པ་སངས་དབང་ཕྱུག་ལགས་བསྐྱར་དུ་འཇུ་བཟུང་བྱས་འདུག

༧གོང་ས་མཆོག་གི་འཁྲུངས་སྐར་གྱ་སྟོན་ཆེད་བསང་གསོལ་ཙམ་ལ་བརྟེན་ནས་པ་སངས་དབང་ཕྱུག་རྒྱ་ནག་གི་ཉེན་རྟོག་པས་ཡང་བསྐྱར་འཇུ་བཟུང་བྱས་བ།
དེ་ཡང་འདི་ག་རླུང་འཕྲིན་ཁང་གི་གསར་འགོད་པ་བསོད་ནམས་དབང་འདུས་ལགས་ཀྱིས་གནས་ཚུལ་བཏང་བ་ལྟར་ན། ༢༠༡༤ལོའི་ཕྱི་ཟླ་བཅུ་པའི་ཚེས་༤ ཉིན་པ་སངས་དབང་ཕྱུག་ལགས་ཀྱིས། དཀར་མཛེས་རྫོང་གི་ཁྲོམ་ལམ་དུ་བོད་ལ་འགྲོ་བ་མིའི་ཐོབ་ཐང་དགོས། བོད་ལ་རང་དབང་དགོས། རྒྱལ་དབང་བསྟན་འཛིན་རྒྱ་མཚོ་མཆོག་བོད་དུ་གདན་འདྲེན་ཞུ་དགོས། བོད་ལ་ཆོས་དད་རང་དབང་དགོས། བོད་ལ་ཞི་མོལ་དགོས། བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་བརྗེད་མི་རུང་ཞེས་བྲིས་པའི་འབོད་ཚིག་གི་ཕྲེད་དར་དཀར་པོ་ཞིག་ཁྱེར་ནས་དཀར་མཛེས་ནང་ཁྲོམ་སྐོར་བྱེད་བཞིན་པའི་སྐབས་དེར་རྒྱ་མིའི་ཉེན་རྟོག་པ་ཁྱུ་གཅིག་ཡོང་ནས་ལམ་སེང་ཁོང་འཇུ་བཟུང་བྱས་ཏེ། ཟླ་ཕྱེད་བཀག་ཉར་བྱས་པ་དང་ལོ་གཅིག་རིང་འགྲོ་སྡོད་ལ་ཟབ་ཟབ་བྱེད་དགོས་པའི་ཉེན་བརྡ་བཏང་ཡོད་པ་རེད།
ད་ལོ་ཕྱི་ཟླ་བདུན་པའི་ཚེས་དྲུག་ཏེ། ༧གོང་ས་མཆོག་དགུངས་གྲངས་༨༠ཕེབས་པའི་འཁྲུངས་སྐར་གྱ་སྟོན་སྐབས་རྒྱ་གཞུང་གིས་དཀར་མཛེས་ཁུལ་དུ་བསང་གསོལ་གཏོང་མི་ཆོག་པའི་བཙན་བཀའ་བཏང་ཡོད་ཀྱང་། ཆབ་སྲིད་བཙོན་ཟུར་པ་སངས་དབང་ཕྱུག་ལགས་ཀྱིས་བསང་གསོལ་གཏོང་བར་ཕེབས་པའི་རྐྱེན་གྱིས་སྐབས་དེར་ཁོང་ཡང་བསྐྱར་འཇུ་བཟུང་བྱས་ནས་ད་ལྟའང་བཙོན་འཇུག་བྱས་བཞག་ཡོད་པའི་སྐོར་མིང་ཕྱིར་འདོན་གནང་མེད་པའི་མི་སྣ་ཞིག་གིས་ངོ་སྤྲོད་གནང་འདུག
ད་ལྟའི་ཆར་པ་སངས་དབང་ཕྱུག་ལགས་ཀྱི་སྐོར་གནས་ཚུལ་གསལ་པོ་ཞིག་གོ་རྒྱུ་མེད་ནའང་ཁོང་དཀར་མཛེས་རྫོང་གི་བཙོན་ཁང་ཞིག་ནང་བཙུན་འཇུག་བྱས་ནས་བཞག་ཡོད་པ་མི་ཁག་ཅིག་གིས་ཚོད་དཔག་གནང་གི་ཡོད་པ་རེད།

གསར་འགོད་པ་ཚེ་བརྟན་རྡོ་རྗེ།
ཞིབ་ཕྲ་འདི་གའི་གསར་འགོད་པ་བསོད་ནམས་དབང་འདུས་ལགས་ཀྱིས་གནས་ཚུལ་གཏང་གནང་བར་གསན་རོགས།