རྒྱ་གར་དུ་ས་སྣུམ་རིན་གོང་སྤར་བར་ངོ་རྒོལ།

༄༅༎ཉེ་ཆར་རྒྱ་གར་གཞུང་ནས་ས་སྣུམ་གྱི་རིན་གོང་སྤར་ཆ་གནང་ཡོད་པར་བརྟེན་མང་ཚོགས་ཀྱི་དཀའ་ངལ་ཆེ་རུ་ཕྱིན་ཡོད་པས་མ་ཟད་ཕྱོགས་འགལ་ཚོགས་པ་ཚོས་ཀྱང་གཞུང་ལ་སྐྱོན་བརྗོད་བྱེད་རྒྱུའི་གོ་སྐབས་ཀྱང་ཆེ་རུ་ཕྱིན་ཡོད་པ་རེད། དེ་རིང་གཟའ་ཕུར་བུའི་ཉིན་ཕྱོགས་འགལ་ཚོགས་པ་ཚང་མ་མཉམ་རུབ་དང་། ཚོང་པའི་མཐུན་ཚོགས་བཅས་ཚང་མས་ངོ་རྒོལ་གྱི་ཚུལ་དུ་གྲོང་ཁྱེར་ཆེ་ཆུང་ཚང་མའི་ཚོང་ཁང་སྒོ་རྒྱབ་པས་མ་ཟད་གྲོང་ཁྱེར་ཆེ་ཁང་ནང་ངོ་རྒོལ་སྐད་འབོད་ཀྱི་ལས་འགུལ་ཡང་སྤེལ་ཡོད་པ་རེད། དེ་ཡང་ཕྱོགས་འགལ་ཚོགས་པ་ཆེ་ཤོས་བྷི་ཇེ་པིའི་མགྲིན་ཚབ་པ་པཱར་ཀཤ་ཇ་ལྦེ་ཀར་གྱིས། ང་ཚོས་དེ་རིང་ལས་འགུལ་སྤེལ་བ་འདི་ལམ་ལྷོང་ལྡན་པ་ཞིག་བྱུང་སོང་བས་ད་ཆ་གཞུང་གི་ངོས་ནས་ཐག་ཆོད་དེ་བཞིན་འགྱུར་བ་གཏོང་དགོས་ཆགས་ཀྱི་རེད་ཅེས་འགྲེལ་བརྗོད་གནང་འདུག

ཡང་ལྡི་ལིའི་ནང་གི་ཚལ་ཚོང་མཁན་ཞིག་གིས། བཟའ་འབྲུའི་རིན་གོང་ཧ་ཅང་འཕར་འགྲོ་གི་ཡོད་པ་དེས་ང་ཚོར་ཧ་ཅང་དཀའ་ངལ་ཆེན་པོ་འཕྲད་ཀྱི་འདུག ཡིན་ནའང་དེའི་ཐོག་གཞུང་གིས་གང་ཡང་གནང་གི་མི་འདུག་པས་དེ་རིང་ལས་འགུལ་འདི་བརྒྱུད་ང་ཚོས་གཞུང་ལ་བརྡ་ལན་གསལ་པོ་ཞིག་སྤྲོད་རྒྱུ་ཡིན་ཞེས་འགྲེལ་བརྗོད་བྱས་འདུག ཡང་ས་སྣུམ་ཚོང་ལས་ཚན་པ་ཆེ་ཁག་ཞིག་གི་འགན་འཛིན་གྱིས། ས་སྣུམ་གྱི་ད་ལྟའི་གནས་སྟངས་ཀྱི་ཆ་ནས་རིན་གོང་སྒོར་རེ་གཉིས་ཆག་སྲིད་པ་རེད། ཡིན་ནའང་གནད་དོན་དེའི་ཐོག་སང་ཉིན་རེས་གཟའ་པ་སངས་ཉིན་གསལ་པོ་ཆགས་ཀྱི་རེད་ཅེས་གསུངས་ནས་གང་ལྟར་མི་མང་གི་ལས་འགུལ་དང་ཕྱོགས་འགལ་ཚོགས་པ་ཚོས་སྐྱོན་བརྗོད་བྱས་པ་དེས་གྲུབ་འབྲས་ཕྲན་བུ་ཐོན་པའི་རེ་བ་ཡོད་པའི་རྣམ་པ་བསྟན་ཡོད་པ་རེད།