བཀའ་སྤྱི་ཐུན་མོང་ནས་གསར་འགོད་ལྷན་ཚོགས་གནང་བ།

༄༅༎སྤྱི་ཟླ་༩ ཚེས་༢༨ ཉིན་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ དགོངས་དོན་དམིགས་བསལ་ཚོགས་ཆེན་ཐེངས་ ༢ མཇུག་སྡོམ་མཛད་སྒོ་གྲུབ་རྗེས་སྲིད་སྐྱོང་བློ་བཟང་སེང་གེ་མཆོག་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དབུ་བཞུགས་ཐོག་ཉིན་བཞིའི་ཚོགས་ཆེན་དང་འབྲེལ་བའི་གསར་འགོད་ལྷན་ཚོགས་ཤིག་ཚོགས་ཡོད་པ་དང།
སྐབས་དེར་སྲིད་སྐྱོང་མཆོག་གིས། ཚོགས་ཆེན་ནང་བྱུང་བའི་དགོངས་འཆར་རྣམས་ལ་འབྱུང་འགྱུར་ལོ་ཟླའི་ནང་རིམ་བཞིན་ལག་བསྟར་དོན་འཁྱོལ་ཡོང་ཆེད་འབད་བརྩོན་གང་ཡོང་ཞུས་ཏེ། གཞིས་ལུས་བོད་མི་ཚོའི་དཀའ་ངལ་རྣམས་རྒྱལ་སྤྱིའི་སྤྱི་ཚོགས་ཀྱིས་ཤེས་པ་བཟོ་རྒྱུ་ཡིན་ཞེས་གསུངས་པ་དང་།
དེ་རྗེས་སྤྱི་འཐུས་ཚོགས་གཙོ་མཆོག་གིས། ཚོགས་ཆེན་མཇུག་སྡོམ་སྐབས་ཀྱི་རྒྱབ་གཉེར་སྙན་ཐོའི་ནང་དོན་ཚན་ ༣༡ འཁོད་ཡོད་པ་དང་། འདིར་ཚོགས་འདུ་འདིའི་ཐོག་ནས་ང་ཚོས་གྲུབ་འབྲས་གཅིག་ཐོབ་པ་ནི་བོད་མི་ཚོས་བསམ་བློ་གང་བཏང་བ་དང་ཐག་གཅོད་གང་བྱས་པ་དེ་ཕྱི་གསལ་ནང་གསལ་ཐོག་ནས་བྱེད་བཞིན་ཡོད་པ་ཐེངས་འདིའི་ཚོགས་ཆེན་བརྒྱུད་རྒྱ་ནག་ལ་གོ་བརྡ་ལན་གསལ་པོ་ཞིག་སྤྲད་ཐུབ་ཡོད་ཅེས་སོགས་གསུངས་’འདུག།