འབྲི་རུའི་གླུ་བ་མགོན་པོ་བསྟན་འཛིན་ལགས་བཙོན་གྲོལ་བྱུང་འདུག

ལ་རྒྱའི་གླུ་དབྱངས་བླངས་བ་བརྟེན་འཛིན་བཟུང་བཙོན་འཇུག་བྱས་བའི་གླུ་བ་འབྲི་རུའི་མགོན་པོ་བསྟན་འཛིན་ལགས་བཙོན་གྲོལ་བྱུང་འདུག
དེ་ཡང་འབྲེལ་ཡོད་མི་སྣས་འདི་ག་རླུང་འཕྲིན་ཁང་ལ་གནས་ཚུལ་ངོ་སྤྲོད་གནང་བ་ལྟར་ན། དེ་སྔ་བོད་ནང་མཐུན་སྒྲིལ་དང་ལ་རྒྱའི་ནང་དོན་ཡོད་པའི་གླུ་བླངས་ནས་འོད་སྡེར་བཏོན་པར་བརྟེན་རྒྱ་ནག་གཞུང་གིས་འཛིན་བཟུང་དང་ཁྲིམས་ཐག་བཅད་པའི་གླུ་བ་མགོན་པོ་བསྟན་འཛིན་ལགས་སྤྱི་ལོ་༢༠༡༨་ལོའི་ཟླ་༨་ཚེས་༢་ཉིན་བཙོན་འཇུག་དུས་ཡུན་གཙང་ནས་བཙོན་གྲོལ་བྱུང་ཡོད་འདུག ཡིན་ན་ཡང་ཁོང་གི་ད་ལྟའི་སྐུ་གཟུགས་ཀྱི་གནས་སྟངས་ཇི་འདྲ་ཡོད་མེད་སོགས་ཞིབ་ཕྲའི་གནས་ཚུལ་ཁ་གསལ་མེད་པ་བརྗོད་བྱུང་།
འབྲེལ་ཡོད་མི་སྣས། མགོན་པོ་བསྟན་འཛིན་ལགས་ཀྱིས་གླུ་གཞས་འོད་སྡེར་བཏོན་པ་དང་། ལྷག་དོན་གླུ་གཞས་ནང་གངས་ཅན་བོད་ལ་ལོ་གསར་གང་ན་ཡོད་ཅེས་བ་སོགས་ལ་རྒྱའི་ནང་དོན་ཡོད་པའི་གླུ་གཞས་བཏང་བར་བརྟེན་ས་གནས་རྒྱ་ནག་གཞུང་གིས་འཛིན་བཟུང་བཀའ་རྒྱ་བཏང་བར་བརྟེན་དུས་ཡབ་གང་ཙམ་རིང་ཉེན་གཡོལ་གསང་ཡིབ་ཐོག་གནས་འདུག་པ་དང་།   རྗེས་སུ་རྒྱ་ནག་གཞུང་གི་ལྷ་སའི་ཉེན་རྟོག་པས་སྤྱི་ལོ་༢༠༡༣ལོའི་ཕྱི་ཟླ་༡༡པའི་ནང་འཛིན་བཟུང་བྱས་ནས་ལོ་གཅིག་དང་ཟླ་བ་དྲུག་ཙམ་རིང་ཁྲིམས་གཤེར་སོགས་གང་ཡང་མེད་པར་བཀག་ཉར་བྱས་ཅིང་།  མཐོར་ཕྱི་ལོ་ ༢༠༡༥ ཕྱི་ཟླ་༤པའི་ཚེས་༡༥ཉིན་རྒྱ་ནག་གི་འབྲེལ་ཡོད་ཁྲིམས་ཁང་གིས་ལོ་ངོ་གསུམ་དང་ཟླ་བ་དྲུག་གི་བཙོན་འཇུག་ཉེས་ཆད་བཏང་ཡོད་པ་མ་ཟད། ཉིན་དེ་ནས་བཟུང་ཆབ་སྲིད་ཀྱི་ཁེ་དབང་བཙན་འཕྲོག་བྱ་རྒྱུའི་ཡིག་ཆའང་དོ་བདག་ལ་སྤྲད་ཡོད་པ་རེད།
དེ་བཞིན་རྒྱ་ནག་གཞུང་གིས་ནགས་ཤོད་འབྲི་རུ་རྫོང་ནས་ཡིན་པ་གླུ་བ་འཕྲིན་ལས་ཚེ་དཀར་ལཊ་ཀྱང་འཛིན་བཟུང་གིས་བཙོན་འཇུག་ཁྲིམས་ཐག་བཅད་ཡོད།
མགོན་པོ་བསྟན་འཛིན་ལགས་ནི་ནགས་ཤོད་འབྲི་རུ་རྫོང་ཤག་ཆུ་གྲོང་ནས་ཡིན་པ་དང། ད་ལྟ་དགུང་ལོ་༣༢་ཙམ་ཡིན་འདུག

གསར་འགོད་པ་ཀླུ་འབུམ།