སོག་ཡུལ་གྱི་མང་གཙོ་དབུ་བརྙེས་ནས་མི་ལོ་ཉེར་ལྔ་འཁོར་བ།

སོག་ཡུལ་ནང་མང་གཙོ་དབུ་བརྙེས་བ་དང་མང་གཙོའི་ལམ་ནས་ཡུལ་གྱི་དབུ་ཁྲིད་འོས་འདེམས་གནང་ནས་ད་བར་མི་ལོ་ཉེར་ལྔ་འཁོར་ཡོད་པ་རེད།
དེ་ཡང་སོག་ཡུལ་ནང་མང་གཙོའི་ལམ་ནས་ཡུལ་གྱི་དབུ་ཁྲིད་འོས་འདེམས་ཐོག་མ་དེ་གནང་ནས་ད་ཆ་མི་ལོ་༢༥ཧྲིལ་བུར་འཁོར་བའི་དུས་དྲན་དེ་རིང་ཚེས་༢༩ཉིན་སྲུང་བརྩི་ཞུས་ཡོད་པ་དང་། སྲིད་འཛིན་Elbegdorjམཆོག་གིས་འདས་པའི་མི་ལོ་ཉི་ཤུ་རྩ་ལྔ་རིང་སོག་ཡུལ་ནང་བཟང་ཕྱོགས་ཀྱི་འགྱུར་བ་ཤུགས་ཆེ་ཕྱིན་ཡོད་ལུགས་གསུངས་འདུག
སྟོབས་ཆེན་རྒྱལ་ཁབ་རྒྱ་ནག་དང་ཨུ་རུ་སུའི་བར་དུ་ཆགས་པའི་སོག་ཡུལ་དེ་མི་ལོ་༢༥གོང་དམར་པོའི་རྒྱལ་ཁབ་ཅིག་ཡིན་པ་དང་། མི་ལོ་བཅུ་ཕྲག་བདུན་ཙམ་རིང་ཨུ་རུ་སུ་སྤྱི་མཐུན་རྒྱལ་ཁབ་ཀྱིས་དབང་སྒྱུར་བྱས་པའི་རྗེས། ད་ལྟའི་སྲིད་འཛིན་མཆོག་སློབ་ཕྲུག་ཡིན་པའི་སྐབས་ཁོང་གིས་དབུ་ཁྲིད་ནས་ངོ་རྒོལ་གྱི་ལས་འགུལ་སྤེལ་བའི་རྐྱེན་གྱིས་རིམ་པས་སོག་ཡུལ་ནང་འགྱུར་བ་ཆེན་པོ་བྱུང་བ་ཞིག་ཡིན་ལུགས་སྲིད་འཛིན་Elbegdorjམཆོག་གིས་དུས་དྲན་སྲུང་བརྩི་ཞུ་བའི་སྐབས་གསུངས་འདུག
སོག་པོའི་མི་མང་གིས་ད་བར་ཞི་བདེ་བག་ཕེབས་ཀྱི་ངང་གྲོས་ཚོགས་དང་། སྲིད་འཛིན་གྱི་འོས་བསྡུ་ཐེངས་༡༣ཙམ་གནང་ཡོད་པ་རེད། སོག་ཡུལ་ནི་གསེར་དང་དངུལ། ཟངས་སོགས་གཏེར་རྫས་སྣ་ཚོགས་ཐོན་ཁུངས་ཆེ་བའི་ཡུལ་ཞིག་ཡིན་པ་དང་། གཏེར་རྫས་ཕྱི་ཚོང་དང་ཕྱི་རྒྱལ་ཡུལ་གྲུ་ཁག་ནས་མ་འཛུགས་བྱ་མཁན་མང་བའི་ཆ་ནས་ཕྱི་ལོ་༢༠༡༡ལོར་སོག་ཡུལ་ལ་སྔོན་ཆད་བྱུང་མྱོང་མེད་པའི་དཔལ་འབྱོར་འཕེལ་རྒྱས་བརྒྱ་ཆ་༡༧དང་ཕྱེད་ཀ་ཙམ་བྱུང་ཡོད་པ་རེད། འོན་ཀྱང་ཕྱི་ནས་མ་འཛུགས་བྱ་ཕྱོགས་དང་། གཏེར་རྫས་བསྔོག་འདོན་དང་ཕྱི་ཚོང་བྱ་ཕྱོགས་ཀྱི་ཐོག་དགོངས་ཚུལ་མ་མཐུན་པ་དང་། ཚུལ་མཐུན་གྱི་བྱེད་སྒོ་མེད་པའི་ཆ་ནས་དཔལ་འབྱོར་འཕེལ་རྒྱས་ལ་འགོག་རྐྱེན་ཡོང་བཞིན་པ་རེད།
ཨེ་ཤེ་ཡའི་དངུལ་ཁང་ཆེན་མོས་འདི་ལོ་སོག་པོར་དཔལ་འབྱོར་འཕེལ་རྒྱས་བརྒྱ་ཆ་༣ཙམ་ཡོང་བ་དང་། ཕྱི་ལོ་༢༠༡༦ལོར་བརྒྱ་ཆ་༥ཙམ་ཡོང་བའི་ཚོད་དཔག་གནང་ཡོད་འདུག
སོག་པོའི་སྲིད་བློན་Chimediin Saikhanbilegམཆོག་གིས། ཕྱི་རྒྱལ་གྱི་མ་འཛུགས་བྱ་མཁན་ལ་མཛའ་མཐུན་གྱི་བལྟ་བ་འཛིན་གྱི་ཡོད་པ་དང་། ཁོང་གིས་མ་འོངས་སོག་ཡུལ་དེ་བཞིན་འབྱོར་ལྡན་གྱི་ཡུལ་ཞིག་ཆགས་པའི་རེ་བ་གནང་གི་ཡོད་འདུག

གསར་འགོད་པ་ཚེ་དབང་དངོས་གྲུབ།