སྐབས་༡༧་པའི་རྒྱལ་ཡུམ་ཆེན་མོའི་དྲན་རྟེན་རྩེད་འགྲན།

༄༅༎སྐབས་༡༧པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་བུམ་པའི་རྐང་རྩེད་པོ་ལོའི་འགྲན་བསྡུར་དེ་བཞིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་གནང་བཞིན་ཡོད་པ་ལྟར། འགྲན་བསྡུར་མཐའ་མའི་གོང་གི་རིམ་པ་གོང་མ་དེའི་ནང་འདོད་རྒུ་གླིང་རྐང་པོལ་རུ་ཁག་དང༌། ཀེ་ལེ་མེན་ཊོནདོན་གྲུབ་གླིང་རྐང་པོལ་རུ་ཁག་གཉིས་ལ་རྒྱལ་ཁ་ཐོབ་ནས་། མཐའ་མའི་འགྲན་བསྡུར་ནང་གོང་ཞུས་རུ་ཁག་དེ་གཉིས་སླེབས་འདུག།
རེས་གཟའ་པ་སངས་ཉིན་འགྲན་བསྡུར་མཐའ་མའི་གོང་གི་རིམ་པ་གོང་མ་གཅིག་དེ་མོན་གྷོ་འདོད་རྒུ་གླིང་གཞིས་ཆགས་ཀྱི་རྐང་པོལ་རུ་ཁག་དང་ཧུན་སུར་རབ་རྒྱས་གླིང་རྐང་པོལ་རུ་ཁག་གཉིས་དབར་འགྲན་བསྡུར་གནང་སྐབས་ གཟིགས་མོ་གཟིགས་མཁན་ཚོས་མོན་གྷོ་ས་གནས་ཀྱི་རྐང་རྩེད་པོ་ལོའི་རུ་ཁག་ལ་རྒྱབ་སྐྱོར་གྱི་རྐད་སྒྲ་ཤུགས་ཆེ་སྐྱོན་པའི་མཐར་མོན་གྷོ་འདོད་རྒུ་གླིང་རྐང་རྩེད་པོ་ལོའི་རུ་ཁག་གིས་སྒོ་ལ་སྤོ་ལོ་གཅིག་མང་བ་བཏང་ནས་རྒྱལ་ཁ་ཐོབ་འདུག། མོན་གྷོ་འདོད་རྒུ་གླིང་རྐང་པོལ་རུ་ཁག་གི་རྩེད་འགྲན་པ་ཚེ་རིང་ཕུན་ཚོགས་ལགས་ཀྱིས་མཐའ་མའི་གོང་གི་འགྲན་རྩེད་ནང་གོལ་གཉིས་བཏང་ཡོད་པ་དང༌། ད་རེས་ཀྱི་འགྲན་བསྡུར་ཡོངས་ནས་ཁྱོན་ གོལ་དྲུག་བཏང་ནས་ མི་སྒེར་གྱི་གསེར་གྱི་ལྷམ་ཞེས་པའི་གཟེངས་རྟཌ་ཐོབ་རྒྱུའི་རེ་བ་ཆེན་པོ་ཡོད་པ་རེད།་  འགྲན་བསྡུར་མཐའ་མའི་གོང་གི་རིམ་པ་གོང་མ་གཞན་དེ་ ཝ་ར་ཎ་སིའི་རྐང་པོལ་རུ་ཁག་དང་ ཀེ་ལེ་མེན་ཊོན་དོན་གྲུབ་གླིང་རུ་ཁག་དབར་གྱི་འགྲན་བསྡུར་དེ་ད་བར་འཁྲུག་ཆ་དོད་ཤོས་དེ་བྱུང་ཡོད་པ་དང༌། འགྲན་བསྡུར་གྱི་དུས་ཚོད་ཡོལ་ནས་ད་དུང་དུས་ཚོད་འཕར་མ་རྩེད་དགོས་བྱུང་བཞག། བོད་རྒྱལ་ཡོངས་རྩེད་འགྲན་ཚོགས་པའི་དྲུང་ཆེ་སྐལ་བཟང་དོན་གྲུབ་ལགས་ཀྱིས་ ཝ་ར་ཎ་སི་དང་ཀེ་ལེན་མེན་ཊོན་གཉིས་དབར་རྩེད་འགྲན་གྱི་དུས་ཚོད་འཕར་མའི་སྐབས་ཆར་པ་འབབ་ནས་རྩེད་ཐང་ཕྲན་བུའི་འདམ་ཉོག་ཅན་ཆགས་ཡོད་ནའང༌། རྩེད་འགྲན་པ་དང༌། གཟིགས་མོ་བ་ཚོས་དངངས་སྐྲགས་དང་དོ་སྣང་ཆེན་པོའི་ངང་ནས་འགྲན་བསྡུར་དེར་གཟིགས་མོ་གཟིགས་ཡོད་སྐོར་གསུངས་བཞག།
དེ་མིན་གྱི་རྩེད་འགྲན་མཐའ་མའི་གོང་གི་རིམ་པ་གོང་མ་གཞན་གཉིས་པོ་དེ། བལ་ཡུལ་འཕགས་ཤིང་རུ་ཁག་དང་ཅེ་ནཡི་རྐང་པོལ་རུ་ཁག་དབར་རྩེད་ནས་ ཅེ་ནའི་ལ་རྒྱལ་ཁ་ཐོབ་ཡོད་པ་དང༌། དེ་ནས་བེ་ལ་ཀུ་པི་དང་གོ་ལ་ཐ་ལའི་རྐང་པོལ་རུ་ཁག་དབར་འགྲན་བསྡུར་ཐུག་ནས་ གོ་ལ་ཐ་ལའི་རུ་ཁག་ལ་རྒྱལ་ཁ་ཐོབ་ཡོད་པ་རེད།
རྩེད་འགྲན་མཐའ་མའི་གོང་གི་རིམ་པ་དེ་རྩེད་མཁན་ད་ཆ་རུ་ཁག་བཞི་ལས་ལྷག་མེད་སྟབས། ཀེ་ལེ་མེན་ཊོན་དང་མོན་གྷོ་འདོད་རྒུ་གླིང་གི་རྐང་པོན་རུ་ཁག་གཉིས་དབར་འགྲན་བསྡུར་ཁག་ཅིག་དང༌། ཅེ་ནཡི་དང་བེ་ལ་ཀུ་པི་ གོ་ལ་ཐ་ལ་གཉིས་དབར་འགྲན་བསྡུར་གནང་ནས་ མཐའ་མའི་འགྲན་བསྡུར་གནང་མཁན་རུ་ཁག་གཉིས་ཐོན་དགོས་ཀྱི་ཡོག་རེད།