སྤང་རི་སྣ་རིན་པོ་ཆེའི་སྐུ་གཟུཊ་གནས་སྟངས་ཐད་སེམས་འཚབ།

རྒྱ་གཞུང་གིས་བཙོན་འཇུག་བྱས་བསྡད་ཡོད་པའི་སྤང་རི་སྣ་རིན་པོ་ཆེའི་སྐུ་གཟུགས་གནས་སྟངས་ཧ་ཅང་སྐྱོ་བོ་ཆགས་ཡོད་འདུག
དེ་ཡང་པདྨ་ཚེ་དབང་གིས་འདི་གར་གནས་ཚུལ་བཏང་དོན། དེ་སྔ་ཕྱི་ལོ་༢༠༠༩ལོར་རྒྱ་ནག་གཞུང་ནས་འཛིན་བཟུང་བཙོན་བཅུག་བྱས་ནས་ད་ལྟ་བཙོན་ཁང་ཡོད་པའི་བོད་ཁམས་དཀར་མཛེས་དགོན་པའི་སྤྲུལ་སྐུ་སྤང་རི་སྣ་རིན་པོ་ཆེའམ་ཕུར་བུ་ཚེ་རིང་མཆོག་གི་སྐུ་གཟུགས་ཀྱི་གནས་སྟངས་ཧ་ཅང་སྐྱོ་པོ་ཆགས་ཡོད་པ་དང་། དེ་ནི་རིན་པོ་ཆེ་མཆོག་རྒྱ་མིའི་བཙོན་ཁང་ནང་ཚུད་ནས་ད་ཆ་ལོ་ངོ་དྲུག་ལྷག་ཙམ་འགྲོ་གིན་ཡོད་པའི་རིང་བཙོན་ཁང་ནང་ཉེས་རྡུང་བཏང་བ་དང་། ཞལ་ལག་ཡག་པོ་མ་ཕུལ་བ་སོགས་སྡུག་སྦྱོང་ཚད་མེད་བཏང་བའི་རྐྱེན་གྱིས་སྐུ་གཟུགས་ཀྱི་གནས་སྟངས་ཧ་ཅང་ཞན་པོ་ཆགས་ཡོད་འདུག
དེ་སྔོན་རྒྱ་གཞུང་གིས་སྤང་རི་སྣ་དང་། ཡར་སྟེང་བཙུན་དགོན་གཉིས་ཀྱི་བཙུན་མ་ཚོར་རྒྱལ་གཅེས་ཆོས་གཅེས་ཀྱི་ཆབ་སྲིད་སློབ་གསོ་སྤེལ་བར་ཁོང་གིས་ངོ་རྒོལ་བྱས་པ་དང་། ༧གོང་ས་མཆོག་ལ་སྐྱོན་བརྗོད་ཡིག་ཆར་མཚན་རྟགས་མ་བཀོད་པ། དེ་བཞིན་བཙུན་མ་ལྔ་བཅུ་ང་བཞིའི་དུས་གཅིག་ཏུ་དཀར་མཛེས་རོང་ཐོག་ཏུ་ཞི་བའི་ཁྲོམ་སྐོར་བྱས་པ་སོགས་དང་འབྲེལ་བ་ཡོད་ཚུལ་གྱིས་༢༠༠༩ལོའི་ཟླ་༡༢་ཚེས་ ༢༣ ཉིན་དཀར་མཛེས་ཁུལ་དར་མདོ་འབྲིང་རིམ་མི་དམངས་ཁྲིམས་ཁང་གིས་ཁྲིམས་གཅོད་ཀྱི་བཅད་ཁྲ་བཏང་ཡོད། སྤང་རི་སྣ་རིན་པོ་ཆེ་མཆོག་ནི་ཕྱི་ལོ ༡༩༥༧ ལོར་ཟི་ཁྲོན་ཞིང་ཆེན་དཀར་མཛེས་རྫོང་གི་བེ་རི་སྡེ་པ། གསེར་མཁར་ཤང་དུ་སྐུ་འཁྲུངས་པ་ཞིག་ཡིན་འདུག རིན་པོ་ཆེ་མཆོག་དཀར་མཛེས་སྤང་རི་སྣ་བཙུན་དགོན་དང་། ཡར་སྟེང་བཙུན་དགོན་གཉིས་ཀྱི་དགོན་བདག་ཀྱང་ཡིན་པ་རེད། དེ་དང་ཕྱོགས་མཚུངས་རིན་པོ་ཆེ་མཆོག་གིས། སྤང་རི་སྣ་བཙུན་དགོན་དུ་རྒས་གསོ་ཁང་ཞིག་ཀྱང་འཛིན་སྐྱོང་གནང་བཞིན་ཡོད་པ་བཅས་གང་ལྟར་ས་གནས་ཡུལ་མི་ཚོས་རིན་པོ་ཆེ་མཆོག་གི་སྤྱི་ཚོགས་ལ་ཕན་པའི་ཕྱག་ལས་གནང་སྟངས་ལ་དགའ་མོས་དང་གུས་བརྩི་ཆེན་པོ་ཞུ་ཡུལ་ཞིག་ཏུ་གྱུར་ཡོད་པ་རེད། ད་ལྟའི་ཆར་རིན་པོ་ཆེ་མཆོག་གི་སྐུ་གཟུགས་ཀྱི་གནས་སྟངས་ལ་ཕྱི་ནང་སློབ་མ་དང་ཡུལ་མི་ཚོས་སེམས་འཚབ་ཆེན་པོ་བྱེད་ཀྱི་ཡོད་ལུགས་ཀྱང་ངོ་སྤྲོད་བྱས་འདུག

གསར་འགོད་པ་རིག་འཛིན་ཆོས་སྒྲོན།

འབྲེལ་ཡོད་གནས་ཚུལ་གཤམ་ལ་ཆོས་སྐྱིད་ལགས་ཀྱིས་ཕྱོགས་སྒྲིག་དང་སྙན་སྒྲོན་ཞུས་པར་གསན་རོགས་ཞུ།

གསར་འགོད་པ་ཆོས་སྐྱིད།