རྒྱ་གར་དང་པཀི་སི་ཏན་ཐན་བར་གྲོས་བསྡུར་བྱ་འཆར་ཡོད་པ།

༄༅༎རྒྱ་གར་དང་པ་ཀི་སི་ཐའན་གྱི་དབར་ད་ཕན་དགོངས་ཕྱོགས་མི་མཐུན་པའི་གནད་དོན་མི་ཉུང་བ་ཞིག་བྱུང་ཡོད་པ་དེ་ཚོའི་ནང་སྤྱི་ལོ་༢༠༠༨ལོའི་ནང་རྒྱ་གར་གྱི་གྲོང་ཁྱེར་མམ་བྷེའི་ནང་འཇིགས་སྐུལ་དྲག་སྤྱོད་རིང་ལུགས་པས་གཏོར་རྒོལ་བྱས་ཏེ་ཡུལ་མི་མང་པོ་སྲོག་སྐྱོན་བཏང་བའི་གནས་ཚུལ་དང་དེ་བཞིན་ཀ་ཤི་མི་རིའི་གནད་དོན་ཐད་རྒྱ་གར་དང་པ་ཀི་སི་ཐའན་གྱི་དབར་མི་མཐུན་པའི་གནད་དོན་སོགས་མང་དག་ཅིག་བྱུང་མིན་ལ་མ་ལྟོས་པར་ད་ཆ་ཡུལ་ཕྱོགས་གཉིས་ཀྱི་ཕྱི་འབྲེལ་དྲུང་ཆེ་རིམ་པའི་དབུ་ཁྲིད་རྣམ་པ་ཚོའི་དབར་སྤྱི་ཟླ་༢་ཚེས་༢༥་ཉིན་རྒྱ་གར་གྱི་རྒྱལ་ས་ལྡི་ལི་གསར་པར་མཇལ་འཕྲད་བཀའ་བསྡུར་གནང་རྒྱུ་ཡིན་པ་རེད།

ཕྱོགས་གཉིས་ཐད་ནས་མཇལ་འཕྲད་བཀའ་བསྡུར་གནང་རྒྱུ་དེ་བརྒྱུད་ཡུལ་གྲུ་ཕན་ཚུན་གྱི་དབར་འཕྲད་བཞིན་པའི་དཀའ་རྙོིག་ཇི་སྙེད་ཅིག་ཡོད་པ་དེ་ཚོ་སེལ་ཐབས་ཀྱི་འབད་བརྩོན་གནང་རྒྱུ་ཡིན་པ་རེད།

ལྷག་དོན་དུ་ཡུལ་གྲུ་གཉིས་ཀྱི་ས་མཚམས་མངའ་ཁུལ་དུ་ཨ་ཕྷ་གྷ་ནི་སི་ཐའན་གྱི་ཏཱ་ལི་བྷན་དྲག་འཐབ་ཚོགས་པར་གདོང་ལེན་འཐབ་འཛིང་བྱ་རྒྱུའི་གནད་དོན་སོགས་ཀྱི་དབར་ཕན་ཚུན་བཀའ་བསྡུར་གནང་རྒྱུ་ཡིན་པ་རེད།

པ་ཀི་སི་ཐའན་གྱི་སྲིད་བློན་སེཡེརྡ་ཡུ་སུཕ་ར་ཛ་ཇི་ལ་ནི་གྱིས་གཞུང་འབྲེལ་ནས་ཀྱང་འགྲེལ་བརྗོད་གནང་ཡོད་པར་པ་ཀི་སི་ཐའན་གྱི་ཕྱོགས་ནས་

རྒྱ་གར་མཉམ་དུ་འཕྲད་བཞིན་པའི་འགག་གནད་དེ་ཚོ་གསལ་བཏོན་ཞུ་རྒྱུར་དེ་ཚོ་རྒྱ་གར་གྱི་ཕྱོགས་ནས་གང་མགྱོགས་སེལ་ཐུབ་པའི་རེ་བ་ཞུ་ཡི་ཡོད་ཅེས་གསུངས་ཡོད་པ་རེད༎