བལ་ཡུལ་ནས་གསོས་ཕྲུག་ལེན་རྒྱུའི་ལས་འཆར་སླར་གསོ་བྱས་པ།

༄༅༎བལ་ཡུལ་ནང་རྒྱལ་སྤྱིའི་ཐོག་ནས་གསོས་ཕྲུག་ལེན་རྒྱུའི་ལས་འཆར་སླར་གསོ་བྱས་ཡོད་འདུག བལ་ཡུལ་གཞུང་གིས་དུས་ཡུན་ཟླ་བ་བཅོ་བརྒྱད་ཙམ་བཀག་སྡོམ་བྱས་པའི་རྗེས་ད་རེས་ཕྱི་རྒྱལ་ཡུལ་གྲུ་ཁག་གིས་བལ་ཡུལ་ནང་ནས་ཕྲུ་གུ་གསོས་ཕྲུག་ལེན་རྒྱུའི་སྙན་ཞུ་རྩིས་ལེན་གྱི་ལས་དོན་བསྐྱར་དུ་འགོ་བཙུགས་ཡོད་པ་བལ་ཡུལ་གྱི་བེུད་དང་ཕྲུ་གུའི་སྤྱི་ཚོགས་ཕན་བདེའི་ཞབས་ཞུའི་ལས་ཁང་གི་མགྲིན་ཚབ་པས་གཟའ་པ་སངས་ཉིན་གནས་ཚུལ་ཕྱིར་བསྒྲགས་གནང་ཡོད་པ་རེད། མགྲིན་ཚབ་པ་དེས་གསུང་བར་གཞིགས་ན་ཕྱི་རྒྱལ་བ་ཚོས་བལ་ཡུལ་ནས་གསོས་ཕྲུག་ལེན་རྒྱུའི་ལས་དོན་དེ་བཞིན་སྙན་ཞུ་ཕུལ་བ་ནས་བཟུང་དུས་ཡུན་ཟླ་བ་གསུམ་ཙམ་ནང་གསོས་ཕྲུག་ལེན་ཐུབ་རྒྱུ་ཡིན་པ་དང་ད་ལྟ་ནས་བཟུང་ཕྱི་རྒྱལ་གྱི་གསོས་ཕྲུག་ལེན་འདོད་ཡོད་པའི་མི་སྣ་ཚོས་རང་ཉིད་གནས་སྡོད་བྱེད་ས་ནས་འབྲེལ་ཡོད་བལ་ཡུལ་གྱི་ཕྲུ་གུ་གསོས་ཕྲུག་སྤྲོད་ལེན་གྱི་འབྲེལ་ཡོད་དཔོན་རིགས་བརྒྱུད་ནས་སྙན་ཞུ་འབུལ་དགོས་པ་ལས་ཐད་ཀར་ཕྲུ་གུའི་ནང་མི་དང་འབྲེལ་ཡོད་དབར་འབྲེལ་བ་བྱེད་ཆོག་གི་མེད་པའི་སྐོར་གསལ་བཤད་གནང་ཡོད་པ་རེད། ཕྲུ་གུ་གསོས་ཕྲུག་ལེན་རྒྱུར་མ་དངུལ་སྤྲོད་ཕྱོགས་ལ་འགྱུར་ལྡོག་ཕྲན་བུ་བཏང་ཡོད་པར་ཕྱི་རྒྱལ་བ་ཞིག་གིས་བལ་ཡུལ་ནས་ཕྲུ་གུ་གསོས་ཕྲུག་ལེན་རྒྱུར་ཕྲུ་གུ་གཅིག་ལ་ཨ་སྒོར་བརྒྱད་སྟོང་སྤྲོད་དགོས་ཀྱི་ཡོད་ཅིང་དེའི་ནང་ནས་ཨ་སྒོར་ལྔ་སྟོང་ཕྲུ་གུའི་ནང་མིར་སྤྲོད་དགོས་ཀྱི་ཡོད་པ་དང་ཨ་སྒོར་གསུམ་སྟོང་བལ་ཡུལ་གཞུང་གིས་ལེན་གྱི་ཡོད་འདུག