བལ་ཡུལ་དུ་མའོ་ཚོགས་པས་རྒྱལ་ཡོངས་སུ་ངོ་རྒོལ་བྱ་འཆར།

༄༅༎བལ་ཡུལ་གྱི་ཁྲིམས་བཟོའི་འཐུས་མིའི་ལྷན་ཚོགས་ཀྱི་ཚོགས་གཙོ་སུ་སྦཤ་ནམ་ལྦང་མཆོག་གིས་བལ་ཡུལ་གྱི་སྲིད་འཛིན་གྱིས་ཁྲིམས་འགལ་བྱ་སྤྱོད་བྱུང་ལུགས་ཀྱི་མའོའི་དམར་ཤོག་ཚོགས་པའི་གྲོས་འཆར་ངོས་ལེན་མ་གནང་བར་བརྟེན་མའོའི་དམར་ཤོག་ཚོགས་པས་གྲོས་འཆར་གྱི་ལས་རིམ་བཀག་འགོག་བྱ་རྒྱུ་མ་ཟད་རྒྱལ་ཡོངས་ནང་ངོ་རྒོལ་ལས་འགུལ་སྤེལ་རྒྱུའི་གསལ་བསྒྲགས་གནང་འདུག

མའོའི་དམར་ཤོག་ཚོགས་པའི་སྲིད་གཞུང་གིས་དམག་སྤྱི་གནས་དབྱུང་བཏང་ཡང་སྲིད་འཛིན་གྱིས་དམག་སྤྱིའི་ལས་གནས་རང་སོར་གནས་དགོས་པའི་བཀོད་ཁྱབ་བཏང་བར་བརྟེན་མའོའི་དམར་ཤོག་ཚོགས་པའི་འགོ་ཁྲིད་པཱར་ཅན་རྡ་ཡིས་སྲིད་བློན་ལས་གནས་ནས་དགོང་ཞུ་གནང་བ་རེད། འོན་ཀྱང་སྲིད་འཛིན་རཱམ་སྦ་རན་ཡ་རྡལྦ་མཆོག་གིས་སྲིད་བློན་གྱིས་དམག་སྤྱི་གནས་དབྱུང་བཏང་བར་བརྩི་མེད་ཀྱིས་དམག་སྤྱིའི་ལས་གནས་རང་སོར་ཆུད་པ་གནང་བ་ནི་ཁྲིམས་འགལ་ཡིན་པར་མའོའི་དམར་ཤོག་ཚོགས་པས་ངོས་འཛིན་བྱེད་ཀྱི་ཡོད་པ་རེད། མའོའི་དམར་ཤོག་ཚོགས་པས་དམག་སྤྱི་གནས་དབྱུང་བཏང་བའི་རྒྱུ་མཚན་བཀོད་པ་ནི་ཞི་བའི་སྲིད་གཞུང་གི་སྟངས་འཛིན་འོག་དྲག་པོའི་སྒྲིག་འཛུགས་ཚུད་དགོས་ལུགས་འགྲེལ་བརྗོད་གནང་གི་ཡོད་པ་རེད། འོན་ཀྱང་དྲག་པོའི་སྒྲིག་འཛུགས་ཀྱིས་སྲིད་འཛིན་ལ་འགན་ཁུར་བྱེད་དགོས་པའི་ལམ་སྲོལ་ཨེ་ཤེ་ཡའི་མང་གཙོའི་ཡུལ་གྲུ་ཕལ་མོ་ཆེའི་ནང་ཡོད་པ་རེད། གང་ལྟར་བལ་ཡུལ་གྱི་ཁྲིམས་བཟོའི་འཐུས་མི་དྲུག་བརྒྱ་གཅིག་ཡོད་པའི་ཚོགས་གཙོ་སུ་སྦཤ་ནེམ་ལྦང་གིས་དྲང་པོ་བྱེད་ཀྱི་མེད་པ་དང་མི་མང་གི་བགྲོ་གླེང་བྱེད་ཆོག་པའི་ཐོབ་ཐང་འཕྲོག་གི་ཡོད་ལུགས་མའོའི་དམར་ཤོག་ཚོགས་པས་སྐྱོན་བརྗོད་བྱེད་ཀྱི་ཡོད་པ་རེད།།