གླུ་པ་སོག་ཕྲུག་བཀྲིས་དོན་གྲུབ་ལགས་འཛིན་བཟུང་བྱས་ཡོད་པ།

༄༅༎འདི་ཕྱི་ལོ་༥༨དང་༢༠༠༨ལོ་ཞེས་པའི་གླུ་གཞས་དེ་བཏང་གནང་མཁན་སོག་ཕྲུག་ཤེས་རབ་ལགས་མ་ཡིན་པར་སོག་ཕྲུག་བཀྲིས་དོན་གྲུབ་ལགས་ཞུ་མཁན་དེ་ཡིན་པའི་སྐོར་བོད་ནང་ནས་གནས་ཚུལ་ངོ་སྤྲོད་གནང་མཁན་ཞིག་གིས་གསུངས་བཞག

བོད་མདོ་སྨད་རྨ་ལྷོ་སོག་རྫོང་ནས་ཡིན་པའི་གླུ་པ་སོག་ཕྲུག་ཤེས་རབ་ལགས་ཀྱིས་ཕྱི་ལོ་༥༨དང་༢༠༠༨ཞེས་པའི་གླུ་གཞས་བཏང་བའི་ཉེས་འཛུགས་འོག་རྒྱ་མིས་ཁོང་ཕྱི་ལོ་༢༠༠༨ལོའི་ཕྱི་ཟླ་བཅུ་གཉིས་པའི་ནང་འཛིན་བཟུང་བྱས་ཡོད་པའི་གནས་ཚུལ་ཞིག་ཉེ་ལམ་ཕྱི་ཕྱོགས་སུ་གསར་འགྱུར་བརྒྱུད་ལམ་ཁག་ནང་ཐོན་ཡོད་རུང་འདི་ག་རླུང་འཕྲིན་ཁང་གི་བལ་ཡུལ་གྱི་གསར་འགོད་པ་ཀླུ་འབུམ་བཀྲིས་ལགས་སུ་བོད་ནང་ནས་མིང་འདོན་གནང་འདོད་མེད་པའི་མི་སྣ་གཅིག་གིས་གནས་ཚུལ་ངོ་སྤྲོད་གནང་བའི་ནང་ཕྱི་ལོ་༥༨དང་༢༠༠༨ཞེས་པའི་གླུ་གཞས་དེ་བཏང་མཁན་སོག་ཕྲུག་ཤེས་རབ་ལགས་མ་ཡིན་པར་སོག་ཕྲུག་བཀྲིས་དོན་གྲུབ་ལགས་ཡིན་པ་དང་གླུ་གཞས་དེ་བཏང་བའི་ཉེན་ལེན་ལ་བརྟེན་ནས་ཁོང་རྒྱ་མིས་འཛིན་བཟུང་བྱས་ཡོད་པའི་གནས་ཚུལ་མིག་སྔར་སྤྱི་ཚོགས་ནང་ཁྱབ་བཞིན་ཡོད་པ་རེད།

དེ་ཡང་བོད་ནས་འགྲེལ་བརྗོད་གནང་མཁན་གྱི་མི་སྣ་དེས་གསུངས་ན་སོག་ཕྲུག་བཀྲིས་དོན་གྲུབ་ལགས་ཀྱིས་གོང་གི་གླུ་གཞས་དེ་ཡོད་པའི་རོལ་གཞས་ཀྱི་སྒྲ་འཁོར་སི་ཌི་གསར་པ་ཞིག་འདོན་སྤེལ་གནང་རྒྱུའི་གྲ་སྒྲིག་ཆ་ཚང་གནང་ཡོད་རུང་སྒྲ་འཁོར་སི་ཌི་དེའི་ནང་གི་ཕྱི་ལོ་༥༨དང་༢༠༠༨ལོ་ཞེས་པའི་གླུ་གཞས་ཀྱི་ནང་དོན་གྱི་རྐྱེན་པས་སྒྲ་འཁོར་དེ་འགྲེམས་སྤེལ་གནང་ཐུབ་མེད་པ་རེད། ཡིན་ནའང་ཁོང་གིས་བཏང་གནང་བའི་གོང་ཞུས་གླུ་གཞས་དེ་བོད་ཀྱི་ས་ཁུལ་མང་པོའི་ནང་མང་ཚོགས་ཀྱི་ལག་འཁྱེར་ཁ་པར་དང་དྲ་རྒྱའི་ཐོག་ཁྱབ་ཡོད་པ་མ་ཟད་བོད་མི་མང་པོ་ཞིག་གིས་གླ་གཞས་དེར་དོ་སྣང་དང་དགའ་མོས་ཆེན་པོ་བྱེད་བཞིན་ཡོད་པའི་སྐོར་བོད་ནས་ཞལ་པར་གནང་མཁན་དེས་འདི་ག་རླུང་འཕྲིན་ཁང་གི་བལ་ཡུལ་གྱི་གསར་འགོད་པར་འགྲེལ་བརྗོད་གནང་བཞག