བཙན་བྱོལ་དུ་མ་སུ་རི་བོད་ཁྱིམ་སློབ་གྲྭ་དབུ་བརྙེས་ནས་རབ་བྱུང་གཅིག་འཁོར་འདུག

མི་རབས་རྒན་པའི་བཀའ་དྲིན་དྲན་ཞོར་མི་རབས་གསར་པ་རྣམས་ཀྱིས་བོད་དོན་ཐད་མུ་མཐུད་དུ་འགན་འཁུར་ལེན་དགོས་པ་སྲིད་སྐྱོང་མཆོག་གིས་མ་སུ་རི་བོད་ཁྱིམ་དབུ་བརྙེས་ནས་རབ་བྱུང་གཅིག་འཁོར་བའི་མཛད་སྒོར་གསུངས་འདུག
འདི་ཚེས་༣༠ཉིན་མ་སུ་རི་བོད་ཁྱིམ་སློབ་གྲྭ་དབུ་བརྙེས་ནས་མི་ལོ་༦༠འཁོར་བའི་དུས་ཆེན་གྱི་མཛད་སྒོར། སྐུ་མགྲོན་གཙོ་བོ་ས་སྐྱ་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། སྐུ་མགྲོན་དུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས། ཆེ་བསྟོད་སྐུ་མགྲོན་དུ་སྲིད་སྐྱོང་སྤེན་པ་ཚེ་རིང་ལགས། དམིགས་བསལ་སྐུ་མགྲོན་ཨུཏྟར་ཁནྜ་མངའ་སྡེའི་སྤྱི་ཁྱབ་དྲུང་ཆེ་ཟུར་པ་སྐུ་ཞབས་སུ་བྷ་ཤཱི་ཀུ་མར་ལགས་བཅས་ཕེབས་གནང་ཡོད་པ་རེད།

སྐབས་དེར་སྲིད་སྐྱོང་སྤེན་པ་ཚེ་རིང་ལགས་ཀྱིས། སྤྱི་ནོར་༧གོང་ས་སྐྱབས་མགོན་ཆེན་པོ་ཆེན་པོ་མཆོག་བོད་ནས་རྒྱ་གར་དུ་བཙན་བྱོལ་དུ་ཆིབས་བསྒྱུར་བསྐྱངས་རྗེས་ཐོག་མར་མ་སུ་རིར་བཞུགས་གནང་མཛད་པ་དང་། དེ་སྔ་ཨ་མ་ཕྲེང་རིང་རིན་ཆེན་སྒྲོལ་མ་ལགས་དང་། མ་སུ་རི་བོད་ཕྲུག་ཁྱིམ་སྡེའི་ལས་བྱེད་མི་རབས་རྒན་པ་རྣམས་ཀྱིས་བློས་བཏང་གིས་སྐུ་ལས་བསྐྱོན་པར་བརྟེན་ད་ཆ་མ་སུ་རི་བོད་ཁྱིམ་ཚགས་ཚུད་བྱུང་ཡོད་པ་སོགས་ཀྱི་སྐོར་དང་། བོད་མི་ཚོས་བོད་ཀྱི་རྩ་དོན་བསྒྲུབ་པར་རེ་བ་བརླག་ཏུ་འཇུག་རྒྱུ་མེད་པ་དང་། མི་རབས་གསར་པ་རྣམས་ཀྱིས་བོད་དོན་ཐད་མུ་མཐུད་དུ་འགན་འཁུར་ལེན་དགོས་པ་དང་། ཉེ་ཆར་སྤྱི་ནོར་༧གོང་ས་སྐྱབས་མགོན་ཆེན་པོ་ཆེན་པོ་མཆོག་ལ་བོད་མིའི་ཚོགས་པ་ཁག་ནས་བརྟན་བཞུགས་བསྟར་འབུས་ཞུས་པའི་སྐབས་མགོན་པོ་གང་ཉིད་མཆོག་གིས་དགུང་ལོ་བཅུ་ཕྲག་གཉིས་ལྷག་རིང་བཞུགས་རྒྱུའི་ཞལ་བཞེས་གནང་ཡོད་པ། གཙོ་བོ་བླ་མ་དང་སློབ་མའི་དབར་དམ་ཚིག་གཙང་མ་དགོས་པ་དང་། བོད་དོན་ཆེད་བོད་མི་མང་ཚོགས་ནས་ཀྱང་ཧུར་ཐག་གིས་ཕྱག་ལས་གནང་དགོས་པ། ལོ་ལྟར་སློབ་མ་ཚོས་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་མཇལ་ཁ་དང་ལམ་སྟོན་ཞུ་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད་འདུག

ས་སྐྱ་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་བཀའ་སློབ་སྩལ་སྐབས། གཙོ་བོ་ད་ལྟའི་ང་ཚོ་མི་ཐོག་འདི་དུས་ཚོད་གཉན་འཕྲང་ཅན་གྱི་མི་ཐོག་ཡིན་ཞིང་། སྤྱི་ནོར་༧གོང་ས་སྐྱབས་མགོན་ཆེན་པོ་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་ཀྱི་བསྟན་པ་དང་ཆབ་སྲིད། རིག་གཞུང་སོགས་རྒྱ་གར་ནང་དར་རྒྱས་གོང་འཕེལ་བྱུང་ཡོད་པ། ནང་གི་ཤེས་ཡོན་གྱི་ལོ་འདབ་རྒྱས་དགོས་ན་སློབ་ཕྲུག་རྣམས་ཀྱིས་སློབ་སྦྱོང་ཧུར་ཐག་གནང་དགོས་པ་དང་། བོད་མིའི་གོམས་གཤིས་བཟང་པོ་མི་ཉམས་རྒྱུན་འཛིན་གནང་དགོས་པ། དེང་སང་འཛམ་གླིང་གཅིག་ལ་གཅིག་བརྟེན་ཆགས་ཡོད་སྟབས། གནའ་རབས་དང་དེང་དུས་ཟུང་དུ་འབྲེལ་བའི་འདབ་གཤོག་གཉིས་ལྡན་གྱི་ཤེས་ཡོན་དགོས་པ་དང་། མི་ཚེ་དོན་དང་ལྡན་པ་སྐྱེལ་དགོས་པ། ཆོས་དང་རིག་གཞུང་གི་རྩ་བ་བོད་ཡིག་ཡིན་སྟབས། བོད་སྐད་དང་བོད་ཡིག་སྦྱང་དགོས་པ། ལྷག་བསམ་དང་སྙིང་སྟོབས་དགོས་པ། བོད་མི་ཚོས་རྒྱུན་དུ་སྤྱི་ནོར་༧གོང་ས་སྐྱབས་མགོན་ཆེན་པོ་ཆེན་པོ་མཆོག་གི་བཀའ་དྲིན་དྲན་དགོས་པའི་གལ་གནད་དང་། རྒྱ་གར་གཞུང་མང་གཉིས་ནི་བོད་མི་རྣམས་ལ་བཀའ་དྲིན་ཤིན་ཏུ་ཆེན་པོ་ཡིན་པས། གོ་སྐབས་འདི་བརྒྱུད་རྒྱ་གར་གཞུང་མང་གཉིས་དང་། རྣམ་པ་ཚོ་ཚང་མ་ཐུགས་རྗེ་ཞུ་རྒྱུ་ཡིན། བོད་ཀྱི་བསྟན་བདག་བླ་ཆེན་རྣམ་པ་སྐུ་ཚེ་བརྟན་པ་དང་། གཞིས་བྱེས་བོད་མི་རྣམས་མཉམ་འཛོམས་ཡོང་བའི་སྨོན་འདུན་ཞུ་རྒྱུ་ཡིན། ཞེས་སོགས་ཀྱི་བཀའ་སློབ་གནང་རྗེས་མ་སུ་རི་བོད་ཁྱིམ་སློབ་གྲྭ་ནས་བོད་མི་མང་སྤྱི་འཐུས་ཚོགས་གཙོ་མཆོག་དང་སྲིད་སྐྱོང་མཆོག་ལ་དྲན་རྟེན་སྐུ་ཐང་རེ་ཕུལ་ཡོད།
དུས་ཆེན་གྱི་མཛད་རིམ་ཁོངས་སུ། སྡེ་ར་ལྡུན་བོད་སློབ་ནང་ཁུལ་བོད་སྐད་བགྲོ་གླེང་གནང་ཡོད་པ་དང་། སྐབས་དེར་སྲིད་སྐྱོང་མཆོག་དང་། བཀའ་ཟུར་འབྲོང་ཆུང་དངོས་གྲུབ་མཆོག ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་སོགས་མཉམ་ཞུགས་གནང་གནང་ཡོད་པ་དང་། དེ་བཞིན་བོད་ཀྱི་གཞས་སྣ་འཁྲབ་སྟོན་གཟིགས་འབུལ་ཞུས་ཡོད་འདུག

གསར་འགོད་པ། གཡུ་སྒྲོན།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཀླུ་འབུམ།