རྒྱ་གར་གྱི་ཕྱི་སྲིད་བློན་ཆེན་མཆོག་བལ་ཡུལ་དུ་ཕེབས་ཡོད་པ།

༄༅༎རྒྱ་གར་གྱི་ཕྱི་སྲིད་བློན་ཆེན་ཨེསི་ཨེམ་ཀི་རིཤ་ན་ཉིན་གསུམ་གྱི་རྒྱལ་དོན་འཚམས་གཟིགས་ཆེད་བལ་ཡུལ་དུ་ཕེབས་འབྱོར་ཟིན་ཡོད་འདུག

དེ་ཡང་བརྒྱུད་ལམ་ཁག་ནང་གནས་ཚུལ་སྤེལ་བར་གཞིགས་ན་འདི་ཚེས་༡༥ཉིན་བལ་ཡུལ་རྒྱལ་ས་ཀཐ་མན་དྲུའི་ནང་འབྱོར་མ་ཐག་རྒྱ་གར་ཕྱི་སྲིད་བློན་ཆེན་གྱིས་ཡུལ་དེའི་སྲིད་བློན་མ་རྡལྦ་ཀུ་མའར་ནེ་པལ་དང་ཕྱི་སྲིད་བློན་ཆེན་ལྕམ་སུ་ཇ་ཏ་ཀོའེ་རེ་ལ་རྣམ་གཉིས་མ་ཇལ་འཕྲད་གནང་སྟེ་ཡུལ་གྲུ་གཉིས་ཀྱི་ས་མཚམས་ས་ཁུལ་དུ་བདེ་འཇགས་ཀྱི་གནས་སྟངས་དང་བལ་ཡུལ་ནས་རྒྱ་གར་གྱི་ཕྱོགས་སུ་རྒྱུགས་བཞིན་པའི་གཙང་ཆུ་རྒྱས་པའི་རྐྱེན་གྱིས་ཆུ་ལོག་གི་རྐྱེན་ངན་རིགས་འགོག་ཐབས་སོགས་ཀྱི་སྐོར་བཀའ་བསྡུར་གནང་ཡོད་སྐོར་བལ་ཡུལ་གཞུང་འབྲེལ་དཔོན་རིགས་ར་ཇན་སྦ་ཏ་རའེ་ཡིས་གསར་འགོད་པར་འགྲེལ་བརྗོད་གནང་འདུག་ལ་ ཡང་གནས་ཚུལ་ནང་མུ་མཐུད་གསལ་བར་བྱས་ན་རྒྱ་གར་གྱི་ཕྱི་སྲིད་བློན་ཆེན་ནས་ཉིན་དེར་བལ་ཡུལ་ནང་གཞུང་ལམ་གསར་རྒྱག་དང་གྲོང་གསེབ་ས་ཁུལ་དུ་གློག་འཁྲིད་རྒྱུ་ དེ་བཞིན་ཡུལ་དེའི་ནང་ཚན་རིག་སློབ་སྦྱོང་བྱེད་སའི་མཐོ་སློབ་ཅིག་གསར་རྒྱག་བྱ་རྒྱུའི་ལས་དོན་བཅས་པར་རྒྱ་གར་གཞུང་གིས་རོགས་རམ་མཁོ་སྤྲོད་བྱ་རྒྱུའི་གྲོས་མཐུན་ཞིག་གི་ཐོག་ས་རྟགས་ཡང་བཀོད་ཡོད་པ་མ་ཟད་རྒྱ་གར་གྱི་ཕྱི་སྲིད་བློན་ཆེན་ཀི་རིཤ་ན་ཡུལ་དེར་ཉིན་གྲངས་གསུམ་བཞུགས་རྒྱུན་རིང་ཁོང་ནས་རྒྱལ་ཁབ་གཉིས་ཀྱི་འབྲེལ་ལམ་སྤྱི་དང་ལྷག་པར་ཡུལ་གྲུ་གཉིས་ཀྱི་ས་མཚམས་དབྱེ་འབྱེད་གསལ་པོ་མེད་པའི་དཀའ་ངལ་ཞིག་འཕྲད་བཞིན་ཡོད་པ་དེའི་སྐོར་བལ་ཡུལ་གྱི་དཔོན་རིགས་ཚོའི་ལྷན་དུ་མུ་མཐུད་བཀའ་བསྡུར་གནང་འཆར་ཡོད་པའི་གནས་ཚུལ་བཀོད་འདུག།