ཉི་ཧོང་གིས་ཨ་རི་དང་མཉམ་འབྲེལ་ལས་དོན་ཐག་ཉེ་རུ་གཏོང་བ།

ཉི་ཧོང་གི་སྲིད་འཛིན་མཆོག་གིས་ཉི་ཧོང་དང་ཨ་རིའི་དམག་དཔུང་གི་མཉམ་འབྲེལ་ལས་དོན་བློ་ཐག་ཉེ་རུ་གཏོང་ཐབས་གནང་བཞིན་པ་རེད།
དེ་ཡང་ཉི་ཧོང་གི་ཁྲིམས་ལུགས་ལ་བསྒྱུར་བཅོས་བཏང་བའི་རྗེས་ཉི་ཧོང་གི་སྲིད་འཛིན་སྐུ་ཞབས་Shinzo Abe མཆོག་གིས། ཨེ་ཤེ་ཡའི་མངའ་ཁུལ་ནང་ཉི་ཧོང་དང་ཨ་རིའི་དམག་དཔུང་གི་མཉམ་འབྲེལ་གྱི་ལས་དོན་བློ་ཐག་ཉེ་རུ་གཏོང་ཐབས་འབད་བརྩོན་གནང་གི་ཡོད་པ་རེད། གནས་ཚུལ་ལྟར་ན། ཉི་ཧོང་གཞུང་ཕྱོགས་ནས་རྩོད་གཞི་ཅན་གྱི་ལྷོ་རྒྱ་ནག་གི་རྒྱ་མཚོའི་ཐོག་ལ་ཨ་རིའི་དམག་དཔུང་དང་ལྷན་དུ་དམག་རྩལ་སྦྱོང་བརྡར་དང་བྱེད་སྒོ་ཁག་གཞི་རྒྱ་ཆེ་རུ་དང་མཉམ་ལས་བྱ་སྲིད་པ་ཡིན་ཞིང། ལྷོ་རྒྱ་ནག་གི་རྒྱ་མཚོ་དེ་ཡི་རྒྱ་ཁྱོན་ཡོངས་རྫོགས་སམ་ཆ་ཤས་ཤིག་རྒྱ་ནག་དང། Vietnam, Philippinesསོགས་ཀྱིས་སོ་སོའི་ས་ཁོངས་ཀྱི་བདག་དབང་ཡོད་པ་རྩོད་ལེན་བྱེད་པའི་རྙོག་གྲ་ཡོད་པ་རེད།
ན་ནིང་སྲིད་འཛིན་སྐུ་ཞབས་Shinzo Abeམཆོག་གི་བློན་ཆེན་ལྷན་ཁང་ནས་ཉི་ཧོང་གི་དམག་དཔུང་གིས་ཐོུང་གི་རྒྱལ་ཁབ་སྲུང་སྐྱོབ་ཀྱི་ཆེད་དུ་དམག་རྩལ་སྦྱོང་བརྡར་གྱི་ཐོབ་ཐང་སྤྲོད་དགོས་པའི་སྐོར་གྲོས་འཆམ་ཐག་གཅོད་བྱུང་བ་དེ་ཉི་ཧོང་གྲོས་ཚོགས་ནས་ཁྲིམས་མཐུན་གཏན་འབེབས་ཡོང་ཐབས་སུ། མ་འོངས་པའི་ཟླ་བ་འགའ་ཤས་ནང་སྲིད་འཛིན་སྐུ་ཞབས་Shinzo Abeམཆོག་གི་གཞུང་ཕྱོགས་ནས་གྲོས་ཚོགས་སུ་འབུལ་ལམ་ཞུ་རྒྱུའི་འཆར་གཞི་ཡོད་པ་རེད། སྲིད་འཛིན་གྱི་བློན་ཆེན་ལྷན་ཁང་ནས་ཐག་གཅོད་གནང་བའི་གྲོས་མཆོད་དེར་གྲོས་ཚོགས་ཐོག་མང་མོས་ཀྱི་རྒྱལ་ཁ་ཐོབ་རྒྱུ་ཡིན་པ་སྔོན་དཔག་གནང་གི་ཡོད་པ་རེད།
ཉི་ཧོང་གཞུང་གིས། ཉི་ཧོང་ནི་འཛམ་གླིང་གི་ས་ཆ་གང་དུ་གནས་པའི་རྒྱལ་སྤྱིའི་མཁའ་དབྱིངས་དང་རྒྱ་མཚོའི་ཐོག་ལ་སྦྱོང་བརྡར་དང་བྱེད་སྒོ་སྤེལ་རྒྱུར་འགན་དབང་དང་ནུས་པ་ལྡན་པར་ངོས་འཛིན་གནང་གི་ཡོད། འོན་ཀྱང་རྒྱ་ནག་ཕྱི་སྲིད་ལྷན་ཁང་གི་མགྲིན་པ་Hua Chunyingགིས་དེ་རིང་གསར་འགོད་ལྷན་ཚོགས་ཐོག ཉི་ཧོང་དང་ཨ་རི་མཐུན་ཕྱོགས་ཡུལ་གྲུ་གཉིས་པོས་དམིགས་ཡུལ་གྱི་གྲུབ་ཆ་ལས་འགལ་འཛོལ་བྱ་མི་ཆོག་པ་དང་། ལྷག་པར་དུ་ས་ཁུལ་དེའི་ནང་གི་རྒྱལ་ཁབ་ཚོའི་སྲུང་སྐྱོབ་ཀྱི་ཁེ་དབང་ལ་གནོད་འཚེ་གཏོང་ཆོག་གི་མ་རེད་ཟེར་བཤད་དེ། རྒྱ་ནག་ཕྱོགས་ནས་ཉི་ཧོང་དང་ཨ་རིའི་མཉམ་ལས་ཀྱི་ལས་དོན་དང་ཡུལ་གྲུ་གཉིས་པོའི་འབྲེལ་ལམ་འཕེལ་རྒྱས་ཀྱི་ནུས་པ་དེ། ས་ཁུལ་དེའི་ནང་དུ་ཡོད་པའི་རྒྱལ་ཁབ་ཚོའི་ཞི་བདེ་དང་ཡར་རྒྱས་བརྟན་ལྷིང་དང་མཐུན་པ་དང་ཕན་ཐོགས་སྐྲུན་ཐུབ་པ་ཞིག་གི་ཕྱོགས་སུ་བེད་སྤྱོད་གཏོང་དགོས་པའི་སྐོར་བཤད་ཡོད་པ་རེད།

གསར་འགོད་པ་གཡུ་སྒྲོན།