ཀྱིས་ཧྥ་རན་སི་གསར་འགོད་པར། ང་ཚོས་བོད་དེ་རྒྱ་ནག་ནས་རང་དབང་དགོས་པའི་དགོས་འདུན་བཏོན་གྱི་ཡོད་ལ། ང་ཚོར་དགོས་པ་དེ་ཁོ་ན་ཡིན། ང་ཚོ་རྒྱ་ནག་འོག་ཏུ་བསྡད་འདོད་མེད། རྒྱ་ནག་བོད་ནས་འགྲོ་དགོས་ཞེས་འགྲེལ་བརྗོད་བྱས་ཡོད་པ་རེད། ཕྱོགས་གཞན་ཞིག་ནས་ངོ་རྒོལ་བྱེད་མཁན་ཚོས་སྲུང་སྐྱོབ་དམ་བསྒྲགས་ཆེ་བའི་རྒྱ་ནག་གཞུང་ཚབ་ཁང་གི་རྒྱལ་སྒོ་ལྟེ་བའི་ཕྱོགས་སུ་མདུན་མཆོངས་བྱེད་ཐབས་བྱས་ཡོད་པ་རེད། རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་བྱེད་མཁན་ཧ་ལམ་བོད་མི་༡༠༠ལྷག་ཙམ་འདུ་འཛོམས་བྱུང་ཡོད་པ་དང། དེའི་ནང་དུ་བུད་མེད་མི་ཉུང་བ་ཡང་མཉམ་ཞུགས་བྱས་ཡོད་པ་ཡང་ཉེན་རྟོག་པས་འཇུ་བཟུང་བྱས་འདུག
དེ་བཞིན་བོད་མི་བཙན་བྱོལ་བ་སྟོང་ཕྲག་འགའ་ཤས་གནས་སྡོད་བྱེད་ཡུལ་བལ་ཡུལ་ནང་དུས་རྒྱུན་གསུམ་བཅུའི་དུས་དྲན་སྐབས་ངོ་རྒོལ་གྱི་ལས་འགུལ་རིགས་སྤེལ་སྲོལ་ཡོད་ཀྱང་བལ་ཡུལ་གཞུང་ཕྱོགས་ནས་བོད་མིའི་ཐོག་གནོན་ཤུགས་ཇེ་ཆེར་བཏང་བའི་རྐྱེན་གྱིས་འདི་ལོ་ངོ་རྒོལ་ལས་འགུལ་སྤེལ་ཐུབ་མེད་པ་དང་། བལ་པོའི་ཉེན་རྟོག་པ་མང་པོས་ཕྱི་ལོག་ཏུ་མྱུལ་ཞིབ་བྱེད་བཞིན་ཡོད་པ་མ་ཟད་། བལ་ཡུལ་གཞུང་གིས་སྔ་ས་ནས་བོད་མིའི་སྒེར་ལངས་དུས་དྲན་ཆེད་བོད་དོན་ལས་འགུལ་སྤེལ་མི་ཆོག་པའི་སྔོན་བརྡ་བཏང་ཡོད་འདུག    

གསར་འགོད་པ་ཉི་མ་གཡུ་སྒྲོན།
ཞིབ་ཕྲ་འདི་གའི་གསར་འགོད་པ་བསོད་ནམས་དབང་འདུས་ལགས་ཀྱིས་བཏང་བའི་གནས་ཚུལ་ལ་གསན་རོགས།