རྒྱལ་ཚོགས་ཀྱི་སྤྱི་ཁྱབ་དྲུང་ཆེ་མཆོག་ལུམ་སྦི་ནིར་ཕེབས་ཡོད་པ།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྦན་ཀི་མུན་མཆོག་གིས་བདག་ཅག་གི་སྟོན་པ་ཤ་ཀྱ་ཐུབ་པ་སྐུ་བལྟམས་ཡུལ་ལུམ་སྦི་ནི་ལ་གནས་མཇལ་དུ་ཕེབས་པའི་རྗེས་ཁོང་གིས་འཛམ་གླིང་རྒྱལ་ཡོངས་ནང་ཞི་བདེའི་ཆེད་ཕྱག་ལས་གནང་རྒྱུའི་བློ་སྟོབས་སྤེལ་སྐོར་གསུངས་འདུག

འདི་ལོའི་ཕྱི་ཟླ་དགུ་པའི་ནང་ཨ་མི་རི་ཀའི་གྲོང་ཁྱེར་ནིའུ་ཡོག་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གནང་སྐབས་བལ་ཡུལ་གྱི་སྲིད་བློན་པུཤ་པ་ཀ་མལ་རྡ་ཧལ་མཆོག་ནས་རྒྱལ་ཚོགས་ཀྱི་དྲུང་ཆེ་སྦན་ཀི་མུན་མཆོག་གནས་མཆོག་ལུམ་སྦི་ནི་རུ་ཕེབས་དགོས་པའི་སློབ་བསྟོན་ཕུལ་བ་བཞིན་གཟའ་སྤེན་པའི་ཉིན་སྦན་ཀི་མུན་མཆོག་ཐད་འཕུར་གནང་གྲུ་བརྒྱུད་ནས་ས་གནས་ཀྱི་བའེ་ར་ཧ་ལྦ་གནམ་ཐང་དུ་ཕེབས་འབྱོར་སྐབས་སུ་གྲྭ་བཙུན་མང་པོས་དགའ་བསུ་ཞུས་པ་མ་ཟད་ལུམ་སྦི་ནི་ཡར་རྒྱས་ཐེབས་རྩའི་ཚོགས་གཙོ་གཞོན་པ་ཀེ་ཤལྦ་ཤ་ཀྱ་ཞུ་བས་ཡར་རྒྱས་ཀྱི་ལས་དོན་སྐོར་སྐར་མ་བཅུའི་རིང་སྙན་སེང་ཞུས་འདུག དེའི་རྗེས་སུ་ལམ་སྦི་ནིར་ཡོད་པའི་དགོན་པ་དང་ལྷ་ཁང་།དེ་བཞིན་གནའ་བོའི་གནས་ཆེན་ཡུམ་སྒྱུ་མ་ལྷ་མཛེས་ཀྱི་ལྷ་ཁང་དང་ཆོས་མྱ་ངན་མེད་ཀྱི་རྡོ་རིང་ལ་སོགས་ཀྱང་གནས་མཇལ་ཞུས་འདུག ཁོང་གིས་ལུམ་སྦི་ནིའི་ཁུལ་དུ་གནས་མཇལ་གྲུབ་པའི་རྗེས་སུ་ལུམ་སྦི་ནིའི་མཛེས་སྡུག་གི་ཁོང་གི་ཡིད་དབང་འཕྲོག་སྐོར་དང་སྟོན་པ་བཅོམ་ལྡན་འདས་ཀྱི་གསུངས་པའི་ཆོས་ཀྱིས་འཛམ་གླིང་ནང་ཆོས་ལུགས་འདྲ་མིན་ལ་ཡིད་ཆེས་དད་གུས་ཞུ་མི་དང་རིག་གཞུང་འདྲ་མིན་ཡོད་པའི་མི་མང་དབར་ཞི་བདེ་དང་བརྟན་ལྷིང་།འཆམ་མཐུན་མཉམ་གནས།མཛའ་གྲོགས་དགོང་སྤེལ་གཏོང་ཐུབ་རྒྱུ་ཡིན་སྐོར་གསུངས་ཡོད་པའི་གནས་ཚུལ་འདུག