ཨ་རིའི་མི་ནི་སོ་ཊ་མངའ་སྡེ་གཞུང་གིས་བོད་ཀྱི་ལོ་གསར་ཉིན་མོ་ངོས་འཛིན་དང་སྲུང་བརྩི་གནང་འདུག

དེ་ཡང་ཕྱི་ཟླ་༢པའི་ཚེས་༡༩ཉིན། ཨ་རིའི་མི་ནི་སོ་ཊ་(Minnesota)་མངའ་སྡེའི་སྤྱི་ཁྱབ་བློན་ཆེན་ནམ་སྲིད་སྐྱོང་(Tim Walz)་མཆོག་གིས་ཡོངས་ཁྱབ་གསལ་བསྒྲགས་ཞིག་སྤེལ་བའི་ནང་། ད་ལོ་ཕྱི་ཟླ་༢པའི་ཚེས་༢༡ཉིན་མངའ་སྡེ་དེའི་ནང་བོད་ཀྱི་གནམ་ལོ་གསར་ཚེས་ཀྱི་ཉིན་མོ་ཞེས་ངོས་འཛིན་གྱིས་སྲུང་བརྩི་ཞུ་ཡིན་པ་གསུངས་ནས། མི་ནི་སོ་ཊ་མངའ་སྡེ་དེའི་ནང་བོད་མི་༥༠༠༠ཙམ་གནས་སྡོད་བྱེད་བཞིན་ཡོད་པ་དང་། སྤྱི་ལོ་༢༠༡༤ལོར་བོད་མིའི་བླ་ན་མེད་པའི་དབུ་ཁྲིད་༧གོང་ས་ཏཱ་ལའི་བླ་མ་མཆོག་མི་ནི་སོ་ཊར་ཆེད་ཕེབས་ཀྱིས། གང་ཉིད་རྒྱ་གར་དུ་བཙན་བྱོལ་དུ་ཕེབས་པའི་རྗེས། རྒྱ་གར་གྱི་ཕྱི་ལ་ཆེས་ཐོག་མའི་བོད་ཀྱི་ལོ་གསར་དེ་བཞིན་མི་ནི་སོ་ཊ་མངའ་སྡེའི་ནང་སྲུང་བརྩི་ཞུས་པར་ལེགས་སྲོལ་དང་སྦྲགས་མངའ་སྡེའི་སྲིད་གཞུང་གི་ངོས་ནས་༧གོང་ས་ཏཱ་ལའི་བླ་མ་མཆོག་གི་བཀའ་སློབ་ལམ་སྟོན་བཞིན་བོད་མིའི་ངོ་བོ་དང་། བོད་ཀྱི་ཆོས་དང་རིག་གཞུང་བཅས་པར་བདག་གཅེས་སྲུང་སྐྱོབ་དང་གོང་འཕེལ་ལ་རྒྱབ་སྐྱོར་ཞུ་རྒྱུའི་ཆོད་སེམས་བརྟན་པོ་ཡོད་པ་ནན་བརྗོད་གནང་འདུག
མི་ནི་སོ་ཊ་བོད་རིགས་སྤྱི་མཐུན་ཚོགས་པའི་ཚོགས་གཙོ་ངག་དབང་སྒྲོལ་དཀར་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུང་ན། ད་རེས་ཨ་རིའི་མི་ནི་སོ་ཊ་(Minnessota)་མངའ་སྡེའི་སྲིད་སྐྱོང་མཆོག་གིས་བོད་ཀྱི་ལོ་གསར་དང་འབྲེལ་བའི་གསལ་བསྒྲགས་དེ་ནི་གཞུང་འབྲེལ་གྱིས་བོད་ཀྱི་ལོ་གསར་ངོས་འཛིན་གནང་བ་ཞིག་ཡིན་པ་དང་། ང་ཚོས་འབོད་སྐུལ་ཞུས་བ་ལྟར། མངའ་སྡེ་གཞུང་གི་ངོས་ནས་མུ་མཐུད་དུ་བོད་ཀྱི་ཆོས་དང་རིག་གཞུང་བཅས་པར་བདག་གཅེས་སྲུང་སྐྱོབ་གནང་རྒྱུ་ཡིན་པ་གསུངས་བྱུང་།

གསར་འགོད་པ། དོན་གྲུབ་རྣམ་རྒྱལ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།