བློ་བཟང་དར་རྒྱས་ལགས་ཕྱིར་རང་ཁྱིམ་ལ་འབྱོར་འདུག

རྒྱ་ནག་གི་གསང་བའི་མི་སྣས་རྔ་བ་ཀིརྟི་དགོན་པའི་དགེ་འདུན་པ་དར་རྒྱས་ལགས་ཉིན་གྲངས་༡༦་ཙམ་གྱི་རིང་བཙན་ཁྲིད་བྱས་པའི་རྗེས་སུ། ཟླ་བ་འདིའི་ཚེས་༨་ཉིན་གློད་བཀྲོལ་བཏང་ནས་རང་ཁྱིམ་དུ་འབྱོར་ཡོད་འདུག
དེ་ཡང་འདི་གའི་གསར་འགོད་པས་གནས་ཚུལ་ཤེས་རྟོགས་བྱུང་གསལ་ལ། རྔ་བ་ཀིརྟི་དགོན་པའི་དགེ་འདུན་པ་དར་རྒྱས་སམ་བློ་བཟང་དར་རྒྱས་ལགས་ཕྱི་ཟླ་༥་པའི་ཚེས་༢༣་ཉིན་རྒྱ་ནག་གི་ཉེན་རྟོག་པས་ཁོང་གི་དགོན་པ་ནས་གློ་བུར་དུ་བཙན་འཁྲིད་བྱས་ཡོད་ཅིང་། དེ་ནས་ཉིན་གྲངས་༡༦་ཙམ་གྱི་རིང་དུ་ཁོང་གང་དུ་འཁྲིད་པ་དང་། གང་དུ་བཀག་ཉར་བྱས་པའི་གནས་ཚུལ་གང་ཡང་ཤེས་རྟོགས་མེད་པ་གྱུར་འདུག།
འོན་ཀྱང་རྗེས་སུ་ཁོང་ཉིད་ཀྱིས་ཁ་དཔར་ཞིག་འབྱོར་བའི་རྗེས་ཁོང་རྒྱ་ནག་གི་ཁྲིན་ཏུའུ་གྲོང་ཁྱེར་ནས་རྒྱ་ནག་ཕྱོགས་སུ་འགྲོ་ལམ་གྱི་ས་གནས་ཤིག་ཏུ་བཀག་ཉར་དྲི་རྩད་བྱས་ཡོད་ཅིང་། རིམ་པས་འདིའི་ཟླའི་ཚེས་༨་ཉིན་ཁོང་རྒྱ་ནག་གི་ཉེན་རྟོག་པས་ཁོང་གི་ཁྱིམ་དུ་བསྐྱལ་ཡོད་ཅིང་། ཁོང་ནང་དུ་མ་འབྱོར་བ་སྔོན་དུ་ཁོང་གིས་ཁ་དཔར་བཏང་ནས་སྣེ་ལེན་འཚམས་དྲི་གནང་མི་དགོས་པའི་སྐོར་གསུངས་ཡོད་པ་རེད་འདུག
ཀིརྟི་དགོན་པའི་དགེ་འདུན་པ་དར་རྒྱས་ལགས་དེ་སྔ་ཡང་རྒྱ་ནག་གི་ཉེན་རྟོག་པས་འཇུ་བཟུང་བཙོན་འཇུག་བྱས་མྱོང་ཡོད་འདུག།

གསར་འགོད་པ་ཀརྨ་རྡོ་རྗེ།