རྒྱ་གར་མའོ་གྱེན་ལོག་པ་ཚོས་གཞུང་དང་ཞི་མོལ་བྱ་འདོད་ཡོད་པ།

༄༅༎རེས་གཟའ་སྤེན་པའི་ཉིན་རྒྱ་གར་གྱི་ཆ་ཏིསི་གར་མངའ་སྡེའི་ནང་ཡོད་པའི་མའོ་གྱེན་ལོག་པ་ཚོས་མངའ་སྡེའི་གཞུང་དང་ཞི་མོལ་བྱ་འདོད་ཡོད་པའི་འདུན་པ་བཏོན་ཞིང་འོན་ཀྱང་ཕྱོགས་ཕན་ཚུན་དབར་ཡིད་ཆེས་དགོས་གལ་ཆེ་ལུགས་བརྗོད་འདུག

ཆ་ཏིསི་གར་མངའ་སྡེའི་ནང་ཡོད་པའི་མའོ་གྱེན་ལོག་པ་ཚོའི་ཐོག་ས་གནས་ཉེན་རྟོག་པས་ཕར་རྒོལ་ཤུགས་ཆེ་བྱས་ཏེ་གྱེན་ལོག་པ་ཚོ་ས་ཁུལ་དེའི་ནང་ཉེན་གཡོལ་ཆེད་གབ་ཡིབ་བྱས་དགོས་པ་ཆགས་ཡོད་འདུག་ཅིང་གྱེན་ལོག་པ་ཚོས་ས་གནས་གཞུང་དང་ཞི་མོལ་བྱ་འདོད་ཡོད་པའི་འདུན་པར་ས་གནས་གཞུང་གིས་དགའ་བསུ་བྱས་ཡོད་པ་རེད། མའོ་གྱེན་ལོག་སྒྲིག་འཛུགས་འདི་རིགས་ཕྱི་ལོ་༡༩༦༧ལོའི་ཞིང་པའི་སྒེར་ལངས་ལས་འགུལ་སྐབས་འགོ་བཙུགས་པ་དང་གྱེན་ལོག་གི་སྒྲིག་འཛུགས་འདི་འདྲ་བ་རྒྱ་གར་གྱི་མངའ་སྡེ་གཞན་གྱི་ནང་ལ་ཡོད་ཅིང་ཆ་ཏིསི་གར་ནང་གི་མའོ་གྱེན་ལོག་པའི་སྒྲིག་འཛུགས་འདི་ནི་རྒྱ་གར་ནང་གི་མའོ་གྱེན་ལོག་སྒྲིག་འཛུགས་ནང་གི་སྟོབས་ཆེ་ཤོས་དེ་ཡིན་པར་ཡོངས་གྲགས་ངོས་འཛིན་བྱེད་ཀྱི་ཡོད་པ་རེད།

གཟའ་སྤེན་པའི་ཉིན་གྱེན་ལོག་པ་ཚོས་ས་གནས་གཞུང་དང་ཞི་མོལ་བྱ་འདོད་ཡོད་པའི་གསལ་བསྒྲགས་སྤེལ་བ་དེའི་ནང་ཞི་མོལ་གྱི་ཆ་རྐྱེན་དུ་མངའ་སྡེའི་གཞུང་གི་ངོས་ནས་བཟང་ལན་དང་ཕན་ཐོགས་ལྡན་པའི་འཆར་གཞི་ཡོད་དགོས་པ་དང་ཤིང་ནགས་ཁུལ་གནས་པའི་ས་གནས་གྲངས་ཉུང་མི་རིགས་ཚོའི་ཐོག་དྲག་གནོན་མཚམས་འཇོག་ངེས་པར་བྱ་དགོས་རྒྱུའི་དགོས་འདུན་བཏོན་ཡོད་པ་རེད།

ད་དུང་གསལ་བསྒྲགས་དེའི་ནང་ཞི་མོལ་འགོ་འཛུགས་ཡོང་རྒྱུར་ཕན་ཚུན་ཡིད་ཆེས་འབྱུང་ཐབས་ཀྱི་ཁོར་ཡུག་ངེས་པར་བསྐྲུན་དགོས་ལུགས་བརྗོད་འདུག རྒྱ་གར་གྱི་སྲིད་བློན་མན་མོ་ཧན་སིང་མཆོག་གིས་མའོ་གྱེན་ལོག་གི་གནད་དོན་འདི་ནི་རྒྱ་གར་རྒྱལ་ནང་གི་བདེ་འཇགས་ལ་ཉེན་ཁ་བཟོ་བའི་གནད་དོན་ཆེ་ཤོས་དེ་ཡིན་པ་གསུངས་ཡོད་པ་རེད༎