རྒྱ་གར་གྱིས་ཏ་ལི་སྦན་དང་མཉམ་འབྲེལ་བ་གནང་སྲིད་པའི་སྐོར།

༄༅༎ཏ་ལི་སྦན་གྱི་སྒྲིག་འཛུགས་དེ་བཞིན་ཨེལ་ཁེ་ཌ་སོགས་དང་འབྲེལ་བ་ཉེ་པོ་ཡོད་པའི་འཇིགས་སྐུལ་དྲག་སྤྱོད་ཚོགས་པ་ཞིག་ཡིན་པར་རྒྱ་གར་གཞུང་གིས་ངོས་འཛིན་མུ་མཐུད་གནང་གི་ཡོད་པ་རེད་ འོན་ཀྱང་ཨ་མི་རི་ཀ་སོགས་ཀྱིས་འཛིན་བཞིན་པའི་སྲིད་བྱུས་གཞིར་བཟུང་ཨཕ་ག་ནི་སི་ཏན་ནང་གི་ཏ་ལི་སྦན་ཚོགས་མིའི་ཁོངས་ནས་ཞི་འཇམ་གྱི་ལྟ་གྲུབ་འཛིན་མཁན་ཚོ་དང་ལྷན་དུ་རྒྱ་གར་གྱིས་མཉམ་འབྲེལ་གནང་རྒྱུའི་དགོངས་པ་བཞེས་ཀྱི་ཡོད་པ་རེད་

ཨཕ་ག་ནི་སི་ཏན་གྱི་གཞུང་ནང་མཉམ་ཞུགས་བྱ་རྒྱུའི་འདུན་པ་ཡོད་པའི་ཏ་ལི་སྦན་གྱི་ཚོགས་མི་དེ་ཚོ་ཨཕ་ག་ནི་སི་ཏན་གྱི་ཆབ་སྲིད་ལམ་སྲོལ་ནང་དུ་འཇུག་རྒྱུར་རྒྱལ་སྤྱིའི་ཕྱོགས་ནས་གྲོས་འཆར་ཞིག་བཏོན་ཡོད་པ་རེད་ གྲོས་འཆར་དེ་ལ་ཞི་འཇམ་གྱི་ལྟ་གྲུབ་འཛིན་མཁན་ཏ་ལི་སྦན་གྱི་ཚོགས་མི་ཚོས་ཆ་རྐྱེན་ཁག་གསུམ་ལ་ཁས་ལེན་བྱས་པ་ཡིན་ན་རྒྱ་གར་གཞུང་གིས་རྒྱབ་སྐྱོར་གནང་གི་རེད་ཅེས་ རྒྱ་གར་གྱི་ཕྱི་སྲིད་བློན་ཆེན་ཨེསི་ཨེམ་ཀི་རིཤ་ནས་རྒྱ་གར་གྱི་དུས་བབ་ཅེས་པའི་རྒྱ་གར་གྱི་ཉིན་རེའི་གསར་ཤོག་གི་གསར་འགོད་པར་ཁ་ས་གསུངས་ཡོད་པ་རེད་ ཨཕ་ག་ནི་སི་ཏན་གྱི་གཞུང་དང་ཆབ་སྲིད་ལམ་ལུགས་ནང་མཉམ་ཞུགས་བྱ་རྒྱུའི་འདུན་པ་ཡོད་པའི་ཨཕ་ག་ནི་སི་ཏན་གྱི་ཏ་ལི་སྦན་ཚོས་ ཁས་ལེན་བྱེད་དགོས་པའི་ཆ་རྐྱེན་གསུམ་པོ་ནི་ དང་པོ་ཨཕ་ག་ནི་སི་ཏན་གྱི་རྩ་ཁྲིམས་ཁས་ལེན་དགོས་པ་དང་ གཉིས་པ་ཨེལ་ཁེ་ཌ་སོགས་འཇིགས་སྐུལ་དྲག་སྤྱོད་སྒྲིག་འཛུགས་ཁག་དང་འབྲེལ་བ་བཅད་དགོས་པ་ གསུམ་པ་འཚེ་བའི་བྱ་སྤྱོད་རིགས་རྩ་བ་ནས་སྤོང་དགོས་པ་བཅས་ཡིན་པ་རེད།