མཆིན་པའི་གཉན་ཚད་འགོག་དགོས་ན་བྱ་སྤྱོད་ད་ལྟ་ནས་སྤེལ་དགོས།

བོད་མི་མང་པོ་ཞིག་ལའང་སྲོག་ཉེན་ཅན་གྱི་མཆིན་པའི་གཉན་ཚད་ལྡན་པས་ན་སྔོན་འགོག་གི་ཐབས་ལམ་ལ་ཐུགས་སྣང་བྱེད་དགོས་ཟེར།
འཛམ་གླིང་གི་ནང་མཆིན་པའི་གཉན་ཚད་Hepatitis Bཡི་གཉན་སྲིན་ཐོག་མར་གསར་རྙེད་གནང་མཁན་དང་། ནོ་སྦེལ་གཟེངས་རྟགས་བཞེས་གནང་མཁན་སློབ་དཔོན་ཆེན་པོ་བཱ་རུ་བྷ་ལུམ་བྷར་མཆོག་གི་འཁྲུངས་སྐར་ལ་ཆེ་མཐོང་དང་གུཀྱི་ཉིན་མོ་སྲུང་བརྩི་ཞུ་བ་དང་སྦྲགས་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་མཆོག་གིས་དེ་ཉིན་གསུང་འཕྲིན་ཞིག་ཀྱང་གནང་ཡོད་པ་དང་། འཛམ་གླིང་ཁྱོན་ཡོངས་ཀྱི་ནང་སྐྱེ་བོ་བཅུ་གཉིས་ཀྱི་ཁྲོད་ནས་སྐྱེ་བོ་གཅིག་གིས་མཆིན་པའི་གཉན་ཚད་ཀྱི་ནད་གཞི་འདི་ཁུར་ཏེ་འཚོ་སྡོད་བྱེད་བཞིན་ཡོད་ལ། བོད་མི་མང་པོ་ཞིག་ལའང་སྲོག་ཉེན་ཅན་གྱི་ནད་གཞི་འདི་ལྡན་ཡོད་མོད། སྐྱེ་བོ་མང་པོ་ཞིག་གིས་རང་ཉིད་ལ་ནད་གཞི་དེ་ཕོག་ཡོད་པའང་ཤེས་རྟོགས་མེད་ལ། དེ་བས་ཀྱང་འགངས་ཆེ་བ་ཞིག་ལ་སྐྱེ་བོ་མང་པོ་ཞིག་གིས་ནད་གཞི་དེའི་སྐོར་དང་དེའི་སྔོན་འགོག་གི་ཐབས་ལམ་ཐད་ལ་ད་དུའང་ཤེས་རྟོགས་ཅི་ཡང་མེད་པས་སྣང་ཆུང་མ་བྱས་པར་སྔ་ས་ནས་ཐུགས་སྣང་དགོས་ཚུལ་དང་།
ལོ་ལྟར་སྤྱི་ཟླ་༧ཚེས་༢༨ཉིན་འདི་ནི་གལ་ཆེའི་ཉིན་མོ་ཞིག་ཆགས་ཡོད། ཉིན་མོ་འདི་ནི་མཆིན་པའི་གཉན་ཚད་Hepatitis Bཡི་གཉན་སྲིན་ཐོག་མར་གསར་རྙེད་གནང་མཁན་དང་། ནོ་སྦེལ་གཟེངས་རྟགས་བཞེས་གནང་མཁན་སློབ་དཔོན་ཆེན་པོ་བཱ་རུ་བྷ་ལུམ་བྷར་མཆོག་གི་འཁྲུངས་སྐར་ལ་ཆེ་མཐོང་དང་གུས་བརྩི་མཚོན་ཆེད་དུ། འཛམ་གླིང་ས་ཕྱོགས་ཁྱོན་ཡོངས་སུ་འཛམ་གླིང་མཆིན་པའི་གཉན་ཚད་ཉིན་མོ་སྲུང་བརྩི་ཞུ་བཞིན་ཡོད། ང་ཚོས་འཛམ་གླིང་མཆིན་པའི་གཉན་ཚད་ཀྱི་ཉིན་མོ་སྲུང་བརྩི་ཞུ་བ་དང་ཆབས་གཅིག་ང་ཚོས་མངོན་ཆུང་ངང་གནས་པའི་ནད་ཡམས་དེ་ཕམ་ཉེས་གཏོང་རྒྱུར་རང་ཉིད་ཀྱི་ཆོད་སེམས་སྲ་བརྟན་གཏོང་དགོས་ཀྱི་ཡོད།
དེས་ན་དེ་རིང་ནས་བཟུང་སྟེ་༢༠༡༥ ཟླ་༧ པའི་ཟླ་མཇུག་བར་བོད་མིའི་ས་གནས་འགོ་འཛིན་ལས་ཁུངས་ཁག་དང་། འཕྲོན་བསྟེན་ཚན་པ། གཞུང་འབྲེལ་མིན་པའི་ཚོགས་པ། དགོན་སྡེ་དང་སློབ་གྲྭ་ཁག་བཅས་ནས་རྒྱ་གར་དང་བལ་ཡུལ་ཁུལ་དུ་ཡོད་པའི་བོད་མིའི་ཚོགས་སྡེ་འདྲ་མིན་ནང་གསར་གཏོད་རང་བཞིན་གྱི་གོ་རྟོགས་སློབ་གསོ་སྤེལ་བའི་བྱེད་སྒོ་གང་མང་གོ་སྒྲིག་ཞུ་རྒྱུར་འདི་ག་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་འབོད་སྐུལ་ཞུ་རྒྱུ་ཡིན་ཚུལ་སོགས་འཁོད་འདུག
མཆིན་པའི་གཉན་ཚད་ནི་མཆིན་པའི་གཉན་ཚད་ཨེ། བི། སི། ཌི། ཨི་ཞེས་འབོད་པའི་སྡེ་ཁག་ཏུ་བྱས་པའི་འགོ་ནད་ཅན་གྱི་ནད་གཞི་ཞིག་ཡིན་པ་རེད། ནད་གཞི་དེས་དེ་མ་ཐག་ཏུ་འདས་རྐྱེན་དུ་འགྱུར་བའི་མཆིན་པའི་གནས་སྟངས་དང་གཅོང་ནད་ཅན་གྱི་མཆིན་པའི་གནས་སྟངས་གཉིས་ཀ་སློང་གི་ཡོད། ནད་གཞི་དེ་ནི་ལོ་རེར་སྐྱེ་བོ་ཁྱོན་ས་ཡ་ ༡.༤ ཙམ་ཞིག་གི་འདས་རྐྱེན་དུ་འགྱུར་ཡོད། དེ་ལྟ་ནའང་ད་བར་དམིགས་བསལ་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་ཁག་དང་འཚོ་བའི་འཁོས་བབས་ཞན་པའི་ཚོགས་སྡེ་ཁག་ནང་མཆིན་པའི་གཉན་ཚད་ཐད་ལ་ཤེས་རྟོགས་མེད་པའམ། ཡང་ན་སྣང་མེད་རྒྱ་ཡན་ཤུགས་ཆེ་བཏང་ཡོད་པ་སོགས་འཁོད་འདུག
དེར་བརྟེན་འཛམ་གླིང་འཕྲོད་བསྟེན་ལྷན་ཚོགས་ཀྱིས་འདི་ལོའི་བརྗོད་གཞི་ལ་མཆིན་པའི་གཉན་ཚད་སྔོན་འགོག་བྱ་དགོས་ན། བྱ་སྤྱོད་ད་ལྟ་ནས་སྤེལ་དགོས་ཞེས་པའི་འབོད་ཚིག་བཀོད་ཡོད། འཛམ་གླིང་འཕྲོད་བསྟེན་ལྷན་ཚོགས་ཀྱིས་བརྗོད་གསལ་ལྟར་ན་མཆིན་པའི་གཉན་ཚད་བི་ཡི་ནད་གཞིས་རྐྱེན་པས་ལོ་ལྟར་སྐྱེ་བོ་ ༧༨༠,༠༠༠ ལྷག་ཙམ་རྐྱེན་འདས་སུ་སོང་བཞིན་ཡོད་འདུག

གསར་འགོད་པ་ཕྲེང་རིང་བསྟན་ནོར།