བལ་ཡུལ་རྒྱལ་ཁང་གི་དངོས་ཆས་རྩིས་བཤེར་བྱེད་པ།

༄༅༎བལ་ཡུལ་གྱི་གནས་དབྱུངས་བཏང་བའི་རྒྱལ་པོ་གྱ་ནེན་རྡར་ཡིས་ རྒྱལ་པོའི་རྒྱལ་ཞྭས་མཚོན་ རྒྱལ་ཁང་གི་དངོས་ཆས་ཁག་ཅིག་གཞུང་གི་རྩིས་བཤེར་མི་སྣར་རྩིས་སྤྲོད་གནང་གི་མེད་སྐོར་ བལ་ཡུལ་གཞུང་གི་རྒྱལ་ཁང་རྩིས་བཞེས་ཚོགས་ཆུང་གི་ཚོགས་མི་ཞིག་གིས་གསུངས་ཀྱི་ཡོད་སྐོར་ཨེ་ཨེཕ་པི་གསར་འགྱུར་ལས་ཁང་གིས་གནས་ཚུལ་སྤེལ་ཡོད་པ་རེད་ དེ་ཡང་མཚན་འདོན་མ་གནང་བའི་གཞུང་གི་དཔོན་རིགས་དེས་ ང་ཚོར་རྒྱལ་ཁང་ནང་གི་དངོས་ཆས་རྟོག་ཞིབ་མ་བཅུག་པ་དང་ རྒྱལ་པོའི་རྒྱལ་ཞྭ་གཙོས་ནོར་བུའི་རིན་ཆེན་དང་ རྒྱུ་དངོས་བཅས་པ་རྩིས་བཤེར་ལ་མཐུན་འགྱུར་གནང་གི་མེད་སྐོར་བརྗོད་འདུག་ བལ་ཡུལ་གྱི་རྒྱལ་པོ་གྱ་ནེན་རྡར་ཡུལ་ནང་ཆབ་སྲིད་ཀྱི་འཕོ་འགྱུར་ཆེན་པོ་ཞིག་འོག་ རྒྱལ་པོའི་མཚན་གནས་དང་བཅས་པ་ ཆ་ཚང་ཤོར་ཡོད་པ་དང་ བལ་ཡུལ་དེ་བཞིན་ད་ཆ་དམངས་གཙོའི་སྤྱི་མཐུན་རྒྱལ་ཁབ་ཞིག་ཏུ་གྱུར་ཏེ་ ཡུལ་གྱི་རྒྱལ་པོའི་རིང་ལུགས་དེ་ཉིད་རྩ་མེད་བཟོས་ཡོད་པ་དང་ རྒྱལ་རྒྱུད་རིང་ལུགས་དེ་ཆ་ཚང་མེད་པ་གྱུར་བ་དང་མཉམ་ བལ་ཡུལ་གྱི་རྒྱལ་པོ་གྱ་ནེན་རྡར་ལ་གཟའ་འཁོར་འདིའི་རེས་གཟའ་ཕུར་བུའི་ནང་ཚུད་ རང་གི་རྒྱལ་ཁང་དེ་བཞག་སྟེ་ བཞུགས་གནས་གཞན་ཞིག་ཏུ་གཞིས་སྤོ་དགོས་པ་དང་ ལོ་ངོ་༡༢༠ རིང་བལ་ཡུལ་གྱི་རྒྱལ་པོ་རིམ་པ་བཞུགས་ཡུལ་གྱི་རྒྱལ་ཁང་ནརན་ཧྲིཏི་དེ་བཞིན་ད་ཆ་འགྲེམས་སྟོན་ཁང་ཞིག་ཏུ་འགྱུར་གྱི་ཡོད་པ་དང་ དེ་དང་འབྲེལ་བལ་ཡུལ་གཞུང་གི་དཔོན་རིགས་ཚོས་ བལ་ཡུལ་རྒྱལ་པོའི་རྒྱལ་ཞྭ་མཚོན་ རིན་ཐང་ཆེ་བའི་དངོས་ཆས་ཁག་རྩིས་བཤེར་གྱིས་ དེབ་བཀོད་ཐུབ་ཐབས་བྱེད་བཞིན་ཡོད་པ་རེད་