བརྐྱངས་ཕྱག་འཚལ་ནས་བོད་དོན་ཞུ་འབོད།

༄༅།  །བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་གསུམ་གྱིས་རྒྱ་གར་གྱི་རྒྱལ་ས་ལྡི་ལིར་ དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་ནས་འདི་རིང་ཉིན་གྲངས་༡༡འགྲོ་གི་ཡོད་པ་དང་།        དབུས་བོད་ཀྱི་གཞོན་ནུའི་ལྷན་ཚོགས་ཀྱི་རྒྱུན་ལས་དཀོན་མཆོག་ཡར་འཕེལ་ལགས་ཀྱིས་སྣེ་ཁྲིད་ཐོག ལྡི་ལི་མཐོ་སློབ་ནང་གི་བོད་མི་གཞོན་སྐྱེས་ཁག་ཅིག་གིས།  ཁ་ས་ཚེས་༡༢ཉིན་སྨོན་ལམ་འདོན་པའི་ཐོག་ལྡི་ལིར་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་ཀྱི་རྒྱལ་སྒོ་བར་བརྐྱངས་ཕྱག་འཚལ་ནས་བོད་དོན་ཞུ་འབོད་བྱས་འདུག

ཁོང་རྣམས་མཉམ་སྦྲེལ་རྒྱལ་ཚོགས་ཀྱི་ལས་ཁུངས་མདུན་དུ་འབྱོར་སྐབས། རྒྱ་གར་ཉེན་རྟོག་པས་བཀག་འགོག་བྱས་སྟབས། ལས་འགུལ་བ་ཚང་མ་དེ་མུར་བསྡད་ནས་བོད་ཀྱི་གཞོན་ནུའི་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ནས་གསར་འགོད་པ་གཙོས་པའི་དེར་ཡོད་རྣམས་ལ་གཏམ་བཤད་གནང་འདུག ཚོགས་གཙོ་ཚེ་དབང་རིག་འཛིན་ལགས་ཀྱིས་གཏམ་བཤད་ནང་། ད་ལྟའི་ཆར་རྒྱ་ནག་གཞུང་གིས་བཙན་འཛུལ་བཙན་གནོན་འོག བོད་ནང་གི་གནས་སྟངས་ནི། དམྱལ་བ་མི་ཡུལ་དུ་སླེབས་པ་ལྟ་བུ་ཞིག་ཆགས་ཡོད་པ་དང་ ཛ་དྲག་གི་གནས་སྟངས་དེས་རྐྱེན་པས་གཞོན་ནུ་ལྷན་ཚོགས་ངོས་ནས་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གྱི་ལས་འགུལ་སྤེལ་དགོས་དོན་དང་། ལས་འགུལ་དེའི་བརྒྱུད་མཉམ་སྦྲེལ་རྒྱལ་ཚོགས་དང་། ཡུ་རོབ་མཉམ་སྦྲེལ། རྒྱལ་སྤྱིའི་སྤྱི་ཚོགས་དང་། དེ་བཞིན་རྒྱ་ནག་གཞུང་བཅས་པར་རེ་འདུན་གཅིག་དང་དགོས་འདུན་དོན་ཚན་བཞི་བཅས་ངོ་སྤྲོད་གསལ་འདོན་གནང་བཞག