གཞོན་སྐྱེས་རྣམས་ནས་ཞི་བདེ་དང་བྱམས་བརྩེ་ལྡན་པའི་འཛམ་གླིང་ཞིག་བསྐྲུན་དགོས།

༄༅། །དེའང་ཁ་ས་སྤྱི་ཚེས་ ༡༨ ཉིན་གྱི་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་སྤེལ་བའི་གནས་ཚུལ་ལྟར་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་  ཁ་ས་རྒྱ་གར་རྒྱལ་ས་ལྡི་ལིར་༸ཞབས་སོར་འཁོད་རྗེས། མཛད་འཕྲིན་གྱི་ཐོག་མར་སྔ་དྲོ་སལ་ཝན་སློབ་གྲྭའི་དགེ་སློབ་རྣམས་ལ་རྒྱ་གར་གནའ་རབས་ཀྱི་སེམས་ཁམས་རིག་པ་གཙོ་བོར་གྱུར་བའི་ལེགས་བཤད་དེ་དག་སླར་གསོ་དགོས་གལ་ཆེ་བའི་སྐོར་བཀའ་སློབ་བསྩལ་གནང་མཛད་ཡོད་པ་དང་། མགོན་པོ་གང་ཉིད་ཁུལ་དེར་༸ཞབས་སོར་འཁོད་སྐབས། སློབ་སྤྱི་ལྕམ་སྐུ་ ཨིན་དུ་ཁེ་ཏར་པཱལ་ Indu Khetarpal ལགས་ཀྱི་དབུས་པའི་དགེ་ལས་སློབ་ཕྲུག་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་གནང་པ་མ་ཟད།  
དེ་ནས་༸གོང་ས་མཆོག་གིས་བཀའ་སློབ་སྩལ་དོན།  ཆོས་གྲོགས་རྒན་གཞོན་ཕོ་མོ་རྣམས་ལ་འཚམས་འདྲི་ཞུ་རྒྱུ་ཡིན།  ཨི་ཇིབ་དང་རྒྱ་ནག་དེ་བཞིན་ཨིན་ཌ་སི་ཝེ་ལི་ Indus Velly སོགས་གནའ་རབས་སྤྱི་ཚོགས་ཀྱི་དཔལ་ཡོན་ཁྲོད། རྒྱ་གར་གནའ་རབས་ཀྱི་སྤྱི་ཚོགས་དཔལ་ཡོན་ནང་རིག་པ་སྨྲ་བ་མང་ཤོས་ཐོན་ཡོད།
དེར་བརྟེན་རྒྱ་གར་ལ་མཚོན་ན་ཆོས་དད་ཙམ་མིན་པར་སྲོལ་རྒྱུན་ལམ་ནས་འགྲོ་བ་མིའི་རྣམ་དཔྱོད་ཡར་རྒྱས་གཏོང་རྒྱུའི་ནུས་པ་ཧ་ཅང་ལྡན་ཡོད། རྒྱ་གར་གནའ་རབས་ཀྱི་བློའི་རྣམ་གཞག་དང་། རྣམ་རྟོག་རིགས་འདྲ་མིན་ཡོད་པ་དེ་དག་ལ་གཉེན་པོ་བསྟེན་ཕྱོགས་ཀྱི་ལེགས་བཤད་དེ་དག་ཆོས་ཁས་ལེན་མིན་དང་། ཆོས་ལུགས་ཇི་ཡིན་ཁྱད་པར་གང་ཡང་མེད་པའི་ཐོག་ནས་ཐུན་མོང་གིས་སློབ་སྦྱོང་བྱེད་ཐུབ་པ་ཞིག་དང་། དེ་བརྒྱུད་འགྲོ་བ་མི་རིགས་ཀྱི་སྤྱིའི་བདེ་སྡུག་དང་། ད་ལྟའི་འཛམ་གླིང་གི་གནས་སྟངས་ཐོག་ནས་འབྲེལ་བ་ཧ་ཅང་ཆེན་པོ་ཡོད་པ་འདི་ངོས་རང་གི་ཉམས་མྱོང་ཐོག་ནས་བརྗོད་ཐུབ་ལ།
དེར་བརྟེན་འཛམ་གླིང་སྤྱི་ལ་ཞབས་འདེགས་རྒྱ་ཆེན་པོ་ཞིག་ཞུ་བར་ཐོག་མར་ལེགས་བཤད་དེ་དག་རྒྱ་གར་རང་ཉིད་ནང་སླར་གསོ་བྱ་དགོས་པ་ཧ་ཅང་གལ་ཆེན་པོ་ཆགས་ཡོད་སྟབས།  ད་ཆ་གནའ་རབས་ཀྱི་ལེགས་བཤད་སྤྱི་དང་ལྷག་པར་ཚད་མ་རིག་པའི་རྣམ་གཞག་ལ་ཁྱེད་རང་ཚོས་སློབ་སྦྱོང་བྱ་དགོས་པའི་དུས་ལ་བབ་འདུག  ཆོ་ག་ཕྱག་ལེན་ཙམ་དང་ཞལ་འདོན་བཏོན་པ་ཙམ་གྱིས་འདང་གི་མེད།
དེར་བརྟེན་འགྲོ་བ་མི་རིགས་ཐེར་འབུམ་བདུན་ལ་ཞབས་འདེགས་རྒྱ་ཆེ་བསྒྲུབ་དགོས་ན་ལེགས་བཤད་དེ་དག་ལ་ངེས་པར་དུ་སློབ་སྦྱོང་བྱེད་དགོས།  ངོས་རང་ཉིད་ཙམ་མ་ཟད་རྒྱ་གར་ལྷོ་ཕྱོགས་གཙོ་བོར་གྱུར་བའི་བོད་ཀྱི་དགོན་པ་གྲྭ་ཚང་ཁག་གི་ནང་དགེ་འདུན་ཞལ་གྲངས་ཆིག་ཁྲི་ཙམ་དང་བཙུན་མ་སྟོང་ཕྲག་འགའ་ཤས་ཡོད་པ་ཚོས་ངོས་རང་དང་མཚུངས་པར་ལེགས་བཤད་དེ་དག་ལ་སློབ་སྦྱོང་བྱེད་བཞིན་ཡོད།  ང་ཚོས་རྒྱ་གར་གནའ་རབས་ཀྱི་ལེགས་བཤད་སླར་གསོ་བྱ་རྒྱུའི་ཐད་ཞབས་འདེགས་ཕྲན་བུ་བསྒྲུབ་ཐུབ་ངེས་རེད།
དེང་དུས་ཀྱི་ཤེས་ཡོན་དང་འཕྲུལ་ཆས་ཡར་རྒྱས་ཕྱིན་པ་ཙམ་གྱིས་སེམས་ནང་ཞི་བདེ་ཐོབ་རྒྱུའི་ངེས་པ་གང་ཡང་མེད།  གང་ཡིན་བརྗོད་ན་སེམས་ཀྱི་ཞི་བདེ་དཀྲུག་མཁན་དེ་མཚོན་ཆ་མ་རེད།  སེམས་ཀྱི་ཞི་བདེ་དཀྲུག་མཁན་ཚུལ་མིན་ཡིད་བྱེད་ཀྱི་རྣམ་རྟོག་ཡིན་པ་ནི་དཔེར་ན། ཁོང་ཁྲོ་དང་རེ་དོགས་སོགས་ལ་བརྟེན་ནས་རང་རྒྱུད་དཀྲུག་བཞིན་ཡོད། བློ་མ་རུང་བ་དེ་དག་སྨོན་ལམ་བརྒྱབ་ནས་སེལ་ཐབས་མེད། བློ་སྦྱོང་ཁོ་ནའི་ཐོག་ནས་སེལ་ཐུབ་པ་ཞིག་ཡིན་ཞེས་སོགས་ཀྱི་བཀའ་སློབ་བསྩལ་གནང་མཛད་འདུག།།

གསར་འགོད་པ་ཀུན་བཟང་རིག་འཛིན།