བལ་ཡུལ་ཉམ་ཐག་གི་མཁལ་མ་ཉོ་ཚོང་།

༄༅༎སྤྱིར་བཏང་བལ་ཡུལ་ནང་གི་ཁྲིམས་ལུགས་ཀྱི་ཐོག་ནས་མཁལ་མ་ནད་པ་ཚོར་མཁལ་ཚབ་ལེན་རྒྱུར་རང་གི་སྤུན་མཆེད་ངོ་མ་ཡིན་ན་མ་གཏོགས་ལེན་ཆོག་གི་མེད་སྟབས་མི་རྒྱུ་ཆེ་བ་ཚོས་བལ་ཡུལ་གྲོང་གསེབ་ཁག་ནས་སྐྱོ་པོ་ཉམ་ཐག་ཚོར་དངུལ་སྤྲད་ནས་མཁལ་མ་ཉོས་ནས་ཁྱིམ་མཚེས་རྒྱ་གར་ནང་གི་སྨན་ཁང་ཁག་ནང་ཕྱིན་ནས་མཁལ་མ་ཚབ་བཅོས་ཐབས་བྱེད་ཀྱི་ཡོད་འདུག

འོན་ཀྱང་ཉམ་ཐག་དེ་དག་ལ་ཐོག་མར་ཁས་ལེན་བྱས་པ་ནང་བཞིན་དངུལ་ཆ་ཚང་བ་ཞིག་རག་གི་མེད་པ་མ་ཟད་སྨན་བཅོས་ཡག་པོ་དང་རྗེས་སུ་ངལ་གསོ་ཡག་པོ་མ་ཐེབས་པའི་རྐྱེན་གྱིས་གཟུགས་པོ་གཅོང་པོ་ཆགས་ཀྱི་ཡོད་པའི་དཀའ་ངལ་འཕྲད་བཞིན་ཡོད་འདུག དེ་ཡང་མ་དཝ་ པ་ར་ཇུ་ལི་ཞེས་པའི་ཞིང་པ་ཞིག་གིས་བུ་ལོན་འཇལ་མ་ཐུབ་པའི་རྐྱེན་གྱིས་ཁོ་པའི་ས་ཞིང་ཚོང་བསྒྱུར་བྱེད་དགོས་ཆགས་ཀྱི་ཡོད་སྟབས་ཁོ་པ་རང་ཉིད་ཀྱི་མཁལ་མ་ཚོང་རྒྱུའི་ཐག་ཆོད་བྱས་ཡོད་འདུག ཐོག་མར་ཁོ་པར་རྒྱ་གར་ནང་འཁྲིད་ནས་མཁལ་མ་ཞལ་འདེབས་སྤྲོད་རྒྱུར་ཨ་སྒོར་ཆིག་སྟོང་བཞི་བརྒྱ་ཙམ་སྤྲོད་རྒྱུའི་ཁས་ལེན་བྱས་ཡོད་ཀྱང་མཐའ་མར་ཁོང་ལ་དངུལ་ཆ་ཚང་བ་ཞིག་མ་རག་པ་མ་ཟད་ཕྱིར་ལོག་སྐབས་ས་ཞིང་ཤོར་བས་མ་ཟད་ཁོང་གི་ཁྱིམ་ཚང་ནས་ཀྱང་ཕྱིར་འབུད་བཏང་ནས་ད་ལྟའི་ཆར་གཟུགས་པོ་གཅོང་ནད་ཆགས་སྟེ་ཉིན་རེའི་ཨར་ལས་བྱས་ནས་འཚོ་བ་སྐྱེལ་བཞིན་ཡོད་པ་སོགས་ཁོ་པ་འདྲ་བའི་བལ་ཡུལ་ནང་གི་ཉམ་ཐག་མང་པོར་རྒྱ་གར་ནང་འཁྲིད་ནས་མཁལ་མ་སྤྲོད་རྒྱུའི་ཁས་ལེན་བྱས་པ་གཞིར་བཟུང་དངུལ་མ་རག་པར་དཀའ་ངལ་འཕྲད་པའི་རིགས་མང་པོ་ཡོད་པའི་དཔྱད་ཞིབ་བྱེད་ཀྱི་ཡོད་འདུག