༧གོང་ས་མཆོག་ནས་བཀྲིས་ལྷུན་པོ་དགོན་པའི་གཙུག་ལག་ཁང་དབུ་འབྱེད།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་རྒྱ་གར་ཀ་ན་ཊ་ཀ་མངའ་སྡེའི་སྲིད་སྐྱོང་དབུ་བཞུགས་ཀྱི་ཐོག་ཆོས་སྡེ་བཀྲིས་ལྷུན་པོ་དགོན་པའི་གཙུག་ལག་ཁང་གསར་བཞེངས་ལེགས་གྲུབ་ཟིན་པའི་རྟེན་འབྲེལ་གྱི་མཛད་སྒོ་དེ་རིང་ཕྱི་ཚེས་༡༩ཉིན་ཚུགས་གནང་འདུག    
ཁ་ས་ཕྱི་ཚེས་༡༨ཉིན་༧གོང་ས་མཆོག་དབུ་བཞུགས་ཐོག་ཆོས་སྡེ་བཀྲིས་ལྷུན་པོ་དགོན་པའི་གཙུག་ལག་ཁང་གསར་བཞེངས་ལེགས་གྲུབ་ཟིན་པའི་དབུ་འབྱེད་རབ་གནས་བཀའ་དྲིན་བསྐྱངས་གནང་མཛད་པའི་རྗེས། དེ་རིང་༧གོང་ས་མཆོག་དང་མངའ་སྡེའི་སྲིད་སྐྱོང་རྣམ་གཉིས་དབུ་བཞུགས་ཀྱིས་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་སེར་སྐྱ་མི་མང་འཕོན་ཆེ་འདུ་འཛོམས་ཀྱིས་བཀྲིས་ལྷུན་པོ་དགོན་པའི་གཙུག་ལག་ཁང་གསར་བཞེངས་ལེགས་གྲུབ་ཟིན་པའི་རྟེན་འབྲེལ་གྱི་མཛད་སྒོར་མཉམ་བཞུགས་གནང་ཡོད་པ་རེད།  མཛད་སྒོའི་ཐོག་༧གོང་ས་༧སྐྱབས་མགོན་ཆེན་པོ་མཆོག་ནས་སངས་རྒྱས་ཀྱི་ལུང་རྟོགས་བསྟན་པ་གཉིས་པོ་དེ་བཤད་གྲུབ་གཉིས་ཀྱི་སྒོ་ནས་འཛིན་སྐྱོང་སྤེལ་གསུམ་བྱ་དགོས་པའི་ལམ་སྟོན་བཀའ་སློབ་བསྩལ་ཡོད་འདུག   བཀྲིས་ལྷུན་པོའི་དགོན་པའི་མཁན་པོ་ནས་༧གོང་ས་མཆོག་གིས་གཙུག་ལག་ཁང་གསར་བཞེངས་དགོས་པའི་ལམ་སྟོན་བསྩལ་བ་མ་ཟད་དཔལ་འབྱོར་གྱི་མཐུན་འགྱུར་ཡང་གནང་བའི་སྐོར་གསུངས་འདུག།

གསར་འགོད་པ་འཆི་མེད་ལྷུན་གྲུབ།  

མཛད་སྒོ་དང་འབྲེལ་བའི་གནས་ཚུལ་ཞིབ་ཕྲ་གཤམ་འདི་གའི་ས་གནས་གསར་འགོད་པ་པདྨ་དངོས་གྲུབ་ལགས་ཀྱིས་བཏང་བར་གསན་རོགས་ཞུ༎

གསར་འགོད་པ་པདྨ་དངོས་གྲུབ།