རྒྱ་གར་བློན་ཆེན་བལ་ཡུལ་དུ་འཚམས་འདྲི་གཟིགས་སྐོར་གནང་བ།

༄༅༎རྒྱ་གར་གྱི་གྲོས་ཚོགས་ལས་དོན་དང་ཆུའི་ཐོན་ཁུངས་ཀྱི་བློན་ཆེན་པ་ལྦན་ཀུ་མའར་སྦན་སལ་མཆོག་གིས་བལ་ཡུལ་ནང་ཉིན་གཉིས་རིང་གཟིགས་སྐོར་གནང་ཕྱིར་ཁ་ས་རྒྱལ་ས་ཀཐ་མན་དྲུའི་ནང་ཕེབས་འབྱོར་བྱུང་ཡོད་པ་དང་ཕྱི་དྲོ་ཁོང་གིས་བལ་ཡུལ་གྱི་སྲིད་བློན་མཱ་རྡེལྦ་ཀུ་མར་ནེ་པལ་མཆོག་གི་གཞུང་འབྲེལ་གཟིམ་ཤག་སྦ་ལུ་ལྦ་ཊར་ཞེས་པའི་ནང་མཇལ་འཕྲད་བཀའ་མོལ་གནང་འདུག

སྐབས་དེར་དབུ་འཁྲིད་རྣམ་གཉིས་ཀྱིས་ཀོ་སི་ཟེར་བའི་རྒྱུག་ཆུར་ཆུ་རགས་གསར་རྒྱག་དང་ཆུ་རགས་རྙིང་པ་ཁག་ཉམས་གསོའི་ཆེད་རྒྱ་གར་གཞུང་གིས་མཐུན་འགྱུར་རོགས་རམ་གནང་ཕྱོགས་ཐད་བཀའ་མོལ་གནང་འདུག

ད་རེས་རྒྱ་གར་གྱི་བློན་ཆེན་པཱ་ལྦན་ཀུ་མར་སྦན་སལ་མཆོག་བལ་ཡུལ་ནང་གཟིགས་སྐོར་དུ་ཕེབས་དོན་གཙོ་བོ་ཡང་ཀོ་སི་རྒྱུག་ཆུར་ཆུ་རགས་རྒྱག་པ་ཁག་དང་ཉམས་གསོ་བྱེད་བཞིན་པ་ཁག་ལ་རྟོག་ཞིབ་གནང་ཕྱིར་ཡིན་པ་རེད། སྔ་ལོའི་ཕྱི་ཟླ་བརྒྱད་པའི་ནང་ཀོ་སི་ཆུ་ལོག་རྒྱབ་སྟེ་བལ་ཡུལ་དང་ཁྱིམ་མཚེས་རྒྱལ་ཁབ་རྒྱ་གར་གྱི་གྲོང་གསེབ་མང་པོ་ཆུའི་འོག་ཐིམ་ནས་ཡུལ་མི་སྟོང་ཕྲག་མང་པོ་སྡོད་ཁྱིམ་མེད་པ་ཆགས་པའི་རྗེས་སུ་རྒྱ་གར་གྱི་བློན་ཆེན་ཞིག་བལ་ཡུལ་ནང་གཟིགས་སྐོར་ཕེབས་པ་ད་རེས་ཐེངས་དང་པོ་ཡིན་པ་རེད། ད་རིང་གཟའ་ཉི་མའི་ཉིན་བློན་ཆེན་སྦན་སལ་མཆོག་གིས་ཀོ་སི་རྒྱུག་ཆུར་རྒྱབ་པའི་ཆུ་རགས་གསར་རྙིང་གཉིས་ཀར་རྟོག་ཞིབ་གནང་འཆར་ཡོད་པའི་གནས་ཚུལ་འདུག།