བལ་པོའི་མི་སེར་ས་ཡ་གཉིས་ཙམ་བྲན་གཡོག་ལྟ་བུར་ལུས་འདུག

ཕྱིའི་ཡུལ་གྲུ་ཁག་ནང་བལ་པོ་ས་ཡ་གཉིས་ཙམ་བྲན་གཡོག་རིང་ལུགས་ཀྱི་གནས་སྟངས་ལྟ་བུར་ཡོད་པ་གཞུང་གིས་ངོས་ལེན་བྱས་འདུག
དེ་ཡང་བལ་ཡུལ་གྱི་ཡུལ་མི་སྟོང་ཕྲག་མང་པོ་འཚོ་བའི་དོན་དུ་ཕྱིའི་ཡུལ་གྲུ་ཁག་ནང་ལས་ཀའི་གོ་སྐབས་འཚོལ་བའི་འགྲོ་གྲོན་ཆེད་དུ་ས་ཞིང་བོགས་མ་བཞག་སྟེ་དངུལ་བུན་སྔ་གཡར་བྱས་རྗེས་ད་ཆ་བུན་ལོན་སྤྲོད་འཇལ་མ་ཐུབ་པའི་རྐྱེན་གྱིས་ས་ཞིང་ཤོར་བ་མ་ཟད། ལས་ཀ་ལས་སའི་ཕྱིའི་ཡུལ་གྲུ་ཁག་ནང་། ཁྱོན་བལ་པོ་ས་ཡ་གཉིས་ཙམ་བྲན་གཡོག་རིང་ལུགས་ཀྱི་གནས་སྟངས་ལྟ་བུར་ལུས་ཞིང་། དཀའ་ངལ་ཅི་ཆེ་འཕྲད་བཞིན་ཡོད་པ་དང་། བལ་ཡུལ་གཞུང་ཕྱོགས་ནས་བལ་པོ་ཚོའི་ཐོབ་ཐང་སྲུང་སྐྱོབ་གང་ཐུབ་ཀྱི་འབད་བརྩོན་བྱེད་བཞིན་ཡོད་ལུགས་གསུངས་འདུག
དེ་ཡང་རེས་གཟའ་མིག་དམར་ཉིན་Human Rights Watchའམ་འགྲོ་བ་མིའི་ཐོབ་ཐང་རྟོགས་ཞིབ་ཚོགས་པས་གནས་ཚུལ་ངོ་སྤྲོད་གནང་པའི་ནང་། ཕྱིའི་ཡུལ་ཡུལ་ཁག་ནང་བལ་པོའི་མི་སེར་རྣམས་ལ་དཀའ་ངལ་ཅི་ཆེ་འཕྲད་བཞིན་པའི་ཁར་ཡུལ་གྲུ་དེ་ཚོའི་ནང་ལས་ཀའི་གོ་སྐབས་འཚོལ་ཞིབ་དང་། འགྲིམ་འགྲུལ་གྲ་སྒྲིག་བྱ་མཁན་བར་བཞུགས་མི་སྣས་བལ་པོའི་མིར་སྐྱེད་ཀ་ཧ་ཅང་མཐོ་བའི་དངུལ་བུན་སྔ་གཡར་གཏོང་གི་ཡོད་པ་རེད། ད་ཆ་བལ་པོ་ཁྲི་ཚོ་མང་པོར་ཕྱིའི་ཡུལ་གྲུའི་ནང་ལས་ཀའི་གླ་ཕོགས་དུས་ཐོག་མ་རགས་པའི་རྐྱེན་གྱིས་རང་ཡུལ་དུ་ཕྱིར་ལོག་མ་ཐུབ་པ་དང་། བུ་ལོན་སྤྲོད་འཇལ་མ་ཐུབ་ཙང་ས་ཞིང་ཤོར་བ་མ་ཟད། བུན་ལོན་སྤྲོད་འཇལ་ཆེད་བྲན་གཡོག་ལྟ་བུ་ལས་བཞུགས་བྱེད་དགོས་པ་གསལ་འདོན་བྱས་པ་ལྟར། བལ་ཡུལ་གཞུང་ཕྱོགས་ནས་ཀྱང་གོང་གསལ་གྱི་གནས་སྟངས་དངོས་བདེན་ཡིན་པ་ངོས་ལེན་བྱས་འདུག་ལ་དེ་ཡང་ཁ་ས་རྒྱལ་ཚོགས་ཀྱི་བཟའ་འབྲུ་ལས་དོན་ལྷན་ཁང་གི་ཚོགས་འདུའི་ཐོག་བལ་ཡུལ་གྱི་སོ་ནམ་བློན་ཆེན་Uttam Kumar Bhattaraiགིས། ཕྱི་ཕྱོགས་སུ་ལས་ཞུགས་བྱེད་པའི་བལ་པོའི་མི་སེར་གྱི་དཀའ་སྡུག་ལ་བལ་ཡུལ་གཞུང་གིས་བློ་འཚབ་ཆེན་པོ་ཡོད་པའི་ཐོག་དཀའ་ངལ་སེལ་ཐབས་ཀྱི་འབད་བརྩོན་གང་ཡོང་བྱེད་བཞིན་ཡོད་ལུགས་གསུངས་འདུག
དཀྱིལ་ཤར་ཡུལ་གྲུ་གཙོ་བོར་གྱུར་བའི་ཕྱིའི་ཡུལ་གྲུ་ཁག་ནང་། བལ་པོའི་མི་རིགས་ཁྲི་ཚོ་མང་པོས་འཚོ་རྟེན་གྱི་ཤུགས་ལས་སྣ་ཚོགས་རྒྱུག་བཞིན་ཡོད་པ་དང་། འབྲེལ་ཡོད་རྒྱལ་ཁབ་མང་པོའི་ཁྲིམས་ལུགས་ནང་། ཕྱི་མིའི་ཐོབ་ཐང་སྐོར་ཁྲིམས་ཡིག་ཁ་གསལ་མེད་སྟབས་Quatarདང་། Iran, Iraqལ་སོགས་པའི་ཁ་ཆེའི་རྒྱལ་ཁབ་ཁག་ནང་། ཤུགས་ལས་རྒྱུག་མཁན་བལ་པོའི་མི་སེར་ཚོ་ལ་བརྙས་བཅོས་དང་། ཉེས་རྡུང་བཏང་བ། སྡོད་ཁང་དང་འཕྲོད་བསྟེན་གྱི་ལྟ་སྐྱོང་མེད་པ་སོགས་གནས་སྟངས་ཧ་ཅང་སྐྱོ་བོ་ཡོད་པའི་སྐོར་འགྲོ་བ་མིའི་ཐོབ་ཐང་ཚོགས་པ་ཁག་ནས་སྙན་ཐོ་རིམ་པ་བཏོན་པ་དང་ཆབས་ཅིག་བལ་ཡུལ་གཞུང་ཕྱོགས་ནས་མི་སེར་གྱི་བདེ་སྡུག་དང་ཐོབ་ཐང་ལ་སྲུང་སྐྱོབ་བྱ་དགོས་པའི་སྐུལ་མ་བྱས་ཡོད་འདུག

གསར་འགོད་པ་དོན་གྲུབ་རྣམ་རྒྱལ།