༸གོང་ས་མཆོག་ཉིན་ཤས་ནང་སྨན་ཁང་ནས་ཕྱིར་ཕེབས་ཐུབ།

༄༅༎རེས་གཟའ་པ་སངས་ཉིན་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་མཁྲིས་རྡོ་བཏོན་གནང་པའི་རྗེས་ད་ཆ་སྐུ་ཁམས་དྭངས་སྐྱེས་སུ་ཕེབས་བཞིན་ཡོད་པ་དང་ཉིན་ཤས་ནང་ཚུད་སྨན་ཁང་ནས་ཕྱིར་ཕེབས་གནང་རྒྱུ་ཡིན་འདུག

དེ་ཡང་དཔལ་ལྡན་སྐུ་སྒེར་ཡིག་ཚང་གི་དྲུང་ཆེའི་ཕྱག་རོགས་སྟག་ལྷ་བསྟན་འཛིན་རྣམ་དག་ལགས་ཀྱིས་ཕེ་རན་སི་གསར་སྤེལ་ལས་ཁང་ལ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཁམས་མགྱོགས་མྱུར་དྭངས་སྐྱེས་སུ་ཕེབས་བཞིན་པར་མ་ཟད་སྔ་འཕྲོས་བདུན་ཕྲག་གཅིག་རིང་ལྡི་ལིར་བཞུགས་བཞག་མཛད་སྟེ་མུ་མཐུད་བརྟག་དཔྱད་ཞུ་གནང་མཛད་རྒྱུ་ཡིན་པ་དང་དེ་རྗེས་བཞུགས་སྒར་རྡ་རམ་ས་ལར་ཕྱིར་ཕེབས་གནང་རྒྱུ་ཡིན་པ་གསུངས་འདུག

ད་དུང་སྟག་ལྷ་བསྟན་འཛིན་རྣམ་དག་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་སྔོན་ཚུད་ནས་གཏན་འབེབས་ཟིན་པའི་ཟླ་བ་འདིའི་ཟླ་མཇུག་གི་ཉི་ཧོང་དུ་གཟའ་འཁོར་གཅིག་རིང་ཆིབས་བསྒྱུར་གནང་རྒྱུའི་མཛད་འཆར་ལ་འགྱུར་བ་གང་ཡང་མེད་པ་འགྲེལ་བརྗོད་ཀྱང་གནང་བཞག