ཨ་རིའི་བོད་དོན་དམིགས་བསལ་སྐུ་ཚབ་ཀྱིས་བོད་མི་དང་གླེང་མོལ།

༄༅༎ཁ་ས་ཨ་མི་རི་ཀའི་བོད་དོན་དམིགས་བསལ་འབྲེལ་མཐུད་སྐུ་ཚབ་ལྕམ་མ་རི་ཡ་ཨོ་ཊེ་རོ་དང་བལ་ཡུལ་ནང་གི་ཨ་རིའི་གཞུང་ཚབ་ཆེན་མོ་སི་ཀོཏ་ཌེ་ལི་སི་རྣམ་གཉིས་བལ་ཡུལ་ནང་གི་བཙན་བྱོལ་བོད་མིའི་སྣེ་ལེན་ཁང་དུ་གཟིགས་སྐོར་གནང་བ་དང་ཆབས་ཅིག་ཉེ་དུས་བོད་ནས་བྲོས་བྱོལ་དུ་འབྱོར་བའི་བོད་མི་ཁག་ཅིག་དང་མཉམ་དུ་བཀའ་མོལ་གནང་བཞག།

བོད་དོན་དམིགས་བསལ་འབྲེལ་མཐུད་སྐུ་ཚབ་ལྕམ་ཨོ་ཊེ་རོ་ད་རེས་བལ་ཡུལ་སྣེ་ལེན་ཁང་དུ་ཕེབས་ཡག་དེ་རྒྱ་གར་དང་འབྲུག་། བལ་ཡུལ་བཅས་ཀྱི་ནང་ཨ་རིའི་ཆེས་མཐོའི་གཞུང་འབྲེལ་གཟིགས་སྐོར་གྱི་ཆ་ཤས་ཤིག་ཡིན་པ་དང༌། ཡང་ཁོང་ད་རེས་བལ་ཡུལ་ནང་ཕེབས་ཡག་གི་དུས་ཚོད་དེ་བཞིན་དུས་ཡུན་རིང་པོ་ནས་གནས་སྡོད་བྱེད་མཁན་བོད་མི་དང་གསར་དུ་འབྱོར་བཞིན་པའི་བོད་མི་སྐྱབས་བཅོལ་བ་ཚོར་བལ་ཡུལ་ནང་རྒྱ་མིའི་ཤུགས་རྐྱེན་ཇི་ཆེར་འགྲོ་བཞིན་པའི་ཚོར་སྣང་ཆེན་པོ་ཡོང་བཞིན་པའི་སྐབས་ཞིག་ཀྱང་འཁེལ་ཡོད།

ལྕམ་མ་རི་ཡ་ཨོ་ཊེ་རོས་བལ་ཡུལ་ནང་གི་བོད་མི་སྐྱབས་བཅོལ་བ་ཚོའི་བདེ་འཇགས་དང་བདེ་དོན་ཆེད་ཨ་རི་གཞུང་གིས་མུ་མཐུད་རྒྱབ་སྐྱོར་གནང་གི་ཡོད་སྐོར་གསུངས་ཏེ། བཙན་བྱོལ་དུ་འབྱོར་བའི་བོད་མི་ཚོའི་བརྡ་ལན་ཨ་རི་གཞུང་ལ་འབུལ་རྒྱུའི་ཁས་ལེན་གནང་ཡོད་སྐོར་། རྒྱལ་སྤྱིའི་བོད་དོན་ལས་འགུལ་ཁང་གི་ཨ་རི་གཞུང་དང་འབྲེལ་བ་གནང་མཁན་ཀྲོདྲ་སི་ཀྲའེན་ཡིས་བལ་ཡུལ་གྱི་རྒྱལ་ས་ཀཐ་མན་དྲུ་ནས་གནས་ཚུལ་སྤེལ་གནང་འདུག བལ་ཡུལ་ནང་གི་ལྕམ་ཨོ་ཊ་རོའི་གཟིགས་སྐོར་བརྒྱུད་ལོ་མང་བལ་ཡུལ་ནང་གནས་སྡོད་བྱེད་མཁན་བོད་མི་དང་གསར་དུ་བྲོས་བྱོལ་ལ་འབྱོར་བཞིན་པའི་བོད་མི་ཚོའི་གནས་སྟངས་ཐད་ཨ་རི་གཞུང་གིས་བློ་འཚབ་གནང་གི་ཡོད་པ་གསལ་བཏོན་བྱུང་ཡོད་པ་མ་ཟད། བོད་པའི་གནད་དོན་དེ་བཞིན་ཨ་མི་རི་ཀས་བལ་ཡུལ་མཉམ་འབྲེལ་ལམ་གནང་བའི་གནད་དོན་གཙོ་བོ་ཞིག་ཆག་གི་ཡོད་སྐོར་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ཀྲོདྲ་སི་ཀྲའེན་ཡིས་འགྲེལ་བརྗོད་གནང་འདུག།