ཟས་བཅད་ངོ་རྒོལ་བའི་སྐུ་གཟུགས་སྐྱོ་རུ་འགོ་བཞིན་པ།

༄༅༎བོད་དོན་ཆེད་ཨ་རིའི་གྲོང་ཁྱེར་ནིའུ་ཡོརྐ་གི་འཛམ་གླིང་མཉམ་འབྲེལ་རྒྱལ་ཚོགས་མདུན་དུས་ཚོད་ངེས་མེད་བར་བཟས་བཅད་ངོ་རྒོལ་གནང་ནས་བདུན་གཉིས་པའི་ནང་སླེབས་ཡོད་པའི་ དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་གསུམ་གྱི་སྐུ་གཟུགས་ཀྱི་གནས་བབ་སྐྱོ་རུ་འགྲོ་ཡི་ཡོད་པའི་གནས་ཚུལ་འདུག
བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས་བཟས་བཅད་ངོ་རྒོལ་གནང་མཁན་ཚོགས་མི་གསུམ་གྱི་གསུང་ཤུགས་ཆུང་དུ་ཕྱིན་ཡོད་པ་དང༌། སྐུ་སྟོབས་ཀྱང་ཉམ་རྒུད་འགྲོ་བཞིན་ཡོད་སྐོར་འགྲེལ་བརྗོད་དང་འབྲེལ། ཤིང་ཛ་རིན་པོ་ཆེའི་སྐུ་གཟུགས་ཀྱི་ལྗིད་ཚད་ཀི་ལོ་༣མར་ཆག་ཡོད་པ་དང༌། རྡོར་རྗེ་རྒྱལ་པོ་ལགས་དང་ཡེ་ཤེས་བསྟན་འཛིན་ལགས་གཉིས་ཀི་ལོ་༢རེ་ཆག་ཡོད་པ་རེད། འོན་ཀྱང་ཁོང་གསུམ་གྱིས་འཛམ་གླིང་མཉམ་འབྲེལ་རྒྱལ་ཚོགས་དང་འཛམ་གླིང་གི་དབུ་འཁྲིད་ཚོར་བོད་ཐོག་རྒྱ་ནག་གིས་དྲག་རྩུབ་ཆེན་པོ་བྱེད་བཞིན་ཡོད་པ་དེ་དག་མཚམས་འཇོག་ཡོང་ཐབས་སུ་རྒྱ་གཞུང་ཐོག་གནོན་ཤུགས་སྐྱོན་དགོས་པའི་འབོད་སྐུལ་མུ་མཐུད་ཞུ་རྒྱུའི་ཆོད་སེམས་གཏན་པོ་ཡོད་སྐོར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས་གསུངས་བཞག།