ཀོང་རེ་སི་ཚོགས་པའི་ཚོགས་གཙོས་མའོ་ཚོགས་པར་སྐྱོན་བརྗོད།

༄༅༎བལ་ཡུལ་ཀོང་རེ་སི་ཚོགས་པའི་ཚོགས་གཙོ་གིར་ཇ་པར་སའ་རྡེ་ཀོའེ་རེ་ལས་རྒྱ་གར་ནང་ཉིན་གྲངས་ལྔའི་རིང་གི་གཟིགས་སྐོར་མཇུག་སྒྲིལ་གནང་སྐབས་ཆིག་བསྒྲིལ་དམར་ཤོག་མའོ་ཚོགས་པས་སྣེ་འཁྲིད་པའི་བལ་ཡུལ་མཉམ་མཐུན་གཞུང་གིས་མི་སུ་ཞིག་གི་འདོད་བློ་ཚིམས་པའི་ལས་དོན་བྱེད་ཐུབ་མེད་སྐོར་སྐྱོན་བརྗོད་གནང་འདུག

ཁོང་གིས་མའོ་ཚོགས་པས་ཆབ་སྲིད་ཀྱི་འགན་འཁུར་ལེན་པ་ནས་བཟུང་བལ་ཡུལ་རྒྱལ་ཁབ་དེ་དག་དཀའ་རྙོག་ཆེ་བའི་གནས་སྟངས་ནང་ལྷུང་ཡོད་པ་དང་ད་ལྟའི་སྐབས་དེར་མའོ་ཚོགས་པར་སུས་ཀྱང་འདོད་པ་བྱེད་ཀྱི་མེད་ཅིང་ཁོང་ཚོས་ཁ་ནས་བཤད་ཡག་དང་དངོས་སུ་ལག་ལེན་བསྟར་ཡག་གཉིས་མཐུན་གྱི་མེད་པའི་སྐོར་འགྲེལ་བརྗོད་གནང་བཞག

ཀོའེ་རེ་ལ་དརེས་རྒྱ་གར་ལ་སྨན་བཅོས་་ཆེད་ཕེབས་ཡོད་ཚུལ་གསུངས་ཡོད་ནའང་ཕྱོགས་མང་པོ་ནས་ཚོད་དཔག་གཞན་གནང་གི་ཡོད་པའི་ཐོག་ཁོང་གིས་གསལ་བཤད་གནང་ཡོད་པའི་ནང་ཁོང་གི་ཚོགས་པས་གཞུང་སྲིད་འཛིན་སྐྱོང་མགོ་རྟིང་སློག་རྒྱུའི་འཆར་གཟི་མེད་སྐོར་གསུངས་བ་དང་འབྲེལ་མའོ་ཚོགས་པས་རྩོད་པ་རྒྱབ་རྒྱུའི་ཚབ་ཏུ་རྒྱལ་ཁབ་ཀྱི་རྩ་ཁྲིམས་ཟིན་བྲིས་རྒྱབ་ཕྱོགས་ཐད་དོ་སྣང་ཆེ་བ་བྱ་དགོས་པའི་སློབ་བསྟོན་གནང་འདུག ཀོའེ་རེ་ལ་ཡིས་ད་ལྟའི་གཞུང་དེ་འཕྲལ་སེལ་གྱི་གཞུང་ཞིག་ཡིན་ལུགས་འགྲེལ་བརྗོད་གནང་སྟེ་མའོ་ཚོགས་པས་སྣེ་འཁྲིད་པའི་གཞུང་དེེས་རྩ་ཁྲིམས་གསར་པ་ཟིན་བྲིས་འགོད་རྒྱུ་ལས་དེ་མིན་རྒྱལ་ཁབ་ཀྱི་གནད་དོན་གལ་ཆེ་དེ་ཚོའི་ཐོག་ཐག་གཅོད་བྱེད་བའི་དབང་ཚད་མེད་སྐོར་གསུངས་བཞག

སྨན་བཅོས་ཁོ་ནའི་དོན་དུ་རྒྱ་གར་ལ་ཕེབས་པ་ཡིན་གསུང་མཁན་བལ་ཡུལ་ཀོང་རེ་སི་ཚོགས་པའི་ཚོགས་གཙོ་ཀོཡེ་རེ་ལ་ཡིས་རྒྱ་གར་ནང་ཉིན་གྲངས་ལྔ་བཞུགས་ཡུལ་རིང་རྒྱ་གར་གྱི་སྦ་ར་ཏི་ཡ་ཇ་ན་ཊ་ཚོགས་པའི་དབུ་འཁྲིད་བགྲེས་པ་ཁག་ཅིག་དང་ཕྱི་འབྲེལ་བློན་ཆེན་པར་ནབ་མུ་ཁར་ཇི་དང་ཕྱི་འབྲེལ་དྲུང་ཆེ་ཤིལྦ་ཤང་ཀང་མེ་ནོན་རྣམ་གཉིས་དང་མཇལ་འཕྲད་གནང་ཡོད་པ་རེད༎